بنەمای پەرەگراف متمانەیە

لەماڵە خامۆشەكەی پێشمەرگەیەكەوە
سامان نیوەی جەستەی بە نیشتیمان بەخشی و كەسیش لێی ناپرسێ

لەماڵە خامۆشەكەی پێشمەرگەیەكەوە
سامان لە ماڵەكەی خۆی لە گەڕەكی حەسار لە هەولێر. وێنە؛ پەرەگراف.

 

پەرەگراف – فەرمان حەمەدەمین

نەشتەرگەرییەكەی سامان سدیق زۆر قورس بوو، نەك لە پێشمەرگایەتی دورخستەوە، بەڵكو نیوەی جەستەیی و زمانیشی لەكارخست، بەبێ ئەوەی كەسێك بۆ ستایشی قوربانییەكەی لە دەرگای ماڵەكەی بدات.


چوار ساڵ لەمەوبەر و لە بەرەكانی شەڕی دژ بە داعشەوە، ئەو پێشمەرگەیە، بە جەستەیەكی خوێناوییەوە گەڕایەوە هەولێر، برینێكی گەورە لە سەریی و زیاتر لە 50 ساچمە بە لەشیەوە بوو.


بەیانی 31ی كانونی یەكەمی 2014، لە میحوەری گوێڕ ئامادەكارییان بۆ شەڕی گوندی سوڵتان عەبدوڵا دەكرد، تۆپێكی داعش ئۆتۆمبێلەكەی كردنە ئامانج، پێشمەرگەیەك شەهید و حەوتی تر برینداربون، برینەكەی سامان لەهەموان سەختتر بوو.


دەستبەجێ دەگەیەنرێتە نەخۆشخانەی ڕۆژئاوای هەولێر، نەشتەرگەرییەكی سەركەوتوی هەڵگرتنی كەلـلەسەری بۆ دەكرێت بۆ دەرهێنانی ساچمەكان لە سەریدا، بەهۆیەوە 21 ڕۆژ دەكەوێتە بێ هۆشییەوە.


بەئاگاهاتنەوەی لەو بێ هۆشییە، سەرەتای ژیانێكی پڕ لە مەینەتی بوو بۆ سامان، دوچاری ئیفلیجی بوو، نیوەی جەستە و زمانیشی لە قسە كەوت، بۆیە لەوكاتەوە نەخۆشێكی بەردەوامی نێو ماڵەكەیەتی.


بەرلەوەی ببێتە پێشمەرگە وەستای دروستكردنی دیوار بووە، لە 2004وە كە بۆتە پێشمەرگە هەر هەمان ئیشی دەكرد، بەڵام چوار ساڵە زۆرترین كات لەماڵەوەیە، سامان بە زمانی ئاماژە وای وت.


پەیامنێری پەرەگراف، بۆ ئەوەی چاوی بە سامان بكەوێت چوە گوندی حەسارۆك، كە ئێستا بۆتە گەڕەكێكی شاری هەولێر و دەكەوێتە سەر شەقامی 120 مەتری لە ڕێگای كۆیە.


سامان سدیق، 34 ساڵ، لە سوپای شەقڵاوەوە دەستیپێكرد، بو بە پاسەوانی تایبەتی مەریوان كەریم ئاغالە فەرماندەی پێشوی كاوەو دواتر چووەتە فەرماندەیی هەولێر، تا كاتی برینداربونی.


سەرباری هەموو ڕەخنەكانی، ئەو هێشتا بیری پێشمەرگایەتی دەكات و دەڵێت، جگە لەوەی پەشیمان نیە، هەر چاكببێتەوە دەگەڕێتەوە ئەركەكەی تا خزمەتی كوردستان بكات.

 

سامان لە كاتی وەرگرتنی چارەسەر لە نەخۆشخانە.


ئازارەكانی ژیانی سامان، هەمان مەینەتیی هەزاران پێشمەرگەی تری برینداری شەڕی دژ بە ڕێكخراوی داعشە لە حوزەیرانی 2014وە تائێستا، ئەوان زووزوو ناڕەزاییەكانیان دەگەیەننە گوێی لێپرسراوان و نیشانی خەڵكی دەدەن، بەڵام تەنیا بەڵێنیان پێدەدرێت و دەرەنجامەكەی نابینن.


