هەفتەیەكە شێروان شێروانی دەستگیركراوەو نازانرێت لە كوێیە؛ لە بەغداوە كار بۆ ئازادكردنی دەكرێت

14-10-2020 09:34
هەڵمەتی ئازادكردنی شێروان شێروانی و دەستگیركاوانی سنووری بادینان - بەغدا - ئەنجوومەنی نوێنەران

پەرەگراف

پاش هەفتەیەك لە دەستگیركردنی لەلایەن هێزێكی ئەمنییەوە، تا ئێستا نازانرێت ڕۆژنامەنووس و چالاكی مەدەنی شێروان شێروانی لەكوێیەو زانیاریی بە پارێزەرو كەسوكارەكەی نادرێت، سەركەوت شەمسەدین و غالب محەمەد، پەرلەمانتارانی كورد لە بەغدا، هەڵمەتێكیان بۆ ئازادكردنی ئەو ڕۆژنامەنووسەو دەستگیركراوانی دیكەی سنووری بادینان ڕاگەیاند.

"لە هەنگاوی یەكەمدا هەڵمەتێكی هۆشياركردنەوەمان لەناو پەرلەمانتاران ئەنجام دا، چونكە كوتلە سیاسییەكانی ئێرە زۆر زانیارییان لەسەر پرسەكە نەبوو. لە هەنگاوی دووەمیشدا كۆنگرەیەكی ڕۆژنامەوانیمان سەبارەت بە پرسەكە بەست. لە هەنگاوەكانی داهاتوودا داوا لە ئەنجوومەنی نوێنەرانی عێراق دەكەین كە یەكێك لە تەوەرەكانی كۆبوونەوەی تایبەت بكات بە پێشێلكارییەكانی مافی مرۆڤ لە هەرێمی كوردستان"، سەركەوت شەمسەدین لەبارەی هەڵمەتەكەیانەوە بۆ پەرەگراف وای وت.

شێروان شێروانی ڕۆژی 7ی ئەم مانگە لە ماڵەكەی خۆیدا لە شاری هەولێر دەستگیر كرا، هەرێم ڕەفعەت، پارێزەری دۆسیەی ئەو ڕۆژنامەنووسە، بە پەرەگرافی ڕاگەیاند "هەموو ڕێكارە یاساییەكانمان سەبارەت بە دۆسیەكە گرتووەتە بەر، بەڵام تا ئێستا پەڕاوی دۆسیەكە و خۆیمان نەبینیوە. شوێنی ئەو ڕۆژنامەنووسە نەزانراوە. هەموو ڕێكارە یاساییەكانمان بۆ بینینی هیچ ئەنجامێكی نەبووە".

ڕووگەش عیززەدین، هاوسەری شێروان شێروانی، لەگەڵ ئەوەی جەخت دەكاتەوە كە "تا ئێستا نازانین لەكوێیە و چ تۆمەتێكی ڕووبەڕوو كراوەتەوە"، ئاماژە بەوە دەكات "ئاسایشی هەولێر بە پارێزەری دۆسیەكەی گوتووە كە شێروان لای ئەوان نییە. دادوەریش سەرەتا وتوویەتی لە هەولێرە و ئێستا دەڵێت لە دهۆكە. لەم دوو ڕۆژەدا دەڵێن لە دهۆكیشدا نەماوە".

پاش سێ‌ ڕۆژ لە دەستگیركردنی، دیندار زێباری، ڕێكخەری ڕاسپاردە نێودەوڵەتییەكان لە حكوومەتی هەرێمی كوردستان، شێروان شێروانیی تۆمەتبار كرد بەوەی كە "لە سەرچاوەی دەرەكییەوە یارمەتیی دارایی كراوە بۆ دروستكردنی ئاڵۆزی و پشێوی، ناشرینكردن و گوتنی قسەی نەشیاو بە بەرپرسان و كەسانی خاوەن پێگەی كۆمەڵایەتیی دیاریكراو، هەروەها بەلاڕێدابردنی ناڕەزایی و خۆپێشاندانە ئاشتیخوازییەكان بۆ دروستبوونی تووندوتیژی، هەروەها هەڕەشەكردن لە دادوەران".

