تاوێ لە مزگەوت تاوێ لە كڵێسا؛ چیرۆكی هاوڕێیەتی مەلا و مەسیحییەك لە سلێمانی

22-09-2022 04:12
عەبدولئەحەد یوحەننا ئینجیلێکی بە دیاریی پێشکەش بە مەلا عەبدوڵا کرد لە مزگەوتەکەی. وێنە؛ هەردی عوسمان- پەرەگراف.

پەرەگراف- هەردی عوسمان

عەبدولئەحەد یوحەننا؛ لەگەڵ تەواوكردنی نوێژ و نزاكانیی لە حەزرەتی عیسا، كتێبێكی ئینجیل هەڵدەگرێت و بەرەو مزگەوت دەكەوێتەڕێ.

نە بۆ پەرستش دەچێتە مزگەوت نە هیچ عیبادەتێكی تر، بەڵكو بۆ دیدەنی هاوڕێیەكەیەتی، كە 15 ساڵە بونەتە نمونەیەك بۆ پێكەوەژیانی ئایینی لە سلێمانی، سەرباری جیاوازی ئیمان و عەقیدە.

مەلای مزگەوتەكە؛ ئەو هاوڕێیەیە عەبدولئەحەد باسیدەكات و بە خۆشحاڵییەوە ئینجیلەكەی وەك دیارییەك لێوەردەگرێت.

"حەزرەتی عیسا بە رێگایەكدا دەڕوات و بێباوەڕان بەردبارانی دەكەن و لێیدەدەن، ئەویش رودەكاتە خوا و دەفەرموێت؛ خودایە بیانبوورە چونكە ئەوەی دەیكەن خۆشیان نازانن چییە و بۆ وادەكەن" عەبدولئەحەد یوحەننا، لە وەڵامی پرسیارێكدا دەربارەی پێكەوەژیانی ئایینی لە مەسیحیەتدا، وای وت.

یوحەننا لە قسەكانیدا بۆ پەرەگراف، زوو زوو نمونەی كار و كردەوەی مەسیحی دەهێنایەوە وەك بەڵگە و رێگایەك بە ئامانجی ئاشتەوایی و پێكەوەژیان.

هاوڕێیەتی و نزیكایەتی زۆری مەسیحییەك و مامۆستایەكی ئاینی ئیسلام هاوشێوەی ئەو پەیوەندییەی عەبدولئەحەد و مەلا عەبدوڵا لە عێراق بە دەگمەن دەبینرێت.

زۆر بەسەر دیارییەكەی ئەو هاوڵاتییە مەسیحییەدا تێناپەڕێت؛ مامۆستای مزگەوت قورئانێك دەباتە ناو كڵێساوە و پێشكەش بە قەشەی دەكات.

عەبدوڵا سەید عوبێد، پێشنوێژ و وتارخوێنی مزگەوتی ڕەسولەڵڵا، دوەمینجارە سەردانی كڵێسای ماریوسف دەكات لە شاری سلێمانی.

"هەمیشە ویستومە هاوڕێیەتی من و ئەم پیاوە مەسیحییە (عەبدولئەحەد) ببێتە نمونەیەك بو سەرجەم شوێنكەوتوانی دینە جیاوازەكانی تریش لە هەرێمی كوردستان" مەلا عەبدوڵا بۆ پەرەگراف وادەڵێت، سەبارەت بە گرنگی و پیرۆزی پێكەوەژیانی ئاینی لە ئیسلامدا.

مەلا عەبدوڵا قورئانێکی کردە دیاریی بۆ ئەیمەن عەزیز هرمز، قەشەی كڵێسای ماریوسف. وێنە؛ هەردی عوسمان- پەرەگراف.

پێكەوەژیانی ئایینی و ئەو هاوڕێیەتییەی پیاوانی ئایینی ئیسلام و مەسیحیی نەك یاساغ نییە بەڵكو لە هەموو یاسا بەركارەكانی هەرێمی كوردستان، عێراق و دەستوریشدا جەختی لێكراوەتەوە.

ئەیمەن عەزیز هرمز، قەشەی كڵێسای ماریوسف دوای وەرگرتنی قورئانەكەی دەستی مەلا عەبدوڵا، بەڵێنیدا لەگەڵ ئینجیل و كتێبە پیرۆزەكانی دیکەدا، بە رێزەوە لە ناو كتێبخانەكەیاندا هەڵیبگرن و بیپارێزن.