جەبار یاوەر، ئەمینداری گشتی وەزارەتی پێشمەرگە بۆ پەرەگراف ئاشكرایكرد لە شەڕی داعشدا، هەزار و 72 پێشمەرگە شەهید بون، لەگەڵ 10 هەزار و 726 بریندار.


لە كۆی ژمارەی بریندارەكان، بەوتەی یاوەر، تەنیا 700 كەسیان ڕەوانەی وڵاتانی تر كراون بۆ چارەسەر، ئەوانیش بەخەرجیی وەزارەت یان داواكاریی خودی چەند وڵاتێك وەكو هاوكاریی.


ئەوەش لە كاتێكدایە زۆربەی بریندارەكانی شەڕ، پێویستیان بە چارەسەری بەردەوام‌و بەشێكیشیان بە نەشتەرگەریی هەیە لە دەرەوەی عێراق.


سامان بە مانگێك دوای نەشتەرگەرییەكەی سەری، لە نەخۆشخانەیەكی هەولێر نەشتەرگەرییەكی تر بۆ چاوی ڕاستی كرا، كە خەریك بوو لە بینین دەكەوت بەهۆی كاریگەریی برینەكانیەوە، هەرچەندە تێچوی نەشتەرگەرییەكەی بۆ خەرجكراوەتەوە، بەڵام هەر ئەوەندە بووەو تەواو، لەوكاتەوە هەر خۆیەتی و كەس لێی ناپرسێ.


چارەسەرە سروشتییەكان، وردەوردە ئیفلیجیی لە جەستەی سامان كەمدەكەنەوە، بەڵام هێستا دەناڵێنێت، زۆرجار توشی گەشكە دەبێت و پێویستی بە جۆرە حەبێكە، كە مانگانە دەیان هەزار دینار دەكەوێت.

"لەوكاتەی لە خەستەخانە گەڕاوەتەوە، وەزارەتی پێشمەرگە لە تەندروستی نەپرسیوەتەوە و یارمەتیمان نادات، بۆیە بە زەحمەت دەتوانین خەرجیەكانمان دابینبكەین" گەزەنگ ئیبراهیم، هاوسەری سامان وای وت.

 

سامان لە سەنگەری بەرگریی لە دژی داعش.


موچەی سامان 556 هەزار دینارە، لەپاڵ كڕینی دەرمانە مانگانەكانیدا ئەوەی وایكردوە تاڕادەیەك بەشی خەرجیەكانیان بكات، ئەوەیە كرێچی نیەو لە حەسارۆك، كە دانیشتوانەی بەگشتی هەژار و كەمدەرامەتن، لە خانویەكی 100 مەتری دوو نهۆمیدا دەژی.


گەزەنگ بۆ پەرەگراف وتی"یەك مانگ موچەكەی نەیەت گوزەرانمان تەواو تێكدەچێت"، ئەو باسی لە كاریگەری زۆری برینداریی هاوسەرەكەی كرد لەسەر ژیانیان بەوپێیەی پێشتر دەیتوانی ئیش بكات، بۆیە زۆرجار نۆرینگەكەش پارەی پشكنینی لێوەرناگرێت.


سامان ساڵی 2005 ژیانی هاوسەرگیری پێكهێناوە، باوكی دوو كوڕ و كچێكە، ئەنەس 13 ساڵ، ئەحمەد 11 ساڵ و ناس تەمەنی هەشت ساڵە، ئەو كە هیچ خوێندەوارییەكی نیە، مۆبایلی زیرەكی پێیەو فەیسبوك‌و ڤایبەریشی داناوە، كوڕە گەورەكەی پۆستەكانی بۆ دەخوێنێتەوە و كۆمێنتی بۆ دەنوسێت.


ڕێی دوری ڕۆژانەی سامان، گەڕەك و باخچەیەكی بچوكی بەردەم خانوەكەیەتی، چونكە ناتوانێت بە تەنیا بچێتە بازاڕ و شوێنی تر، لەبەر سڕبونی نیوەی جەستەیی و ناشتوانێت هێشتا وەكو پێویست قسەبكات.


