پەرەگراف - وەزیری كارەبای هەرێمی كوردستان دەڵێت، ئەگەر زیانی هێرشەكەی سەر كۆرمۆر تەنیا زیانی بە كۆگە گەیاندبێت، ئەوا لە ماوەی 24 بۆ 48 كاتژمێری داهاتوو دۆخی كارەبا ئاسایی دەبێتەوە.
كەمال محەمەد لە لێدوانێكدا بۆ میدیاكان ڕایشیگەیاند، دوو ڕۆژ لەمەوبەر شاندی باڵیۆزخانەی ئەمریكا سەردانی وەزارەتی كارەبای كردووە و لەو دیدارەدا داوایان لێ كردوون "سیستەمی بەرگریی دژی درۆن و ئەم هێرشانە"یان بۆ دابین بكەن. وتیشی "دەبێت ئەم سیستەمە بەزووترین كات دابین بكرێت".
بەهۆی هێرشەكەی شەوی ڕابردووەوە "2700 بۆ 300 هەزار مێگاوات كارەبا كەمی كردووە، ئێستا 1300 بۆ 1400 مێگاوات كارەبا ماوە"، وەزیری كارەبا دەڵێت "لە ئێستادا تەنیا دەتوانن 6 بۆ 8 كاتژمێر كارەبا بۆ هاووڵاتیان دابین بكەن".
هەروەها ئاماژەی بەوە كرد كە تا ئێستا تەنیا دەزگا ئەمنییەكان لێكۆڵینەوە لە هێرشەكە دەكەن و هێشتا تیمی وەزارەتیان نەچووەتە شوێنی ڕووداوەكە، بۆیە جارێ قەبارەی زەرەر و زیانەكان نازانن.