بە وێنە؛ جەلالی سام ‌ئاغا ناوماڵەكەیی بەخشییە بنكەی ژین

23-11-2020 07:58
كاتی واژۆكردنی گرێبەستی بەخشینی ناوماڵەكەی جەلالی سام ئاغا

پەرەگراف

جەلالی سام ئاغا كەسایەتی دیاری سلێمانی وەك پێشتر بڕیاری لێدابوو، ناوماڵەكەیی بەخشیی بە بنكەی بەڵگاندن و لێكۆڵینەوەی ژین.

ڕۆژی شەممەی ڕابردوو، ڕەفیق ساڵح، سەرۆكی بنكەی ژین و سدیق ساڵح، ئەندامی دەستەی بەڕێوەبردن، بەپێی ڕێككەوتنێكی پێشوەخت چوونە ماڵی جەلالی سام‌ ئاغا لە گردی سەرچنار لە سلێمانی، لەوێ گرێبەستێكی سێ لاپەڕەییان لەگەڵ جەلالی سام ئاغا واژۆكرد كە لە مەرجەكان‌و لیستی كەلوپەلەكان‌و ناوی حەڤدە شایەتی پڕۆسەی بەخشینەكەی پێكهاتبوو.

بنكەی ژین دەزگایەكی چالاكەو كاری پارێزگارییە لە سامانی كەلەپووری نووسراوی كوردی و بناغەی ئەرشیفێكی نیشتیمانیی داناوە، بەرپرسانی بنكەكە لە لێدوانێكدا سوپاسی جەلالی سام ئاغایان كرد بۆ بەخشینی ناوماڵەكەی بە ئەوان‌و ئەو هەڵوێستەیان بەرز نرخاندو بە نیشانەی ژیان ‌دۆستی و تێگەیشتنێكی قووڵی ژیان و مرۆڤایەتییان لێكدایەوە.

جەلالی سام ئاغاو بنەماڵەكەی چەندین كاری دیكەی خێرخوازییان ئەنجامداوە كە كۆی گشتی بە دەوروبەری ملیۆنێك‌و 700 هەزار دۆلار دەخەمڵێندرێت.

لە دواین كاری خێرخوازییدا، جەلالی سام ئاغا لەسەر ئەركی خۆی‌و خوشكێكی، لە مانگی 7ی ئەمساڵدا دەستی كرد بە دروستكردنی باخچەیەكی ساوایان لە گەڕەكی زەرگەتەی سلێمانی كە پێشكەشی كەرتی پەروەردەی دەكات تا بخرێتە خزمەتی منداڵانی ئەو ناوچەیە.

باخچەی ساوایانی ئەختەری عومەری سام ئاغا، ئەو باخچە نوێیەیە كە لەسەر ئەركی جەلالی سام ئاغاو ئەختەری خوشكی، بە تێچووی 400 هەزار دۆلار لەسەر ڕوبەری 1800 مەتر دووجا زەویی دروست دەكرێت.

باخچەكە لە ڕێكەوتی 6-7-2020 دەستكراوە بە كاركردن تێیداو ماوەی 270 ڕۆژ دیاری كراوە بۆ تەواو كردنی.

پێشتریش ساڵی 2018 جەلالی سام ئاغا قوتابخانەیەكی خێرخوازیی لە سلێمانی دروست كردو ڕادەستی پەروەردەی كرد وەك هاوكاریكردنی كەرتی خوێندن. قوتابخانەكە بە ناوی زەكیەی سام ئاغای بنەڕەتی لە گەڕەكی ئیبراهیم ئەحمەد لە سلێمانی لەسەر حەوت هەزار مەتر زەویی دروستكراوە، 3 هەزار مەتری بینایەو ئەوەی دیكەی باخچەیە، 12 پۆل لە خۆدەگرێت‌و بە تێچووی 550 هەزار دۆلارو بە نوێترین شێوازی ئەندازیاریی سەردەم دروست كراوە.

جەلالی سام ئاغا سەرۆكی پێشووی دیوانی چاودێری دارایی سلێمانی، كەسایەتییەكی دیاری سلێمانییەو لەسەردەمی سەرۆكایەتی ئەودا دیوانی چاودێری دارایی 2 هەزارو 720 ڕاپۆرتی لەسەر گەندەڵی ئامادەكردووە، بەدەر لەو ڕاپۆرتانە، هەرلەو سەردەمەدا دیوان 86 كەسی لەسەر گەندەڵی‌و سەرپێچی یاسایی‌و ئیداریی داوە بە دادگا كە زۆربەیان بەرپرسانی باڵای حكومەت بوون.

