بۆچونەكانم لەم بابەتەدا تایبەتە بە دوو گروپ لە خەڵك:
گروپی یەكەم ئەوانەن دەنگدەری یەكێتی و پارتی نین، بەڵام بێئومێدن یان ڕاڕان لە دەنگدان.
گروپی دووەم ئەوانەن دەنگدەری یەكێتی و پارتی بوون، بەڵام ڕاڕان دەنگبدەنەوە بەم دوو حزبە یان دەنگیان بخەنە پاڵ لایەنی تر.
ئێمە ناتوانین یەكجۆر پێشنیارمان بۆ ئەم دوو گروپە هەبێت.
پێشنیارەكانی من بۆ گروپی یەكەم ئەمانەیە:
با ڕاست بڕۆین، هەمو بڕیارێك مەترسیی هەیە. دەنگدانیش ئەو مەترسییەی هەیە كە دەنگەكەت بەفیڕۆ بڕوات و هەست بە ئازاری ویژدان بكەیت. یەكێك لە هۆكارەكان ئەوەیە پەرلەمان دەزگایەكی مەسرەفكاری بێ سود بووە. لەگەڵ ئەمەشدا، ئەگەر دەنگیش نەدەیت ئەوا:
دەنگ-نەدان ناگاتە ئاستێك بەهایەكی سیاسیی هەبێت (بۆ نمونە لە 60%ی خەڵك لە سەرتاسەری عێراقدا دەنگ نەدەن). كورسییەكانیش هەر پڕدەبنەوە، بۆی هەیە هێزە تاریكەكان سەركەون و كاندیدی زۆر لاواز بچێتە پەرلەمان بەهەمان موچە و ئیمتیازات.
تۆ دەبێت دەرفەت بدەیت كێبڕكێ دروست ببێت، قۆرخكاریی سیاسی كەم ببێتەوە، ئەوكات حزبەكان بەناچاریی لە خەڵك نزیكتر دەبنەوە و زیاتر خزمەت دەكەن. پاشان دەنگدان بۆ پەرلەمان تەنیا یەك وێستگەیە لەناو پڕۆسەیەكی درێژخایەندا، یەك ئامانجی دیاریكراو ڕەنگە بهێنێتەدی، تۆ دەتوانیت بەشێوازی تر بەردەوام بیت لە ڕەخنە و هەڵوێستی سیاسی تەنانەت لەو كاندیدەی دەنگی پێدەدەیت.
پێشنیارەكانی من بۆ گروپی دووەم ئەمانەیە
لای كەم لە دوو دەیەی ڕابردودا و تا ئەمڕۆ، مۆدێلی سیاسی یەكێتی و پارتی مۆدێلێك بوە وڵات لە نەتەوە، نەتەوە لە حزب، حزب لە مەكتەبی سەركردایەتی، سەركردایەتی لە مەكتەبی سیاسی، مەكتەبی سیاسی لە بنەماڵە و بنەماڵە لە سەرۆكی بنەماڵە/حزبدا كورتدەكاتەوە. (ئەمە وەسفێكی تروتسكییەو دەستكاریم كردوە)
لە ئێستادا، هەرچۆن بتەوێت لەم دو حزبەدا خزمەت بكەیت، هەردەچێتەوە خزمەتی خانەی یەكەم و دوەم، پاشان سێیەم و چوارەم، نەتەوە و نیشتمان لە خانەی كۆتاییدا دەبن. ڕەنگە ئاسان نەبێت بۆ ئەندام و لایەنگرە دڵسۆز و ڕاڕاكانی ئەم دوو حزبە لەم وێستگەیەدا بە 180 پلە سوكان بسوڕێنن. دەكرێت لای كەم دەنگەكانیان بسوتێنن یان بایكۆت بكەن، بەم هۆیەشەوە ڕەنگە هیچ نەبێت حزبەكانیان ناچار بە گۆڕانكاریی بكەن.
ب. گۆڕان، هاوپەیمانیی و نەوەی نوێ
هەرسێكیان خاڵی لاوازیان زۆرە(بۆ نمونە: بەشداریی لە شەڕی ناوخۆ لەلایەن بەشێك لە سەركردایەتیی گۆڕان و هاوپەیمانیی، قۆرخكردنی سەركردایەتیی گۆڕان لەلایەن نەوەی پێشوەوە، ناڕۆشنی سەروەت و سامانی د.بەرهەم، عاشقبون بە دەوڵەمەندبون و موبالەغەكردن و بیناكردنی گوتاری سیاسی لەسەر ئەو بنەمایەوە لای شاسوار عەبدول واحید، جگە لە قەزیەی چاڤی لاند). بەڵام سێ هێزی مەدەنین، عەسكەریی نین، ئیسلامی توندڕەو نین، ڕەخنەگرتن و كاریگەردانان لەسەریان قورس نییە و خەڵكی بەتوانایان لەگەڵە. لەناویشیاندا، بزوتنەوەی گۆڕان دامەزراوتر و تۆكمەترە. بۆ بەهێزكردنی مونافەسەش بێت، دەكرێت كاندیدێكی بەتوانا و فكركراوە لەناویاندا هەڵبژێریت.
كۆمەڵ و یەكگرتوو
مەلەفی گەندەڵییان لە حكومەتدا پاكە و جێی دەستخۆشییە. من دژی ئیسلام نیم، بەڵام ئەم دوو حزبە مەزهەبی و ئاینین، دونیا دابەشی سەر مسوڵمان و نامسوڵمان یان سوننە و شیعە دەكەن، هەرگیز زۆر گەشە ناكەن و ڕەنگیشە مەترسی بن بۆسەر كەسێك ڕای دژ بە ئیسلام بهێنێتە ئاراوە. بەڵام ئەگەر ئیسلامەتی بنەمای سەرەكیی دەنگدانم بوایە، ئەوا كاندیدێكی بەتواناو فكركراوەی كۆمەڵی ئیسلامیم پێ باشتر دەبو دوای ئەوەی یەكگرتوو زۆر لە ئۆپۆزسیۆنبوون دوركەوتەوە.