لە خێزانەكەی سامان سێ كەسی تر پێشمەرگەیە، كەمال سدیق، پلەی موقەدەمە و یەكێكە لە براكانی، ئەو كە یاوەريی پەیامنێری پەرەگرافی دەكرد بۆ ماڵی سامان لە حەسارۆك لە نزیكەوە، چاودێر و بینەری بەشێكی زۆر لە مەینەتیەكانی براكەی بووە لەوكاتەوەی برینداربووە.


زۆرینەی بریندارانی شەڕی داعش، بەهۆی نەبونی چارەسەری پێویست و زوو بەدەمەوەنەهاتنی داواكارییەكانیان، توشی جۆرێك لە خراپیی باری دەرونی و نیگەرانیی بون.


لە وەزارەتی پێشمەرگە، بەشێكی پزیشكی هەیە بۆ قبوڵكردن یان ڕەتكردنەوەی مامەڵەی هەر بریندارێكی شەڕ، لەوێ بڕیار لە خەرجكردنەوەی تێچوی نەشتەرگەریی و چارەسەرەكان دەدرێت.

 

سامان(دانیشتووەكەیە) لەگەڵ هاوڕێكانی لە سەنگەری بەرگریی لە دژی داعش.


پزیشكێكی ئەو بەشە، كە بەهۆی نەبونی مۆڵەتی قسەكردنەوە بۆ ڕاگەیاندن، داوایكرد ناوی نەهێنرێت بۆ پەرەگراف وتی"پاش ڕەزامەندی ئێمە ئینجا ڕەنگە چوار مانگ زیاتریش بخایەنێت تا پارەكە بۆ نەخۆشەكە خەرج دەكرێتەوە بەو مەرجەی بڕەكەی لە 750 هەزار زیاتر نەبێت".


پێشیوایە پێویستە نەخۆشخانەیەكی سەربازیی هەبێت، تا هەموان ناچارنەبن بچنە نەخۆشخانەی ئەهلی و تایبەت، لەوەشدا حكومەتی بە كەمتەرخەم زانی.


ئەو پزیشكە دانی بە كەمتەرخەمییەكاندا نا و ئاماژەی بەوەدا سەردانی هیچ پێشمەرگەیەكی بریندار نەكراوە دوای نەشتەرگەریی و لە پێداویستیەكانیان نەكۆڵراوەتەوە.


هەر ئەو پشتگوێخستنەی وەزارەتی پێشمەرگە بەوتەی پزیشكەكە، دنیایەكی لە خەم و ناجێگیری دەرونیی بۆ بریندارانی شەڕی داعش دروستكردووە، سامان سدیق نمونەیەكە لەوان.


گەزەنگ-ی هاوسەری دەڵێت"باری دەرونی زۆر خراپ تێكچووە، ئازاری زۆر دەچێژێت و ئێمەش بەهۆیەوە ئازار دەچێژین"، ئەو خێزانە ئەوەی لەدەستیان هات و پێیانكرا بۆ چارەسەری بریندارییەكە كردیان، ئەوەی ماوەتەوە لای ئەوان نیە، تا ژیانێكی شایستەیان بە قوربانییدانەكەی سامان بۆ دابینبكرێت.

لە ژێرزەمینێكەوە بۆ لوتكەی سەركەوتن؛ بەسەرهاتی ئەو شەش منداڵەی ‌كیمیاویی نەیخستن‌

خوشكێك و چوار برا؛ گەورەكەیان تەمەنی دوانزە ساڵەو پێكەوە بەتولەڕێی كارەساتێكی پڕ لەمەرگدا تێدەپەڕن، دوور لەدایك و باوك بەرگەی مەینەتییەكان دەگرن.

تەڵەی تۆڕە كۆمەڵایەتییەكان؛ چیرۆكی ئەو كچانەی دەبنە قوربانيی نامەی خۆشەویستی

ساكار لەگەڵ دایكی لەناو دادگای سلێمانی دانیشتبوو، خەمبار و دوودڵ، سەری داخستبوو و یاری بە پەنجەكانی دەستی دەكرد، كاتێك..