كاتێكیش پەرەگراف ویستی بۆچونی لەبارەی پێكەوەژیانەوە بزانێت، قەشە ئەیمەن وتی "عیسا مەسیح دەفەرموێت؛ یەكتریتان خۆشبوێت، چونكە خودا خۆی بریتیە لە خۆشەویستی... واتە كە ئێمە یەکتریمان خۆشبوێت و یەکتریی قبوڵ بكەین و یەکتریی پەسەند بکەین".

دوای ئاینی ئیسلام، بەپێی دەستوری عێراق، ئاینی مەسیحی دوەم گەورەترین ئاینی وڵاتە و زمانیشیان كە سریانییە پارێزراوە.

مەریوان نەقشبەندی، بەڕێوەبەری دڵنیایی جۆری و وتەبێژی وەزارەتی ئەوقاف و کاروباری ئاینی، بۆ پەرەگراف وتی "ئێستا تێڕوانینی مامۆستایانی ئایینی تەواو گۆڕاوە، نەك قسە بە مەسیحی ناڵێن، بە پێچەوانەوە بەشداری لە بۆنەکانیاندا دەکەن و مامۆستایانی ئاینی میوانداری قەشەکان دەکەن بۆ ناو مزگەوتەکان و لەوێ پێکەوە نوێژ دەکەن و دوعا دەکەن".

ئەو دەڵێت، لە ژورەکەی خۆی زیاتر لە هەزار ئینجیل هەن کە داوایکردووە مەسیحییەکان بیکەن بە کوردی و داویەتی بە مامۆستایانی ئایینی.

"لێشتان ناشارمەوە هێشتا کۆمەڵگەی ئێمە ماویەتی و گرفتمان هەر هەیە" نەقشبەندی وای وت، دەسكەوتی بەشێك لەو كرانەوە و نەمانی رق و كینەی نێوان ئایینەكانی گەڕانەوە بۆ گۆڕانكاری لە ئیدارەدانی دۆسیەی ئاینی لە كوردستان و كردنەوەی بەڕێوەبەرایەتی تایبەت بە ئاین و ئاینزاكان.

لە وەزارەتی ئەوقاف و كاروباری ئاینی حكومەتی هەرێمی كوردستان، هەشت بەڕێوەبەرایەتی و نوێنەرایەتی تایبەت بە كاروباری ئاینەكانی ئیسلام، مەسیحی، ئێزدی، زەردەشتی، كاكەیی، سابیئەی مەندائی، بەهائیی و جوو هەن، جگە لە هەبونی بەڕێوەبەرایەتی پێكەوەژیانی ئاینی.

لە ناوچە جیاوازەكانی هەرێمی كوردستان؛ مەسیحی، توركمان، ئێزدی، شەبەك، كاكەیی، مەندائی و چەندین پێكهاتەی نەتەوەیی و ئاینی دەژین، كە بەپێی یاسا مافەكانیان دانی پێدانراوە.

مەلا عەبدوڵا سەید عوبێد، دوای وەرگرتنی ئینجیلەكەی عەبدلئەحەد یوحەننا-ـی هاوڕێی لە مزگەوت، وتی "دەیخەمە سەر چاوم و بە پیرۆزی دەزانم"، دەڵێت هەندێكیشیی خوێندۆتەوە.

"ئیسلام فێرمان دەکات لەگەڵ هەموو مرۆڤەکاندا دۆستی یەکتر بین، مرۆڤایەتی لە بنەڕەتدا دۆستایەتیان هەیە و هەموومان یەک ڕەچەڵەکمان هەیە، هەموومان دەگەڕێینەوە بۆ ئادەم پێغەمبەری باوەگەورەمان و ئادەمیش لە گڵە، بەڵام بەش بەش بووین بەسەر چەند هۆز و نەتەوەو دیانەتەکاندا خوای گەورە ویستی وەهابووە"، مەلا عەبدوڵا دەڵێت ئامانج و پەیامی ئیسلام سڕینەوەی ئایینەکان نەبووە، لە قورئانی پیرۆزیشدا زۆر ئاماژە بە دۆستایەتی لەگەڵ مەسیحییەکاندا كراوە.

قەشە ئەیمەن قورئانەکەی لە کڵێسای ماریوسف دانا. وێنە؛ هەردی عوسمان- پەرەگراف.

