هەڵوێستی تەوافوقی، یەكێتی دەكات بەحیزبی شیوعی عێراقی

17-02-2017 01:18

 


جارێكی تر گوێم لە لێدوانەكانی كاك سەعدی پیرە بوو سەبارەت بە هەڵوێستی یەكێتی و نەخشە رێگای یەكێتی بۆ ساڵی 2017، كە ئەوەی تیا بەدی دەكرێت یەكێتی ناتوانێت بڕیار بدات. ئەوە ئاشكرایە هیچ ئومێدێك نیە بۆ ئەوەی پارتی و بزووتنەوەی گۆڕان بتوانن پێكەوە هەنگاوی بەرو نزیكبوونەوەو پێكەوە كاركردن بنێن، ئەویش لەبەر هۆیەكی زۆر سادە ئەویش ئەوەیە، لەوە ناچێت پارتی هیچ تەنازولێك بۆ گۆڕان بكات بەڵكو نایەوێت گۆڕان بەشدار بێت لە بەڕێوەبردنی هەرێمدا.

 

تاكە ئەگەرێك كە بشێت لێكنزیكبوونەوەی ئەم دوو لایەنە درووست بكات، ئەوەیە گۆڕان تەنازولی زۆر گەورە بۆ پارتی بكات و بە هەموو داواكارییەكانی پارتی رازی بێت، كە ئەمەش پێموایە شتێكی چاوەڕوان نەكراوە. كەواتە یەكێتی لە نێوان ئەم دوو لایەنەدا كە هیچ ئەگەرێكی لێكنزیكبوونەوەیان نیە چی دەكات؟ بێگومان ئەگەر واقیعیانە لێی بڕوانرێت تەنیا كات بە فیڕۆ دەدات.

 

هۆكارەكەشی ئاسانەو ئەوەیە ناتوانێت دەستبەرداری بەرژەوەندییەكانی بێت لەگەڵ پارتیدا. لە هەمان كاتدا لە ترسی قاعیەی حیزبەكەی ناوێرێت بە ئاشكرا ئەو بەناو رێكەوتنەی لەگەڵ گۆڕان كردوویەتی هەڵبووەشێنێتەوە. لە بارێكی وەهاشدا لەلایەك گۆرانی بە باڵای رێكەوتنی ستراتیژی چەندین ساڵەیدا لەگەڵ پارتیدا دەڵێت و لەلایەكی تریش گۆرانی بە باڵای رێكەوتنەكەی لەگەڵ گۆڕاندا دەڵێت. هەرچەندە من پێموایە ئەوەی لەگەڵ گۆڕان كردوویەتی رێكەوتن نیە، بەڵكو لە غیابی مام جەلالدا هەژموونی دەسەڵاتی رابردووی نەوشیروان مستەفا لە كۆنەستی مەكتەبی سیاسی و سەركردایەتی و كادیرانی پێشكەوتووی یەكێتیدا ژیاوەتەوەو وەكو تارماییەكی ترسناك بەسەر سەریانەوە وەستاوەو ناتوانن خۆیان لەو هەژموونەی سكرتێری ئەوسای كۆمەڵەو سكرتێری دووبارەی یەكێتی دەرباز بكەن.

 

هەموو هۆكاری نەتوانینی پشتكردنی سەركردایەتی یەكێتی لە گۆڕان لە ژێر كاریگەری ترسی رابردوویاندایە لە نەوشیروان مستەفا، ئیتر هەر پاساو و بیانوویەكی تر بهێننەوە بۆش و بێ واتایە. كەواتە ئەگەری ئەوە نیە لەم بارەی ئێستایدا یەكێتی بتوانێت بڕیاری یەكلاكەرەوە بدات. ئەوەش وادەكات كە بارودۆخی هەرێم بەم شێوە هەڵواسراوەی ئێستا بمێنێتەوە. لە راستیشدا زەرەرمەندی یەكەم سەرئەنجام لەم بارەدا یەكێتی نیشتیمانی خۆی دەبێت و سوودمەندی یەكەمیش پارتیە. سەرئەنجام گۆڕان و كۆمەل َو یەكگرتووش لەسەر خاڵێك راوەستاون كە خاڵی شلۆقی خەونبینینە بە گەڕانەوە بۆ نێو ئەو دەسەڵاتەی كە بەردەوام بەگەندەڵ ناوی دەبەن و حەزی گەڕانەوە بۆ ئۆپۆزسیۆن بوون، بەڵام نەتوانینی بڕیاردان و نەتوانینی دەستبەرداربوونی بەرژەوەندییەكانیان لە حكومەتدا نایەڵێت ئەمانیش بڕیارێكی یەكلاكەرەوە بدەن.

 

ئێستا دەربازكردنی بارودۆخی چەقبەستووی كوردستان لە دەستی یەكێتیدایەو مانەوەشی بەم شێوە شلۆقە لە ئەستۆی ئەودایە. یەكێتی دەتوانێت یەكێك لەم دوو بڕیارە بدات و بارودۆخەكە بگۆڕێت بۆ ئاستێكی تر. ئەویش بە بڕیارێكی بوێرانەو خۆڕزگاركردن لەم حاڵەتی تەوافوقیە، كە بڕیارەكەش یەكێكە لەم دووانە. یان پشت لە گۆڕان بكات و لەگەڵ پارتی رێكبكەوێت بۆ بەڕێوەبردنی كوردستان بە شێوەیەكی جیاواز لەمەی ئێستا. یان پشتكردن لە پارتی و هەڵوەشاندنەوەی رێكەوتنەكانی لەگەڵ پارتی و رێكەوتن لەگەڵ گۆڕان و كشانەوە لە حكومەت و كۆی پنتەكانی دەسەڵات.

 

بێجگە لە بریارێكی لەم جۆرەش كۆی كۆبوونەوەو قسەو لێدوانەكانی یەكێتی بێجگە لە درێژەدان بەم بارە ناهەموارەی كوردستان هیچی تر بەرهەم ناهێنێت. بێگومان نەتوانینی وەرگرتنی بڕیار لەلایەن یەكێتیەوە سەرئەنجام یەكێتی لە یەكێتیەوە دەگۆڕێت بۆ حیزبێكی وەكو یەكگرتووی ئیسلامی و سەرئەنجام ئەو پێگەو رۆڵەی كە لەسەردەمی مام جەلالدا هەیبووەو تاكو ئێستاش كەمێكی ماوە، بەتەواوی لەدەستی دەدات. بۆیە ئەگەر یەكێتی بیەوێت لەوەی ئێستای لاوازتر نەبێت و نەبێت بە حیزبی پەراوێز، دەبێ خۆی لەو حاڵەتی تەوافوقیە رزگار بكات و بڕیار بدات.

 

ئەم بارەی ئێستا یەكێتی تێدایە لەگەڵ جیاوازی قۆناغەكەو سرووشتی ململانێكاندا، هاوشێوەی هەڵوێستی حیزبی شیوعیە لە دوای شۆڕشی چواردەی تەموزی 1958، كە سەرباری جەماوەرداری حیزبی شیوعی لەو كاتەدا، بەڵام نەتوانینی بڕیاردان ئەو حیزبەی بە شكست لە دوای شكست سپارد، بۆیە ئەگەر یەكێتی نیشتیمانی نەتوانێت یەكێك لەو دوو بڕیارە بدات، ئەگەری ئەوە هەیە بەهەمان چارەنووسی حیزبی شیوعی عێراقی بگات.