پارێزەری دۆسیەكەی شێروان شێروانی سەبارەت بەو تۆمەتانە دەڵێت "هیچ زانیارییەكمان سەبارەت بە قسەكانی دیندار زێباری نییە". بەڵام هاوسەرەكەی شێروانی قسەكانی ڕێكخەری ڕاسپاردە نێودەوڵەتییەكان لە حكوومەتی هەرێمی كوردستان بە "بێ‌ بنەما" وەسف دەكات و دەڵێت "ئەمە تەنیا قسەی خۆیانە بۆ پەردەپۆشكردنی هەڵكوتانە سەر ماڵەكەمان".

"دیندار زێباری گوتوویەتی كە هاوسەرەكەم لە دهۆك دەستگیر كراوە، بەڵام ئەوە ڕاست نییە و هاوسەرەكەم لە ماڵەكەی خۆماندا لە هەولێر دەستگیر كراوە"، ڕووگەش عیززەدین بۆ پەرەگراف وای وت.

هاوكات ئەو سوورە لەسەر ئەوەی كە هاوسەرەكەی "لەژێر گوشاریشدا دان بە شتێكدا نانێت كە نەیكردبێت".

سەركەوت شەمسەدین، ئەندامی كوردی پەرلەمانی عێراق، لەبارەی قۆناغەكانی داهاتووی هەڵمەتەكەیان، وتی"سەرقاڵی ئامادەكردنی پڕۆژەیاسایەكین كە چۆن دادگای مافی مرۆڤ تایبەت بە پێشێلكارییەكانی مافی مرۆڤ لە عێراق و هەرێم، دابمەزرێندرێت. سەرقاڵی ئامادەكردنی هەندێك موزەكەراتیشین بۆ ڕێگری كردن لە سەفەری ئەو كەسانەی كە تێوەگلاون لە ئازاردانی ڕۆژنامەنووسان و چالاكان".

ئەو پەرلەمانتارە ئاماژە بەوەش دەكات كە هەڵمەتەكەیان بۆ "پشتیوانیكردنی دەستگیركراوان و ڕفێندراوانی پارێزگای دهۆك، هاوسۆزییەكی زۆری پەرلەمانتارانی لە سەرجەم كوتلەكان جگە لە پارتی، بەدەست هێناوە".

ئێوارەی ڕۆژی 7-10-2020، ڕۆژنامەنووس و چالاكی مەدنی شێروان شێروانی، لەلایەن هێزێكی ئەمنییەوە لە ماڵەكەی خۆیدا لە هەولێر دەستگیر كرا. پێچەوانەی ڕێكارە یاساییەكانیش، تا ئێستا پارێزەرو خێزانەكەی نازانن ناوبراو لەكوێیە و لەسەر چی دەستگیر كراوە.

ئەوكات هاوسەرەكەی شێروان شێروانی بە پەرەگرافی وت، لە كاتی دەستگیركردنیدا هێزەكە توندووتیژییەكی ئەوتۆیان نەنوواندووە، بەڵام پاڵیان بەوەوە ناوە بەرەو چێشتخانەی ماڵەكەیان و پێیان گوتووە "لەوێ دابنیشە و بێدەنگ بە".

هێزە ئەمنییەكە فەرمانێكی دەستگیركردنیان پیشانی هاوسەری ئەو ڕۆژنامەنووسە داوە كە "بە دەستنووسی عەرەبی نووسرابوو. ناو و واژووی دادوەرەكەی لەسەر بوو". بەڵام ڕووگەش عیززەدین دەڵێت "لە فەرمانەكەدا پاساوی دەستگیركردنەكەی تێدا نەبوو".

ئەو هێزەی شێروان شێروانیی دەستگیر كردووە، شەش ئۆتۆمبێلیان پێ بووە. "دوانیان جامڕەش بوون، دوانیان ئۆتۆمبێلی پۆلیس و دوانەكەی دیكە ئۆتۆمبێلی مەدەنیی ئاسایی بوون".