بەپێی ئەو ئامارانەی دەست پەرەگراف كەوتون، لە هەرێمی كوردستان زیاترلە 220 هەزار مەسیحی نیشتەجین، زۆرینەش دەكەونە پارێزگاكانی دهۆك و هەولێر.

"بەدرێژای مێژوی كورد لە باشوری كوردستان بە گشتی و شاری سلێمانی بەتایبەتی، پێكەوەژیانی سەرجەم ئاینەكان خاڵێكی گەش بووە" قەشە ئەیمەن عەزیز، وای وت.

یاسای پاراستنی مافی پێكهاتەكان لە كوردستان، ساڵی 2015 لەلایەن پەرلەمانەوە پەسەندكراوە، تێیدا هەر جیاكارییەك دژی پێكهاتەكان بەهۆی جیاوازی نەتەوە و ئاینەوە قەدەغە دەكات، لەگەڵ پێدانی مافی ئیدارەدان و بەشداری لە دەسەڵاتی یاسادانان و جێبەجێكردن بە پێكهاتەكان، جگە لە فەراهەمكردنی مافە بنەڕەتییەكان لە زمانی دایك و خوێندن و گرنگیدان بە بۆنەكانیان و ڕێزگرتن لە جیاوازی بیروباوەڕ.

مەریوان نەقشبەندی وتی "یاسایەکی زۆرباشە، بەڵام وەرگرتنی ماف و ئیمتیازی تیانییە، بۆ نمونە  ئەگەر مەسیحییەک قسەی بە موسڵمانێک وت یان موسڵمانێک هەڕەشەو تەشهیری بە ئێزدییەک کرد، یان هەر پەیڕەوکاری ئاینێکی تر هەڕەشەو مەترسی بۆ سەر کەسێکی تر دروستکرد و سوکایەتی پێکرد، لەو یاسایەدا خاڵێک دانەنراوە بۆ سزای ئەو جۆرە کەس و تاوانانە".

وەك ئەو دەڵێت هەوڵێك بۆ هەمواركردنەوەی یاساكە هەیە كە بەهۆی خراپی بارودۆخی دارایی و سیاسی و كێشەكانی کە هەن، نەتوانراوە "رۆحی ئەو یاسایە" بگاتە ناو دادگا و دادوەران، چونكە تائێستاش کچ و کوڕێکی زەردەشتییەکان کاتێک دەچنە دادگا مارە ناكرێن و دادوەر ناتوانێت، بۆیە هەوڵ هەیە بۆ چارەسەری ئەو كێشانە.

بەپێی كارنامەی ئەم كابینەیەی حكومەتی هەرێمی كوردستان، پێداگری دەكەن لەو پێكەوەژیانەی هەیە، هەر جیاكارییەك رەتدەكەنەوە، جەختیشكراوەتەوە لە ڕۆڵی هەموو پێكهاتەكان.

مەریوان نەقشبەندی پێیوایە حاڵەتێکی جێگیری کۆمەڵایەتی و ئاینی لە كوردستان هاتۆتە ئاراوە، "ئێستا ئەم ئاینانە کە نوێنەریان لە وەزارەت هەیە، کاتێک هەر ئاینێک بۆنەیەکی کۆمەڵایەتییان دەبێت نوێنەرانی ئایینەکانی تر هەمویان دەچن بەشداری دەکەن".

لێپرسراوەكەی وەزارەتی ئەوقاف و كاروباری ئاینی لە باسی چارەسەری كێشە و بەرەنگاربونەوەی وتاری رق و كینەدا، ئاماژەی بەوەدا كاتێك مامۆستایەکی ئاینی قسەیەک دەکات یان لە وتارەکەیدا وشەیەکی توند بەکاردەهێنێت بەرامبەر ئاینێکی تر، ئەوان لە وەزارەت نوێنەرانی سەرجەم ئاینەکان کۆدەبنەوە و دەچن بۆ ماڵی مامۆستاکە وەک سەردانێکی کۆمەڵایەتی، چا دەخۆنەوە و قسەی خۆش دەکەن، دواتر بە مامۆستاكە دەڵێن فلان كەس نوێنەری ئەو ئاینەیە كە گلەییت هەبوو لێی، چیت هەیە ئاوا بەرەوڕو قسەی لەگەڵ بکە، تا هەر ناکۆکییەک هەبێت چارەسەری بکەن.