ساڵی 2010 كاتێك جەلالی سام ئاغا سەرۆكی دیوانی چاودێری دارایی سلێمانی بوو، پڕۆژەی بەخشینی خەڵاتێكی ساڵانەی دامەزراند بۆ خانمی سەلارو فەرمانبەری نمونەیی دیوان، بەمەبەستی دابینكردنی پارە بۆ بەخشینی خەڵاتەكە، جەلالی سام ئاغا پارچە زەوییەكی 200 مەتریی موڵكی خۆی فرۆشتووە بە زیاتر لە 70 ملیۆن دینارو پارەكەی لە بانك داناوە بە چەند مەرجێك كە تەنها بۆ بەخشینی ئەو خەڵاتە بەكاربهێنرێت‌و خاوەندارێتی ئەو حسابە بەناوی دیوانی چاودێری دارایی سلێمانی تۆماركراوە.

جەلالی سام ئاغا كاتێك سەرۆكی دیوانی چاودێری دارایی بوو وە پێشتریش كە بریكاری وەزارەتی دارایی بووە، لە هەردوو پۆستەكەدا سەرجەم ئیمتیازاتەكانی ڕەتكردووەتەوە، هەرلە وەرگرتنی ئۆتۆمبێل‌و پاسەوان، هەروەها بۆ كەمكردنەوەی خەرجیی حكومەت داوایكردووە موچەی سەرۆك وەزیران‌و وەزیرەكان كەمبكرێنەوەو بۆئەوەش یەكەم كەس لە خۆیەوە دەستیپێكردووە.

كاتێكیش خانەنشین بووە بە پلەی وەزیر، بۆی هەبووە وەك هەر وەزیرێكی دیكە پاسەوان‌و ئۆتۆمبێل‌و شۆفێری هەبێت، بەڵام جەلالی سام ئاغا هەموو ئەوانەی ڕەتكردووەتەوەو لەكاتی خۆیشیدا لە ڕۆژنامەدا بڵاویكردووەتەوە كە ئیمتیازاتی خانەنشینیی وەرناگرێت.

هەروەها جەلالی سام ئاغا ئەو خانووەی ئێستا تێیدا دەژی لە گردی سەرچناری سلێمانی كردوویەتی بەناوی وەزارەتی تەندروستییەوە، بۆئەوەی دوای كۆچی دوایی خۆی بكرێت بە نەخۆشخانەی گشتی‌و پێشكەشی كەرتی تەندروستی كردووە.

لە بەرامبەر هاوكارییەكانی جەلالی سام ئاغا بۆ كەرتی پەروەردە، ساڵی 2019 وەزیری پەروەردەی هەرێمی كوردستان، لەماڵەوە سەردانی كردو خەڵاتی ڕێزلێنانی پێبەخشی لەپای هەوڵەكانی ئەو كەسایەتییە بۆ خزمەتی كەرتی پەروەردە، جگە لە سەردانی چەندین بەرپرسی دیكەی حكومی بۆ ماڵەكەی لە سلێمانی بە مەبەستی سوپاس كردنی، چەندجارێكیش داوای لێ كراوە سەردانی هەولێر بكات تا بە فەرمیی‌و لە ئاستی باڵادا پێشوازیی لێ بكرێت‌و سوپاس بكرێت، بەڵام ئەو بەباشی نەزانیوە ئەو سەردانانە ئەنجام بدات.

كارە خێرخوازییەكانی ئەو بەرپرسە باڵایەی پێشووی حكومەتی هەرێم لە كاتێكدایە، بەرپرسانی هەرێمی كوردستان بە گشتیی زۆرترین ڕەخنەو ناڕەزاییان لەسەرە لەلایەن خەڵكەوە، پەنجەی تۆمەتی گەندەڵیی زەبەلاحیان بۆ ڕادەكێشرێت‌و كەمترین دەستیان هەبووە لە كاری خێرخوازیی‌و خزمەتگوزاریی بۆ كەرتە جیاوازەكانی حكومەت لەسەر ئەرك‌و بە تێچووی خۆیان.