هەرێم ڕەفعەت عەبدوڵڵا، پارێزەری شێوان شێروانی، جەخت لەوە دەكاتەوە كە دەستگیركردنی ڕۆژنامەنووسەكە "بە شێوازێكی ئاسایی نەبووە". ئەو ئاماژە بەوە دەكات كە "دەستگیركردنی ئاسایی بە شێوەیەكە كە تۆمەتبار تۆمەتێكی ئاراستە دەكرێت لەلایەن دادوەرەوە و بۆ دادگا بانگ دەكرێت. ئەگەر بڕیاری دەستگیركردنیشی هەبێت، دەبێت لە كاتی لێكۆڵینەوە پارێزەرەكەی ئامادە بێت، بەڵام ئێمە تا ئێستا نازانین لە كوێ دەستبەسەر كراوە".

"پێویستە هەر كەسێك دەستگیر دەكرێت، شوێنەكەی دیار بێت. لە كاتی لێكۆڵینەوەدا پارێزەكەكەی ئامادە بێت. هەروەها خێزانەكەی بزانن لەسەر چی دەستگیر كراوە و بۆ كوێ بردراوە، بەڵام لایەنە ئەمنییەكان هیچ وەڵامێكی ئێمەیان نەداوەتەوە"، هەرێم ڕەفعەت عەبدوڵڵا بۆ پەرەگراف وای وت.

* پارێزەر و خێزانەكەی نازانن شێروان شێروانی لەكوێیە و بۆچی دەستگیر كراوە

* هەفتەی ڕەشبگیری؛ لە بادینان چەك حاكمە و چالاكوانان فیرارن

دەستگیركردنی شێروانی شیروانیی ڕۆژنامەنووس، پاش ئەوە دێت لە ماوەی ڕابردوودا هەڵمەتێكی دەستگیركردنی ڕۆژنامەنووس، مامۆستا و چالاكانی مەدەنی لە پارێزگای دهۆك بەڕێوە چوو.

بەپێی ڕاپۆرتێك كە پێشتر پەرەگراف بڵاوی كردەوە، تەنیا لە ماوەی یەك هەفتەدا لە دوای ناوەڕاستی مانگی ئابەوە، لە بادینان نزیكەی 100 كەس دەستگیر كراون.

ئەو بارودۆخەی لە دهۆك گوزەرا، گەنجانی شارەكە بە ڕەشبگیری ناویان برد، چونكە وەك ئەوان دەڵێن؛ بە بێ فەرمانی دادوەر هەڵدەكوتنە سەر خەڵك.

"ئەوەی لە بادینان دەگوزەرێت دەستگیركردن نییە، بەڵكو ڕەشبگیرییە، چونكە بە دەیان هاوڵاتی لە ڕۆژنامەنوس و چالاكوان دەستبەسەركراون بێ بڕیاری دادگا" ئەیهان سەعید، ڕۆژنامەنووس و چالاكوانی بادینان وای وت.

بەپێی بەدواداچونەكانی پەرەگراف، هێزە ئەمنییەكانی دهۆك، بە ڕێگەی عەشایەری و هەڕەشەی ڕاستەوخۆ و ناڕاستەوخۆ، هەوڵی بێدەنگكردنی چالاكوان و خەڵكانی ناڕازیی دەدەن، بەتایبەت ئەوانەی لە تۆڕە كۆمەڵایەتییەكاندا ڕەخنە دەگرن یان بانگەوازی خۆپیشاندان دەكەن.

دەڤەری بادینان، لە مێژوی حوكمڕانی كوردیدا بەردەوام لە قازانج و هێزی پارتیدا یەكلابۆتەوە، پێش چەندین ساڵ یەكێتی و دواتریش یەكگرتوو، دوو ڕكابەری لاوازی ئەو حیزبە بوون، بەبێ زیادبون و هەڵكشان لە دەنگ‌و سەنگیاندا.