كاتێك تەماشای (ئاوێنە) ئەكەیت، ئەتوانیت ناڕێكییەكانی خۆت چاك بكەیت، بەڵام مێژوو وا نییە، ڕێگەت ئەدا تەماشای خۆت بكەیت، خەڵك و چینەكانی دوای خۆشت تەماشای بكەن، وەلێ هەرگیز ڕێگەت نادا ناڕێكییەكانی خۆت چاك بكەیتەوە، ئەگەر ناڕێكییەكانی ناو مێژوو چاك بكرایەتەوە، مەعریفە كەڵەكەبوەكانی مرۆڤ سەراپا ئەبونە جەهالەت و ئیمڕۆ و ئایندە هەمیشە تاریك ئەبوون.
ژیان لە دیالەكتیكدایە، باش و خراپ، پیس و پاك. بە مانایەكی تر ئەوە ئازایەتی كاراكتەرە ناڕێكەكان و پۆخڵەواتەكانیانە، كە كاراكتەرە پاك و ڕێكەكان ئەناسینەوە. ئەگەر گەندەڵی نەبوایە ئێمە لە كوردستان چۆن "جەلالی سام ئاغا" مان بناسیایە كە تەمەنێكی لە دژی گەندەڵی دا سەرف كرد، ئەگەر "جەلالی سام ئاغا" دە ساڵ سەرۆكی دیوانی چاودێری نەبوای و (2750) ڕاپۆرتی لەسەر گەندەڵكاران ئامادە نەكردایەو، سەدان ملیۆن دۆلار و ملیارەها دیناری لە قوڕگیان بە هەیبەت و ئازایەتی خۆی دەرنەهێنایە، ئێمە چۆن بمانزانیایە "داواكاری گشتی" و " سیستمی قەزایی" تەنها كارتۆنێكەو، دوگمەی دەستی حزبەكانەو، ناتوانێ یەك كەیس بجوڵێنێ!.
جیاوازی هەیە، لەوەی لەسەر سكی میللەت تەخشان و پەخشان بكەیت و، چەندین هەژماری بانكی لە دەرەوە بكەیتەوەو، لەسەردەمێكدا میللەت سەراپای لە قەیرانا نغرۆ بووە، سەركردە سیاسییەكانی میللەتێك هەمووی (یەكێ زۆر و ئەوەكەی تر كەمتر) خەریكی تەقەتكردن(شاردنەوە)ی سەروەت و سامانێك بن كە دزیویانە. كەچی "جەلالی سام ئاغا" ئەوەشی هەیەتی ئەیبەخشێت:
- خانوویەكی خۆی لە گردی سەرچنار ی سلێمانی، كە لە حەفتاكانەوە، بە هەوڵی خۆی و باوكی دروستیان كردووە، لە ڕاقیترین شوێنی ئەمڕۆی شاردا، كردۆتە ناوی "وەزارەتی تەندروستی" یەوەو، دوای نەمانی خۆی بیكەن بە بنكەی تەندروستی، بۆ بیماری دەردی هەژاران.
- زەوییەكی موڵكی خۆیان جاران كەس بۆ چاوشاركێش ڕووی تێ نەئەكرد، ئیمڕۆكە قیمەتی بەرزە، ئەوە زیاتر لە (5) ساڵە فرۆشتوویەتی‌و پارەكەی لە بانك داناوەو، قازانجەكەی ساڵانە ئەدرێ بە كارمەندە سەركەوتوو خانمەكانی دیوان وەك خەڵاتی جەلالی سام ئاغا.