دیوە شاراوەكانی مسیار لە كوردستان
چیرۆكی ئەو هاوسەرگیرییەی بە نهێنی ئەنجامدەدرێت

هیوا خێزاندارە، هەفتانە تەنیا جارێك یان دووجار دەچێتە لای هاوسەرەكەی، ئەویش زیاتر بە رۆژ و بە شێوەیەكی نهێنی، بۆ ئەوەی هاوسەری یەكەمی پێی نەزانێت.

كچانی پەنابەر ماندون بەدەست گێچەڵ و تانەی خەڵكەوە

سوعاد كەمترین كات بێ ئیش بووە، كاتێك خراپیی بژێوی خێزانەكەی بینی دەستبەجێ دەستی دایە كاركردن، بێئاگا لەوەی ئەو ئازایەتییە ‌لە پەناهەندەییدا ڕوبەڕوی چەندین كێشەی دەكاتەوە.

لەماڵە خامۆشەكەی پێشمەرگەیەكەوە

2018-12-30 18:04:44

 

پەرەگراف – فەرمان حەمەدەمین

نەشتەرگەرییەكەی سامان سدیق زۆر قورس بوو، نەك لە پێشمەرگایەتی دورخستەوە، بەڵكو نیوەی جەستەیی و زمانیشی لەكارخست، بەبێ ئەوەی كەسێك بۆ ستایشی قوربانییەكەی لە دەرگای ماڵەكەی بدات.


چوار ساڵ لەمەوبەر و لە بەرەكانی شەڕی دژ بە داعشەوە، ئەو پێشمەرگەیە، بە جەستەیەكی خوێناوییەوە گەڕایەوە هەولێر، برینێكی گەورە لە سەریی و زیاتر لە 50 ساچمە بە لەشیەوە بوو.


بەیانی 31ی كانونی یەكەمی 2014، لە میحوەری گوێڕ ئامادەكارییان بۆ شەڕی گوندی سوڵتان عەبدوڵا دەكرد، تۆپێكی داعش ئۆتۆمبێلەكەی كردنە ئامانج، پێشمەرگەیەك شەهید و حەوتی تر برینداربون، برینەكەی سامان لەهەموان سەختتر بوو.


دەستبەجێ دەگەیەنرێتە نەخۆشخانەی ڕۆژئاوای هەولێر، نەشتەرگەرییەكی سەركەوتوی هەڵگرتنی كەلـلەسەری بۆ دەكرێت بۆ دەرهێنانی ساچمەكان لە سەریدا، بەهۆیەوە 21 ڕۆژ دەكەوێتە بێ هۆشییەوە.


بەئاگاهاتنەوەی لەو بێ هۆشییە، سەرەتای ژیانێكی پڕ لە مەینەتی بوو بۆ سامان، دوچاری ئیفلیجی بوو، نیوەی جەستە و زمانیشی لە قسە كەوت، بۆیە لەوكاتەوە نەخۆشێكی بەردەوامی نێو ماڵەكەیەتی.


بەرلەوەی ببێتە پێشمەرگە وەستای دروستكردنی دیوار بووە، لە 2004وە كە بۆتە پێشمەرگە هەر هەمان ئیشی دەكرد، بەڵام چوار ساڵە زۆرترین كات لەماڵەوەیە، سامان بە زمانی ئاماژە وای وت.


پەیامنێری پەرەگراف، بۆ ئەوەی چاوی بە سامان بكەوێت چوە گوندی حەسارۆك، كە ئێستا بۆتە گەڕەكێكی شاری هەولێر و دەكەوێتە سەر شەقامی 120 مەتری لە ڕێگای كۆیە.


سامان سدیق، 34 ساڵ، لە سوپای شەقڵاوەوە دەستیپێكرد، بو بە پاسەوانی تایبەتی مەریوان كەریم ئاغالە فەرماندەی پێشوی كاوەو دواتر چووەتە فەرماندەیی هەولێر، تا كاتی برینداربونی.


