سێ ساڵ دوای نەوشیروان مستەفا؛ نماو چیا بە نیازی چین؟

18-05-2020 05:34

نووسینی: سوركێو محەمەد

سێ ساڵ بەسەر كۆچی دوایی نەوشیروان مستەفا تێدەپەڕێت، ئەو كە سەرەتای گۆڕانكاریی‌و قۆناغێكی نوێی خەباتی سیاسی بە پڕۆژەیەكی میدیایی دەست پێكرد، ئێستا كوڕەكانی چوونەتەوە چوارگۆشەی یەكەم‌و سەرقاڵی پڕۆژەیەكی نوێ‌و كەناڵێكی ئاسمانین.

نماو چیا میراتی ماددی‌و لەوەش گرنگتر میراتێكی گەورەی مەعنەوی‌و ڕەمزیی نەوشیروان مستەفایان بۆ ماوەتەوە، لەبەرئەوە هەر هەنگاو و كارێكیان چاوی دەرەوەی خۆیانی لەسەرە، دەبێت بۆ ئەوان، كوڕی نەوشیروان مستەفا بوون ئەرك بێت لەسەر شانیان بۆ جیاوازیی‌و كاری باش هەر وەك ئەوەی لە چەمكی "گۆڕان‌و گۆڕانكاریی" چاوەڕێ دەكرێ، نەك وەكو مافێك لێی بڕوانن‌و لەسەر ئەو میراتە بژین.

هێشتا نەوشیروان مستەفا لە ژیاندا بوو میدیای گۆڕان كە كاریگەرترینیان كەی ئێن ئێن بوو، گیرۆدەی چەندین دەردی كوشندە بوو و چارەسەر نەكران، تا گەیشتە كەوتنی میدیاكەو سەری لە داخستنەوە دەرچوو.

ئێستا كە نماو چیا دەیانەوێت كەناڵێكی نوێ بكەنەوە، لەگەڵ زۆریی میدیا لە ڕووی ژمارەوە، هێشتا بۆشاییەك ماوە میدیایەكی دەوێ پڕی بكاتەوە، بەڵام پڕكردنەوەی هەوڵی بێوچان‌و لێهاتوویی‌و تێگەیشتن لە كاری میدیایی دەوێ، بەتایبەت لە ڕووی سەرچاوەی مرۆییەوە كە پێناچێت لای نماو چیا هێشتا وەك پێویست گرنگییەكەی هەستی پێ كرابێت!.

ئەوان پشتیان بە تەكنەلۆجیای پێشكەوتووی سەردەم بەستووە كە بە پارە دابین دەكرێت، بەڵام شتێكی گرنگتر هەیە كە مەرج نییە تەنها پارە بتوانێت بیكات، ئەویش ستافی كارو ڕۆژنامەنووسی لێهاتووە بۆ كاری جیاوازو پیشەیی بە كوالێتیی بەرزی ڕۆژنامەوانی، تا وەرگر ڕازیی بكەن‌و بەلای خۆیاندا كێشیان بكەن لە بازاڕێكی شێواوی پڕ لە كێبڕكێ دا، بۆئەوەش هاوشان لەگەڵ سەرقاڵیی بە بینای دەزگاكەو ئامێرو تەكنەلۆجیا، دەبێت ڕۆژنامەنووس ئامادە بكرێن بۆ دەستپێكردنی كارێكی جیاواز.

لە پڕۆژە نوێیەكانی نماو چیادا (ڕۆژنامە، گۆڤار‌و ماڵپەڕ) بە ڕوونی ئەوە دەبینرێت كە سەرباری هەبوونی پارە، بەڵام نەیانتوانیوە ئەركەكە بە ستافی باش‌و كارای ڕۆژنامەوانی بسپێرن‌و جیاوازیی خۆیان‌و كارەكانیان پیشان بدەن.

هەرچەندە لە ساڵەكانی كۆتایی تەمەنیداو كاتێك نەوشیروان مستەفا خۆیشی ئامادەیی هەبوو، كێشەكانی میدیای گۆڕان‌و خراپیی كارە ڕۆژنامەوانییەكانی زیاتر تەشەنەیان دەسەند‌و چارەسەر نەدەكران! بەڵام نەوشیروان مستەفا وەڵامی جیاوازی بۆ ئامانجی میدیاكەی هەبوو كە پێدەچێت زۆر جیاوازبێت لەو ئامانجەی ئێستا كوڕەكانی بۆ میدیاكانیان دەیانەوێت.

تەكنەلۆجیا هەمیشە لە دوای بەڕێوەبردنەوە دێت، بەڕێوەبردنیش بە بەردەوامیی كێشەی میدیاكانی گۆڕان بووە بەتایبەت لە چەند ساڵی كۆتاییدا، توانای هەڵبژاردنی كەسی شیاو بۆ بەدەستهێنانی ئامانج، جەوهەری سەركەوتنی هەر پڕۆژەیەكە، زۆربەی كات كەسێكی لاواز یاخود كەم توانا‌و دانەنانی لە شوێنی شیاوی خۆی، دەبێتەهۆی شكستهێنانی پڕۆژەیەكی گەورە.

دەرخستنی توانای ستافی كار بەتایبەت لە دامەزراوەی میدیاییدا، لێهاتوویی بەڕێوەبەری دەوێت، بەبێ ئەوە ناتوانرێت كەسی شیاو لە شوێنی شیاو دابنرێت.

بەڕێوەبردنی دەزگای میدیایی جیاوازە لە بەڕێوەبردنی هەر دەزگایەكی دیكە، لە ناو میدیاشدا تەلەفزیۆن جیاوازە لەوانی دیكەو لێوەشاوەیی زیاتری دەوێ، مامەڵە كردنە لەگەڵ چركەو خولەك! چی پەخش دەكەیت؟ چۆن ڕووماڵی هەواڵ‌و زانیاریی لە هەرێم‌و عێراق‌و پارچەكانی دیكەی كوردستان‌و وڵاتانی ناوچەكەو جیهان دەكەیت؟ وەڵامی ئەم پرسیارانە سادەو ئاسان نین بۆ دەزگایەك بیەوێت كاری جیاواز بكات، ئەوەش چەندە پشت بە تەكنەلۆجیا دەبەستێت زۆر لەوە زیاتر ستافی كارو سەرچاوە مرۆییەكە نەخشەی سەركەوتنی دەكێشن.

نماو چیا دەبێت ئەوەیان لا ڕوون بێت، ئەگەر میدیا نوێیەكەیان بە كەوتوویی لەدایك ببێ یاخود پاش ماوەیەكی كەم بكەوێت، هەستانەوەی زۆر زەحمەت دەبێت لەم بازاڕەی ئێستادا بەتایبەت كە لە دوای دروست بوونی كەناڵی ڕووداو ئەركەكە قورستر بووەو جیاواز بوون‌و باشتر بوون، لێوەشاوەیی زیاتری دەوێت، بەڵام كارێكیش نییە نەكرێت!.