كەناڵی ئێنئاڕتیی دەڵێت: "لە ئێستادا دوو ئاڕاستە تا رادەیەك لەسەر پرسی ریفراندۆم ڕوون بوونەتەوە؛ ئاراستەی یەكەم بارزانیی سەركردایەتیی دەكات و ئاراستەی دووەم، شاسوار عەبدولواحید سەركردایەتیی، دەكات."
ئێمە دەمانەوێت بۆ كەناڵی ئێنئاڕتیی و وڵاتییانی كوردستان و رەوەندی كوردیی لە هەندەران، روون بكەینەوە كە ئاراستەی دەوڵەتی كوردیی و ریفراندۆم كە بارزانیی سەركردایەتیی دەكات، لە یەكەم رۆژەوە، ئێمە [ئێمە، هەركەسێكە لە رابردودا هەڵگری ئەو دونیابینییە بوبێت كە باسیدەكەین] هەر لەسەردەمی بانگەشەكانی بارزانییەوە، چەند ساڵێك لەمەوپێش بە گوتاری جدیی، كۆڕ و سێمینار بە زمانەكانی كوردیی و عەرەبیی و ئینگلیزیی، لە لایەن زۆركەسەوە، لەبارەیەوە نووسراوە و قسەكراوە. لەپاڵ دژایەتیكردنیشی، بە ئارگیومێنت و نووسینی جدیی، گوتارێك بەرهەمهێنراوە كە دژ بە گوتارەكەی بارزانیی، هاتوهاواری دەوڵەت و ریفراندۆمەكەی ئەو بووە. ئێمە خوێندنەوەی فرە مەوداو فرە رەهەندمان بۆ دەوڵەت و ریفراندۆم كردووە و بەبەردەوامییش دەیكەین.چەندیین وتارمان بە كوردیی، ئینگلیزیی و عەرەبیی لەسەر ناسیۆنالیزمی كوردیی، دەوڵەت و ریفراندۆمەكەی بارزانیی نووسیوە. شەونخونیی زۆرمان كردووە تا بتوانین بۆ وڵاتییانی كوردستان ئەو بانگەشانەی دەوڵەت و ریفراندۆم روونبكەینەوە، بێئەوەی هیچ بەرژەوەندییەكی سیاسیی، شەخصیی و مادییمان هەبووبێت و هەبێت.
ئێمە خۆمان بە خۆشحاڵ دەزانین كە توانیومانە كاریگەریی لەسەر زۆر كەس دروستبكەین، بەتایبەتیی گەنجانی كوردستان و هەندەران و ئەوانیش بێنە ناو ئەو ئاراستە رۆشنبیریی و سیاسییە ئۆپۆزسیۆنەی كە ئێستا دەیان هەزار كەس، دژ بە بانگەشە فووتێكراوەكانی دەوڵەتی نەتەوەیی(كوردیی) ریفراندۆم و كوردایەتیی، ئەژمارد دەكرێن. بە هیچ شێوازێك راست نییە هیچ كەس، گرووپ و هێزێك بانگەشەی سەركردایەتییكردنی ئەو ئاراستە فیكریی سیاسیی و ئۆپۆزسیۆنییە بكات. ئەو ئاراستەیە بە هیچ شێوازێك سەركردەی نییە و پێویستیشی بە سەركردە و سەركردایەتیی نییە. راستە ئەگەر چەند حیزبێك یان چەند نوخبەیەكی كاریگەر، پشتی كامپی "نا" بگرن، كاریگەرتر دەبێت و ئەم هەموو ریتۆریكە سیاسیی و ئایدیۆلۆژییەی كوردایەتیی و ناسیۆنالیزمە نەژادییەكەی، ئەو كاریگەرییەی نامێنێت، بەڵام لە ترسی تەخوین و بەهۆی پۆپۆلیزمی حیزبیی، سیاسیی و شەخصییەوە، ئەمە ناكەن، بەڵكو هەر دەیهێنن و دەیجەڕێنن و بۆڵەبۆڵ دەكەن. هەركەسێكیش، دەیەوێ بیزنس و سیاسەت، تیجاڕەت و كامپی نا بە ریفراندۆم تێكەڵ بكات، ئەوە بەرژەوەندیی گشتیی بۆ بەرژەوەندیی تایبەتیی خۆی، بەكار دەهێنیت.
ئێمە كاتێك بە جورئەتەوە توانیمان كەمپەینی "نا" بۆ دەوڵەتی كوردیی و ریفراندۆم رابگەیەنین، تەنیا چەند رۆژێكی كەم بو رۆژی دەنگدان بۆ ریفراندۆم راگەیەنرابوو، زۆر كەس لەترسی تەخوین، فۆبیای نۆستاڵژیی لە ناسیۆنالیزم و لە دەوڵەتی كوردیی هەر نەیاندەوێرا سەیری راگەیاندنەكە بكەن. زۆركەس لەوە دەترسان كە بكرێن بە خائین و مێژوو وەكو نەیاری سەربەخۆیی كوردستان سەیریان بكات، بەڵام ئێمە، چونكە خەباتێكی چەند ساڵەمان هەیە دژ بەو ئاراستەیە، لەگەڵ دەیان نووسەری گەنج، سیاسیی و چالاكوانی تردا، ئاسان توانیمان وەكو یەكەم گرووپ بەرەی نا بۆ ریفراندۆم و دەوڵەتی سەربەخۆ(بە پارادایمەكەی بارزانیی و توركیا) رابگەیەنین كە هەزاران كەس پشتیوانیی كردین. ئێنئاڕتیی ئەوكات یەكێك بو لەو دەسگایانەی كە هیچ گرنگییەكی ئەوتۆی بە كەمپینەكەی ئێمە نەدا و هەر نەیانوێرا بڵاویشی بكەنەوە. پێدەچوو خۆیان بۆ ئەوە ئامادەكردبێت كە خاوەنی ئێنئاڕتیی، كەمپەینێكی نا دروستبكات و لەسەر ئەو تاپۆی بكەن.
بەشێك لەوانەی دژایەتیی ریفراندۆمەكەی مەسعود بارزانیی دەكەن، بۆ ئەوەی دەگێڕنەوە كە بارزانیی و پارتیی ریفراندۆمیان كردۆتە موڵكی خۆیان، لە راستییدا سەرجەم پرۆسێسی ریفراندۆم و سەربەخۆیی بەم دۆخە تاڵانیی و چەتەگەرییەوە، بەم هەموو نادادیی و ستەمكارییەوە نەك هەر ناعەقڵانییە بەڵكو زۆر ناواقیعیی و زۆر هەڵەیشە. هاوكات، بە هیچ شێوەیەك نابێت هیچ كەسێك بەرەی "نا"ی ریفراندۆم بكاتە موڵكی خۆی تا بتوانرێت خاوەندارییەتی ئەم بەرەیە بۆ هەمیشە بە موڵكی ئەو دەیان هەزار گەنج و خەڵكە ناڕازییەی گەل بمێنێتەوە كە سەرمەشقی وتنەوەی"نا" بوون بۆ ئەم مەهزەلەیەی ریفراندۆم و بۆ ئەم فابریكەیەی كە سەربەخۆیی كوردستان بە سپۆنسەریی توركیای بەسەردا دابڕاوە.