سەرباری هەموو ڕەخنەكانی، ئەو هێشتا بیری پێشمەرگایەتی دەكات و دەڵێت، جگە لەوەی پەشیمان نیە، هەر چاكببێتەوە دەگەڕێتەوە ئەركەكەی تا خزمەتی كوردستان بكات.

 

سامان لە كاتی وەرگرتنی چارەسەر لە نەخۆشخانە.


ئازارەكانی ژیانی سامان، هەمان مەینەتیی هەزاران پێشمەرگەی تری برینداری شەڕی دژ بە ڕێكخراوی داعشە لە حوزەیرانی 2014وە تائێستا، ئەوان زووزوو ناڕەزاییەكانیان دەگەیەننە گوێی لێپرسراوان و نیشانی خەڵكی دەدەن، بەڵام تەنیا بەڵێنیان پێدەدرێت و دەرەنجامەكەی نابینن.


جەبار یاوەر، ئەمینداری گشتی وەزارەتی پێشمەرگە بۆ پەرەگراف ئاشكرایكرد لە شەڕی داعشدا، هەزار و 72 پێشمەرگە شەهید بون، لەگەڵ 10 هەزار و 726 بریندار.


لە كۆی ژمارەی بریندارەكان، بەوتەی یاوەر، تەنیا 700 كەسیان ڕەوانەی وڵاتانی تر كراون بۆ چارەسەر، ئەوانیش بەخەرجیی وەزارەت یان داواكاریی خودی چەند وڵاتێك وەكو هاوكاریی.


ئەوەش لە كاتێكدایە زۆربەی بریندارەكانی شەڕ، پێویستیان بە چارەسەری بەردەوام‌و بەشێكیشیان بە نەشتەرگەریی هەیە لە دەرەوەی عێراق.


سامان بە مانگێك دوای نەشتەرگەرییەكەی سەری، لە نەخۆشخانەیەكی هەولێر نەشتەرگەرییەكی تر بۆ چاوی ڕاستی كرا، كە خەریك بوو لە بینین دەكەوت بەهۆی كاریگەریی برینەكانیەوە، هەرچەندە تێچوی نەشتەرگەرییەكەی بۆ خەرجكراوەتەوە، بەڵام هەر ئەوەندە بووەو تەواو، لەوكاتەوە هەر خۆیەتی و كەس لێی ناپرسێ.


چارەسەرە سروشتییەكان، وردەوردە ئیفلیجیی لە جەستەی سامان كەمدەكەنەوە، بەڵام هێستا دەناڵێنێت، زۆرجار توشی گەشكە دەبێت و پێویستی بە جۆرە حەبێكە، كە مانگانە دەیان هەزار دینار دەكەوێت.

"لەوكاتەی لە خەستەخانە گەڕاوەتەوە، وەزارەتی پێشمەرگە لە تەندروستی نەپرسیوەتەوە و یارمەتیمان نادات، بۆیە بە زەحمەت دەتوانین خەرجیەكانمان دابینبكەین" گەزەنگ ئیبراهیم، هاوسەری سامان وای وت.

 

سامان لە سەنگەری بەرگریی لە دژی داعش.


موچەی سامان 556 هەزار دینارە، لەپاڵ كڕینی دەرمانە مانگانەكانیدا ئەوەی وایكردوە تاڕادەیەك بەشی خەرجیەكانیان بكات، ئەوەیە كرێچی نیەو لە حەسارۆك، كە دانیشتوانەی بەگشتی هەژار و كەمدەرامەتن، لە خانویەكی 100 مەتری دوو نهۆمیدا دەژی.


گەزەنگ بۆ پەرەگراف وتی"یەك مانگ موچەكەی نەیەت گوزەرانمان تەواو تێكدەچێت"، ئەو باسی لە كاریگەری زۆری برینداریی هاوسەرەكەی كرد لەسەر ژیانیان بەوپێیەی پێشتر دەیتوانی ئیش بكات، بۆیە زۆرجار نۆرینگەكەش پارەی پشكنینی لێوەرناگرێت.


