گۆڕان و یەكێتی؛ هەنگاوێك بۆ پێشەوە، ئاوڕێك بۆ دواوە

23-11-2019 07:20

 

ناوبەناو بەرپرسێكی باڵای یەكێتی، باس لە باشبوونی پەیوەندییەكانیان لەگەڵ گۆڕان دەكات، گوایە هەنگاوی باشی ناوە. من گومانم لەوە نییە دڵسۆزانێك لە نێو سەركردایەتی و قاعیدەی یەكێتی هەن، كە زۆر لە خەمی باشتربوونی پەیوەندیی هەردوولادان و دەیانەوێت ئاستی هاوكاری و تەبایی باشتر و تۆكمەتر بێت، بەڵام بە داخەوە، هێشتا كێشەی زۆر هەن كە دەبێت قسەی جیددی لەسەر بكرێت، چونكە گەر تا ئێستا بە ئاسایی چووبێتە سەر، ئەوا مەرج نییە لە ئایندەشدا هەر وا بێت.

من نامەوێت باس لەو پۆستانە بكەم كە ئیستحقاقی گۆڕانە و هێشتا یەكێتی ئامادە نییە هیچیان ڕادەستی گۆڕان بكات، بە گوێرەی ڕێككەوتنەكان و بەركەوتەی هەڵبژاردنی پارێزگاكان. قسەكردن لەسەر ئەوە هەرچەندە گرنگیشە، چونكە ئاماژەیە بۆ نیەتی باش و ڕووحی شەراكەت و پێكەوە كاركردن و وەلانانی قۆرخكاری، بەڵام لەوانەیە وا تەفسیر بكرێت كە گۆڕان تەنها لە خەمی پۆست و پلەكاندایە، بەڵام كۆمەڵێك خاڵی جەوهەری هەن كە ناكرێت جەختیان لەسەر نەكرێتەوە:

یەكەم: دوای ساڵانێك لە قسەوباس لەسەر دوورخستنەوەی دەستی حیزب لە دەزگاكان و بەتایبەت لە خوێندن و پەروەردە، كەچی وا لە كۆتاییەكانی ساڵی ٢٠١٩ داین، هیچ كات وەك ئێستا حیزب و بەرپرسی حیزبی دەستی نەخستووەتە هەموو جومگەكانی حكوومەتەوە، بە تایبەت كەرتی پەروەردە و خوێندنی باڵا. لە بارەگای حیزبەوە بەڕێوەبەر و بەرپرس و تەنانەت فەڕاش و كارگوزار دادەنرێت و دەگوازرێتەوە! لە بارەگای حیزبەوە بڕیار بە گەمارۆ خستنە سەر كەسانی دڵسۆز و خەمخۆر و خاوەن بڕوانامە و شایستەی كارگێڕی دەدرێت تەنها لەبەر ئەوەی گۆڕانن یا حیزبی ترن لە دەرەوەی یەكێتی! ئاخر بە چ مەنتقێكی كارگێڕی، كەسانێك كە هەموو مەرجە زانستی و شایستەییەكانیان هەیە، بەڵام تەنها لەبەر ئەوەی بێلایەنن، سەربەخۆن، حیزبی ترن، یان بە دڵی مەڵبەند و دەزگای حیزبی نین، فەرامۆش و پەراوێز دەخرێن؟!

دوەم: دەزگای ئاسایش كە هەمو هەوڵێكی دڵسۆزانەو و خەمخۆرانەیان بۆ پاراستنی ئاسایشی ناوچەكەو گیانی هاوڵاتیان جێگای ستایش و دەستخۆشیە، بەڵام هێشتا سەد دەر سەد لە سەرەوە تا خوارەوە سەر بەحزبن و مەرجەعیەتیان هەیئاتی حزبیە. بەرپرسە باڵاكانیان ئەندامی سەركردایەتین و كادرەكانی تریشی لەلایەن حزبەوە دیاری ئەكرێن و بەهیچ شێوەیەك رێگە بەهیچ توانایەكی تر، گەنجی سەربەخۆ یا سەر بەلایەنی تر، نادرێت گەر وەلائی موتڵەقی بۆ حزب نەبێت.

