پەرەگراف - مارك ساڤایا، نێردەی ئەمریكا بۆ عێراق، هێرشەكەی سەر كێڵگەی غازی كۆرمۆر بە كاری "گرووپە چەكدارییە نایاساییەكان كە ئەجێندای دەرەكیی دووژمنكارانە ئاراستەیان دەكات" ناو دەبات، ڕایشیدەگەیەنێت "شوێنپێی هەموو گرووپێكی چەكداری نایاسایی و پشتیوانەكانیان هەڵدەگیرێت، ڕووبەڕوویان دەبینەوە و لێپرسینەوەیان لەگەڵدا دەكرێت".
ساڤایا لە پۆستێكدا لە تۆڕی كۆمەڵایەتیی ئێكس، بەپێویستی دەزانێت "حكومەتی عێراق ناسنامەی بەرپرسانی ئەم پەلامارە دیاری بكات و ڕووبەڕووی دادگایان بكاتەوە". دەشڵێت "با ئەمە ڕوون و ئاشكرا بێت: لە عێراقێكی خاوەن سەروەریی تەواودا، هیچ جێگەیەك بۆ ئەم جۆرە گرووپە چەكدارانە نییە".
نێردەی ئەمریكا بۆ عێراق، پشتیوانیی ئەمریكا بۆ "كوردستانێكی بەهێز لەناو عێراقێكی یەكگرتوو و سەقامگیردا" دووپات دەكاتەوە و هانی بەغداد و هەولێر دەدات كە "هاوكاریی ئەمنیی نێوانیان قووڵتر بكەنەوە".