سامان ساڵی 2005 ژیانی هاوسەرگیری پێكهێناوە، باوكی دوو كوڕ و كچێكە، ئەنەس 13 ساڵ، ئەحمەد 11 ساڵ و ناس تەمەنی هەشت ساڵە، ئەو كە هیچ خوێندەوارییەكی نیە، مۆبایلی زیرەكی پێیەو فەیسبوك‌و ڤایبەریشی داناوە، كوڕە گەورەكەی پۆستەكانی بۆ دەخوێنێتەوە و كۆمێنتی بۆ دەنوسێت.


ڕێی دوری ڕۆژانەی سامان، گەڕەك و باخچەیەكی بچوكی بەردەم خانوەكەیەتی، چونكە ناتوانێت بە تەنیا بچێتە بازاڕ و شوێنی تر، لەبەر سڕبونی نیوەی جەستەیی و ناشتوانێت هێشتا وەكو پێویست قسەبكات.


لە خێزانەكەی سامان سێ كەسی تر پێشمەرگەیە، كەمال سدیق، پلەی موقەدەمە و یەكێكە لە براكانی، ئەو كە یاوەريی پەیامنێری پەرەگرافی دەكرد بۆ ماڵی سامان لە حەسارۆك لە نزیكەوە، چاودێر و بینەری بەشێكی زۆر لە مەینەتیەكانی براكەی بووە لەوكاتەوەی برینداربووە.


زۆرینەی بریندارانی شەڕی داعش، بەهۆی نەبونی چارەسەری پێویست و زوو بەدەمەوەنەهاتنی داواكارییەكانیان، توشی جۆرێك لە خراپیی باری دەرونی و نیگەرانیی بون.


لە وەزارەتی پێشمەرگە، بەشێكی پزیشكی هەیە بۆ قبوڵكردن یان ڕەتكردنەوەی مامەڵەی هەر بریندارێكی شەڕ، لەوێ بڕیار لە خەرجكردنەوەی تێچوی نەشتەرگەریی و چارەسەرەكان دەدرێت.

 

سامان(دانیشتووەكەیە) لەگەڵ هاوڕێكانی لە سەنگەری بەرگریی لە دژی داعش.


پزیشكێكی ئەو بەشە، كە بەهۆی نەبونی مۆڵەتی قسەكردنەوە بۆ ڕاگەیاندن، داوایكرد ناوی نەهێنرێت بۆ پەرەگراف وتی"پاش ڕەزامەندی ئێمە ئینجا ڕەنگە چوار مانگ زیاتریش بخایەنێت تا پارەكە بۆ نەخۆشەكە خەرج دەكرێتەوە بەو مەرجەی بڕەكەی لە 750 هەزار زیاتر نەبێت".


پێشیوایە پێویستە نەخۆشخانەیەكی سەربازیی هەبێت، تا هەموان ناچارنەبن بچنە نەخۆشخانەی ئەهلی و تایبەت، لەوەشدا حكومەتی بە كەمتەرخەم زانی.


ئەو پزیشكە دانی بە كەمتەرخەمییەكاندا نا و ئاماژەی بەوەدا سەردانی هیچ پێشمەرگەیەكی بریندار نەكراوە دوای نەشتەرگەریی و لە پێداویستیەكانیان نەكۆڵراوەتەوە.


هەر ئەو پشتگوێخستنەی وەزارەتی پێشمەرگە بەوتەی پزیشكەكە، دنیایەكی لە خەم و ناجێگیری دەرونیی بۆ بریندارانی شەڕی داعش دروستكردووە، سامان سدیق نمونەیەكە لەوان.


گەزەنگ-ی هاوسەری دەڵێت"باری دەرونی زۆر خراپ تێكچووە، ئازاری زۆر دەچێژێت و ئێمەش بەهۆیەوە ئازار دەچێژین"، ئەو خێزانە ئەوەی لەدەستیان هات و پێیانكرا بۆ چارەسەری بریندارییەكە كردیان، ئەوەی ماوەتەوە لای ئەوان نیە، تا ژیانێكی شایستەیان بە قوربانییدانەكەی سامان بۆ دابینبكرێت.