سەدەیەكە بووە بە چاڵ، بۆ چەقین و مانەوەی ئێمە، لەناو حەماسەت و هوتاف و سەقافەتێكی سەتحیداو لێنەگەڕا تۆزێ ڕۆچین بۆ ناو عەقڵ و هۆشیاریی.
نیو سەدەیە بووە بە دیوارێكی ئەستور، لە پشتییەوە دنیایەك شەڕوشۆڕو كارەسات و ناپاكی و عەمالەت.. ئەگوزەرێ و بەڵای دنیای بەسەر كوردبوون و كوردەواریدا هێناوە.
چارەكە سەدەیەكیشە بۆتە پەردەیەك بۆ داپۆشینی فەساد، فەسادێك كە مەگەر هەر سیحری ئەو بتوانێ دایپۆشێ!
تاودانی نەفەسی گڵاوی ڕاسیزم و ڕشتنی ژەهری قەومچێتیش لەولاوە بۆستێ.
ئەوانە هەمووی هەیە، وەلێ عوقدەی شتێك، شتێكی تر نیە، بەڵكو خراپترین دەركەوتەی هەمان شتە!
وەلێ (عوقدەی كوردایەتی) شتێكی جیا لە كوردایەتی نیە، بەڵكو خراپترین مانەوەیە لە كوردایەتیدا! خراپترین مانەوەیە چونكە فریوی هەیە، تۆ وائەزانیت تێتپەڕاندوەو ئەو وەهمەت لا دروست ئەبێ، لەكاتێكا وانیە!
وەلێ فاشیزمی (دژەكوردایەتی)، هەروەكو (فاشیزمی كوردایەتی) فاشیزمە.
سەیركە.. من‌و تۆ ئەگەر لەبەردەم بتێكا بوەستین و من بەردەوام گوڵی تێگرم و تۆ بەردەوام تفی تێكەیت، هیچ لەوە ناگۆڕێت كە هەردوكمان لە یەك خاڵدا چەقیوین و وەستاوین! لێرەدا من‌و تۆ هاوبتین و هەمان بت ئەپەرستین، تەنیا شێوازی پەرستنەكەمان جیایە!
مەسەلەن ئیسلامی و مولحید، خۆیان لە سەرو ژێری یەكترەوە ئەبینن، بەڵام لەڕاستیدا ئەوان هاوشان و تەنیشتی یەكن، لەبەردەم بتێكی هاوبەشدا.
جا لەم ساڵانەی دواییدا، شتێكی فرە كۆمیدی هەڵتۆقیوە، ئاڕاستەیەك دژی (فاشیزمی كوردایەتی)، كەچی خۆی فاشیزمە!! فاشیزمە بەو مانایەی كە هەموو شتێكی دەرەوەی خۆی ڕەت و ڕەشئەكاتەوە بەوپەڕی ڕقەوە!
پێمان ئەڵێ كوردایەتی كوتلەیەكە لە ڕق و عوقدە، بەڵام خۆشی هەر كوتلەیەكە لە ڕق و عوقدەو لە عەلەمی كوردییەوە تاكو بنێشتی كوردی، حەساسیەت و عوقدەی لەگەڵی هەیەو بەمڕۆژگارە ڕقی بەسەرا ئەبارێنێ!
كوردایەتی خراپە لەبەرەئەوەی كە فاشیزمە، دەی كەواتە ئێمە پێویستمان بە شتێكی ترنیە كە ئەویش فاشیزم بێت!
ئەگەر ئێمە هەر لەناو ڕق و دەمارگیریدابین، ئیتر كوردایەتی و دژەكوردایەتی، هەر بەقەت حەسەن كەچەڵ و كەچەڵ حەسەنی فەرقە.
ئێمە پێوستمان بە مەشروعێكی فەردی و جەماعییە لە دەرەوەی ڕق و دەمارگیری. هەرئەونە.
هەرچی هەیت هەرئەوەبە، بەس تەنیا هەڵكشێ بۆ سەرو ڕق. هەرئەونە.
هەر ئەوە بكە، ئیتر ئەشێ جیاو جیاوازبیت، بەڵام لەناو بازنەی ڕقدا، هەمووی هەر یەك تاس و حەمامە.
هەر ئەوەبكە، ئەوكات پێكەوەژیان ئەگەرێكە كە ڕەنگە ڕووبدات، بەڵام لە وجودی ڕقدا، پێكەوەژیان و یەكترقبوڵكردن، ئەگەری سفرەو ڕوونادا.
ئێستا من كارم بەوەنیە تۆ تەرەفداری كوردایەتیت یان دژەكوردایەتی، من كێشەم لەگەڵ هیچیان نیە، تەنیا كێشەم لەگەڵ ڕقی ناو هەردوكیان هەیە.
تۆش ئەگەر هەمان كێشەی منت هەبێت، پێكەوە ئەتوانین زۆر كێشە حەل بكەین، چونكە زۆرێكی كێشەكان هەر ڕقەو زۆرێكی چارەسەر هەر تێپەڕاندنی ڕقە.
ئێمە نیو قەڕنە باجی عوقدە شەخسییەكانی كۆمەڵێ سیاسیی ئەدەین، ماقوڵ نیە چەن ساڵێكیش باجی عودە شەخسییەكانی كۆمەڵێ نوسەر بدەین!
لەڕاستیدا (كوردایەتی) نە ئەو موقەدەسەیە كە سەدەیەكە دەپەرسترێ و نە ئەو شەیتانەشە كە چەن ساڵێكە بە نەفرەت ئەكرێ!
بەڵكو كوردایەتی وەكو هەر شتێكی تر، بابەتێكە بۆ ئەوەی (عەقڵ) ئیشی لەسەربكاو ئاگایی لێ بەرهەمبهێنێ! نەك ئەوەی (عوقدە) ئیشی لەسەربكاو ڕقێكی تری پێ ئیزافەبكات.
عەقڵ و ئینسانی ئێمە، لە ڕقدا لەكاركەوتووەو خەساركراوە، خستنەوەگەڕی ئینسان و عەقڵی ئێمە، لە تێپەڕاندنی هیچ فكرو بەرەیەكدا نیە، تەنیا لە تێپەڕاندنی ڕقدایە!
ئەملاولای ڕق، ڕاستوچەپی ڕق، شیمال و جنوبی ڕق.. ئەمانە شوێنێكی تر نیە، لەهەركاملایەی بیت هەر لەناو ڕق و لەهەمان شوێندایت!
كە ڕقت بەجێهێشت تەنیا ئەوكاتە لە شوێنێكی تردایت. تەنیا ئەو جێهێشتنەش ڕێگای نەجاتی ئێمەیەو تەنیا ئەو شوێنەش، كەناری ئارامی ڕاستەقینەیە! نەك ئەو كەنارە وەهمییانەی كە لەناو ڕقدا جەمسەرەكانی ڕق بانگەشەی بۆئەكەن.
ئسیلامیی و مولحید، پارتی و دژەپارتی، كوردایەتی و دژەكوردایەتی، دەسەڵات و موعارەزە.. ئەگەر تۆزێ دیقەتت هەبێ، لەم فەیسبوكەدا هیچ بەقەت ئەو جووتانە یەك نین و هیچ بەقەت ئەو دژانە لەیەك ناچن!
ئیتر ئاوایە ڕق.