- خەڵك وەزیر نەبووە، بە سەدان كەس خۆی بە وەزیر ناونووس كردووەو، ساڵەهایە خانەنشینی وەزیری وەرئەگرێ، كەچی ئەو "جەلالی سام ئاغا" یە نزیكەی نیو سەدە (47) ساڵ لە وەزیفەی ئیداری و سیاسیی و پێشمەرگایەتی دا، ئەوجار نە ئۆتۆمبێلی حكومەت نە پاسەوانی حكومەتی لەگەڵ خۆی بەكار نەهێناوە. كە داوای دەستلەكاركێشانەوەی كرد، هەر قبوڵ نە ئەكرا، كۆتاجار لە نامەی دەستلەكاركێشانەوەكەی دا دوو دەستەواژەی بەكارهێنا، یەكێكیان ئەڵێ "شەرەفمەند نییم بە وەزیفەكەتان"، ئەویتریش ئەڵێ "هەستەكەم جسمێكی غەریبم لە ناوتانا"... تاڵەبانی یەكێك بوو لە هاوڕێ دیرینەكانی، هەروەها نەوشیروان مستەفاش.. هەرگیز ڕێگەی نەدا یەك ڕاپۆرتی دیوانەكەی بۆ ململانێی حزبی و سیاسیی بەكاربهێنن، چەندجار خودی "نەوشیروان مستەفا" پێشنیاری كرد بۆ وەزیری دارایی و بۆ سەرۆكی هەرێم كاندیدیان بێت، هەر ڕەتی كردەوە. ئەوەیە جیاوازییەكە خەڵك هەڵپەیەتی پارەی میللەت لووش بدات ئەو هی خۆی ئەبەخشێ، هەزاران سیڤی و مامەحەمەیی هەیە تا پۆستێك وەربگیرێ، ئەو خۆی دەستلەكار ئەكێشێتەوەو، باڵیشی ڕائەكێشن تا باری بێ باریان ڕاست بكاتەوە، ئەو هەر ڕەتی ئەكاتەوە.
- جەلالی سام ئاغا، هەر خۆی وانییە، خانەوادەكەیشی بەشێكن لە مێژووی سلێمانی، خوشكێكی " ئەختەری سام ئاغا" شوققەكەی خۆی بە دیاری ئەدا بە وەزارەتی پەروەردە تا بكرێت بە باخچەی ساوایان و، خۆیشی دێت لەگەڵ براكەی ژیان ئەگوزەرێنێ.
- یەكێكی تر لە خوشكەكانی "زەكیەی عومەری سام ئاغا" كۆچی دوایی كردووە، یەكێك بووە لە مامۆستا ناودارەكانی شاری سلێمانی، بە نەوەكانی خۆیەوە چەندین نەوەی دیكەی بۆ كوردستان پێگەیاندووە، ئیمڕۆكە خۆی و بە تێكڕا خانەوادەكەیان "قوتابخانەی 12 پۆلی زەكیە سام ئاغا" دروست ئەكەن، بەڵێندەرەكەی و سەرپەرشتیاری پرۆِژەكەش مرۆڤە چاوچنۆكەكانی ئەم فەزایە نیین، لە هەل‌و دەرفەت بگەڕێن، هەر نەوەكانی خۆیانن، "دلێری عومەری سام ئاغا" سەرپەرشتیاری پڕۆژەكەو، بەڵێندەرەكەش "كامەرانی عەلی ئاغای پورزایەتی" بودجەی ئەم پڕۆژەیە لەم ڕۆژگارە پڕ قەیراناوییەدا بڕی (550000) پێنج سەدو پەنجا هەزار دۆلاری ئەمەریكییەو، لەتەواوبوندایە.
