پەرەگراف
مەرگی دكتۆر نەمام غەفوریی لە سەرەتای ئەم مانگەدا، خەمگینییەكی فراوانی بەدوای خۆیدا هێنا، بەدەر لە ناوخۆی كوردستان، بووە جێی باسی ناوەندو میدیا نێودەوڵەتییەكان، ئەوەی غەفوریی جیادەكردەوە، سنگفراونیی‌و دەستی هاوكارییەكانی بوو بۆ ئەوانەی پێویستیان پێی دەبوو.
نەمام غەفوریی، ساڵانی كۆتایی تەمەنی لەناو ژن‌و منداڵانی ئێزدیی‌و ئاوارەكانی سوریا بەسەربرد لە ناوچە سنورییەكانی باشورو ڕۆژئاوای كوردستان، ئەوەش دوای ئەو دۆخە خراپەی بەسەریان هات لەسەر دەستی تیرۆریستانی داعش كاتێك پەلاماری ناوچەكانیانی دا، غەفوریی دڵسۆزانەو خۆبەخشانە هاوكاریی‌و چارەسەری پێشكەش دەكردن، هەر لەناو ئەوان‌و لەكاتی ئەركە خۆبەخشەكانیدا تووشی كۆرۆنا بوو كە دواجار بەیەكجاریی ژیانی لێ سەندەوە.
دكتۆر نەمام كچە كوردێكی كۆیی لە خێزانێكی ناسراوی ئەو ناوچەیە، كچی مەحمود ئاغای كاكە زیاد غەفوریی، دەستی هاوكارییەكانی سنوری عێراق‌و ناوچەكەی تێپەڕاندبوو، ئەو بۆ پێشكەشكردنی هاوكاریی مرۆیی گەیشتبووە؛ هیندستان، ئەسیوپیا، بەدەمەوەچوونی لێقەوماوانی بومەلەرزەكەی ئەم ساڵانەی دوایی لە ئێران، پاشان گەڕاوەتەوە بۆ عێراق تا هاوكاریی ئاوارەكان بكات‌و چارەسەری پزیشكییان پێشكەش بكات.
ئەو لە 1ی ئەم مانگەدا لەشاری ستۆكهۆڵم لە تەمەنی 52 ساڵیدا بەهۆی ڤایرۆسی كۆرۆناوە كۆچی دوایی كرد.
نەمام غەفوریی لە 25-12-1968 لەناو ئەشكەوتێكی ناوچەی چنارۆك لە دایك بووە، پاشان بەهۆی دۆخی سیاسییەوە خێزانەكەی ئاوارەی ئێران بوون‌و لە نزیك تاران گەورەبووە، دواتر لە 1980دا وەك پەنابەر چوونەتە وڵاتی سوید‌و لەوێ پزیشكیی خوێندووەو پسپۆڕی نەخۆشییەكانی دڵ بووە.
كاتێك ساڵی 2014 ئێزدییەكان ئاوارەبوون‌و ڕوبەڕوی جینۆساید بوونەوە لەسەردەستی داعش، نەمام غەفوریی لە یەكەمین كەسە خۆبەخشەكان بوو كە گەیشتە ناوچەكەیان بۆ پێشكەشكردنی هاوكاریی‌و چارەسەری پزیشكیی، هەر لەو كاتەدا ڕێكخراوێكی دامەزراند بۆ كۆكردنەوەی هاوكاریی بۆ كوردستان‌و دابینكردنی شوێنی نیشتەجێ بوون بۆ ئەوانەی بەهۆی مەترسیی داعشەوە دەربەدەربوون.
دكتۆر غەفوری ڕابەرایەتی ئەركێكی گەورەی كرد بۆ شادكردنەوەی دەیان منداڵ بە دایكە گەنجە ئێزدییەكانیان كاتێك لە یەك دابڕابوون‌و كۆمەڵگەی ئێزدیی بە ئاسانی قبوڵی نەدەكردن بە یەكتر شاد ببنەوە بەهۆی ئەوەی لە باوكێكی داعشیی لەدایك بوبون.
نەمام غەفوری لە ناو ئێزدییەكاندا، بەدەر لە پێشكەشكردنی هاوكارییە پزیشكییەكانی، یارمەتیی دەدان تا كار بدۆزنەوەو هەوڵی چارەسەری ئەو كێشە كۆمەڵایەتییانەی دەدا كە لە نێوانیاندا دروست دەبوو، هەروەها یارمەتیی ژنانی دەدا كە پلان بۆ داهاتوویان دابنێن‌و بەردەوام دڵنەوایی دەكردن‌و لە ڕووی دەرونییەوە پاڵپشتیان بوو.
نازدار غەفوریی خوشكی كتۆر نەمام بۆ ڕۆژنامەی نیویۆرك تایمزی ئەمەریكی، باسلەوەدەكات نەمام غەفوریی پێیوابووە ئەو دۆخە خراپەی ئاوارەكانی تێدایە چەند ساڵێك ناخایەنێت‌و زوو كۆتایی دێت، بەڵام هەرچەندە درێژەی كێشا ئەو نەیتوانی بەتەنها جێیان بهێڵێت‌و لەگەڵیاندا مایەوە.
دكتۆر نەمام گەڕایەوە بۆ سوید دوای ئەوەی تووشی كۆرۆنابوو لەو كاتەی لە كارەكەی بەردەوام بوو بۆ بەیەك گەیاندنەوەی منداڵان بە دایكەكانیان، كۆرۆنای بە قورسیی گرت‌و خرایەژێر ئامێری هەناسەدانی دەستكردو ئۆكسجینی لەشی بە شێوەیەكی مەترسیدار دادەبەزی، لەو كاتەشدا هێشتا لە تویتەرەوە بەردەوام بوو لە بڵاوكردنەوەی پەیامە سیاسییەكانی بەرلەوەی بگوازرێتەوە بۆ سوید.
دوو ڕۆژ بەرلەوەی كۆچی دوایی بكات، نازدار غەفوریی‌و خوشكێكی هەوڵدەدەن قسە لەگەڵ دكتۆر نەمام بكەن بە تەلەفۆن، پەرستارێك تەلەفۆنەكەی ناوە بە گوێی دكتۆر نەمامەوە.
"خوشكەكەت ناتوانێت قسە بكات لەبەرئەوەی لەژێر ئامێری هەناسەدانی دەستكرددایە" پەرستارەكە وای بە نازدار گوت، "بەڵام ئەو دەتوانێت گوێی لێتبێت‌و تۆ دەتوانیت قسەی بۆ بكەیت".
نازدار دەڵێت "پێمان وت كە چەندمان خۆشدەوێت. هەروەها ئەو خۆشەویستییەمان پێگوت كە لە سەرتاسەری دونیاوە بۆی نێردراوە، پاشان بەڵێنم پێدا كە كارەكەی بەردەوام دەبێت".