سێیەم: هێزی پیشمەرگە، سەرباری ستایشی زۆرمان بۆ فیداكاری و قارەمانێتییان دژ بە داعش و مێژووی دێرینیان، بەڵام كەس و تەنانەت خودی بەرپرسە باڵاكانی هەرێمیش ناتوانن نكووڵی لەو ڕاستییە بكەن كە ئەو هێزە سەرتاپا حیزبییە و لەلایەن سەركردایەتی حیزبەوە ئاراستە دەكرێت، یان ئەندامێكی مەكتەبی سیاسی یان سەركردایەتی، سەرپەرشتییان دەكات.

بە داخەوە كە لەم دوو دەزگا گرنگەدا، هیچ دەرفەتێك بۆ كو ڕ و كچی نیشتمان نەبێت دابمەزرێن، گەر بە مەرجی لایەنگری و پشتگیریی حیزبی نەبێت.

چوارەم: كۆمەڵێك بوار و كەرتی تر هەن كە دەكرێ تەنها بە كورتی ئاماژەیان پێ بدەم، مەترسیدارترینیان دەستێوەردانە لە دەسەڵاتی دادوەری، قۆرخكردنی بازاڕ و كەرتی ئابووری و سنوورەكان و دزەكردنە لە مەرزەكانەوە و كۆمپانیای ئەمنی و... هتد. پێویست بە وتنیش ناكات كە ئەوەی لێرە ڕوو دەدات، ڕێك كۆپییەكی ناوچەی ژێر دەسەڵاتی پارتییە و لەوێش هەم ئاسایش و هەم پیشمەرگە و هەم بوارەكانی تریش، سەرتاپا حیزبین و لەژێر هەیمەنەی حیزبدان.

ئەوەی مەبەستمە بیڵێم، بەم عەقڵیەت و شێوازی كارەوە، چۆن ڕووبەڕووی گۆڕانكارییەكان دەبینەوە؟ چۆن دەتوانین وڵاتی هاووڵاتی و دەزگای سەربەخۆی دەوڵەتداری كە موڵكی حكوومەت بێت نەك حیزب، دروست بكەین؟ چۆن دەتوانین پەیوەندیی تەندروست لە نێوان هێزە چەكدار و هێزە بێچەكەكان بنیات بنێین؟ چۆن دەتوانین پێكەوە هەنگاو بەرەو چاكسازی و هەرێمێكی ئاوەدان و مەدەنی بنێین؟

بەهێزكردن و پتەوكردنی پەیوەندیی گۆڕان و یەكێتی، داواكارییەكی بەردەوامی خەمخۆر و دڵسۆزانی هەردوولایە و پێم وا نییە جگە لە بوونی ئەو پەیوەندییە تەندروستە، هیچ بەدیلێكی ترمان هەبێت، تەنها ئەوەش لە خزمەتی خەڵك و خاك و ئایندەی میللـەتەكە و هەرێم و ئەم دەڤەرەیشە.

بەڵام كێن ئەوانەی ئامادەن بە ڕووح و نەفەسێكی تازە و دڵسۆزانە و بەرپرسانەوە، دوور لە گرێكانی ڕابردوو، دەستیان دێنن و دەبنە شەریك لەو پرۆسەیەدا؟ هەرێم بە گشتی و ئەم دەڤەری سلێمانییەش بە تایبەتی، پێویستیان بە هەنگاوی خێرایە، عەقڵیەتی كۆنی قۆرخكاری حیزبی، جگە لەوەی نەزۆك و بێئاكامە، ئیتر وا وردە وردە خەریكە شەپۆلە خێراكان ڕاپێچی دەكات. نەوە تازەكان، ژیان و سەقامگیرییان دەوێت، ئەوەش بەو عەقڵیەتە ناكرێت. ئیتر ئەبێ تێبگەین!