- یەكێكی تر لە خەسڵەتەكانی ئەم پیاوە سپییەی شار، كۆدەنگی و كۆ-ڕاییە لەسەری، ئەوانەشی كە لەبەر لاساری حوكمڕانییان ئەم جەلالە گوێی باداون، هەر ناچارن دانی خێری پیابنێن. ڕەشوەی كەلام بە باوكی كەس نادا، نزیك‌و دووری یەكێكە، لە تەمەنێكی زۆر هەرزەییمداو بەتێگەیشتنێكی كامڵەوە ناسیم، ئەوە (10) ساڵە وەك یەكێك لە نزیكەكانی ئەو، هاوەڵەكانی ئەو، پەروەردەیەكی كۆڕو كۆمەڵەكانی ئەو گوزەر ئەكەم، مرۆڤ هەر هەڵە ئەكا، یان مەیلی بەلای هەڵەیا ئەچێ، چ جای توێژەرو ڕۆژنامەوان‌و گەڕۆكێكی وەك ئێمەش (ماوەیەكیشە لەسەر مێز و كورسی دائەنیشین)!. هەموو جارەكان وێنەیەكی ئەم جەلالەم دێتە پێش چاو و هەڵەكان خۆیان بزر ئەبن. ئێ كاكە گیان، بەهەموو كەموكورتییەكانی زەمانەوە، مام جەلال مام جەلال بوو، كەس زاتی نە ئەكرد پێی بڵێ "ئەمەت وانییە".. ئەو لە میحوەری مەحبوبیەتەوە بەتوندی پێی ئەگوت "وەڵا...مامە هیچ وانییە"...ئیتر ئاوایە، یان ئەبێت خۆت لە بەڵا خراپەكانی ئافرەت و پارە دوور بگریت و دان بە خۆتا بگری، یان ئەوەیە هاوەڵی جەلالی سام ئاغا بیت. كاتی خۆی كە لە میدیادا "حەریس" بوین لەسەر پاراستنی شكۆی ڕاپۆرتەكانی دیوانی چاودێری دارایی، ئەچووین بۆ دیوان، پرسگەكەش وەك ژوورەكەی خۆی جددیی و پاكوخاوێن بوو، هەر لەخۆتەوە هەستت ئەكرد لە شوێنێكدای خاوەندارێتی لە وڵات ئەكا، لە ژوورەكەی لەوحەیەكی هەڵواسی بوو بە عەرەبی كە " ئەبێت ئینسان شەرم بكا لەوەی شت بۆ خۆی داوا بكاو، شەرم نەكا لە داواكردنی مافی ئەوانی تر"... ئیتر لەوساوە، باوكیشمان لە زیندان بوایە نە ئەبوو تەكلیفێكی شەخسیی بكەین، مەگەر بۆ كارێك كە چاكەی گشتی تیا بوبێت.
لەناو ئەم هەموو مارو دوپشك‌و گورگ‌و چەقەڵەی ڕۆژگاری ئیمڕۆدا، هێشتا پشكۆیەك ئەسوتێ و، ڕووناكییەك هەیە، كە ئەكرێ كەسانی تریش چاوی لێ بكەن و، چراخانێك لە شار و ووڵاتدا بەرجەستە بكەن. لە واقعێكدا زێدەڕۆیی و گەندەڵی بووە بە بابەتێكی ئاسایی، ئەوەتا پیاوێكی سپی ماوە.. وەك وەزیری پەروەردەی حكومەتی هەرێم " د. پشتیوان سادق" لەكاتی هاتنی بۆ سلێمانی و سەردانی دا لە پای خزمەتەكانی ئەم خانەوادەیە بە كەرتی پەروەردە، وتی"ئێمە لە هەولێرەوە حەسوودی بەم پیاوەی سلێمانی ئەبەین"....
ئینجا با خۆشی گوێی لێ بێت، ئەم بابەتەم ئەمجارە نووسی، لەبەر شەهامەتەكەی كاك جەلال نەبوو، ئەوە شتێكەو خۆی هەیەو، پێشووتریش زۆرمان وتووە لەسەری، لەبەر ئەوە بوو، كە ئەگەر سەت دەوڵەمەنی شاری سلێمانی چارەك بەوەندەی خانەوادەی سام ئاغاش نە بەخشن، تەنها هەریەكەو دەستی گەنجێك بگرن، یەك تاك پەروەردە بكەن، سبەینێ سەت كەس وڵاتێكی پێشكەوتوو، كۆمەڵگەیەكی تەندروست بینا ئەكەن.
جەلال سام ئاغا. وێنە؛ پەرەگراف.