.jpg)
پەرەگراف - وەزارەتی ناوخۆی حكومەتی هەرێمی كوردستان، خۆپیشاندانەكەی دانیشتووانی گوندی لاجان لەبەردەم پاڵاوگەی نەوتی لاناز، بە "ئاژاوەگێڕی" ناو دەبات و ڕووداوی كوشتنی خۆپیشاندەرەكەش دەداتە پاڵ خۆپیشاندەران خۆیان.
وەزارەتەكە لە ڕاگەیەندراوێكدا دەڵێت "ماوەیەكە لەلایەن چەند دەستێكی دەرەكی و بە فیتی هەندێك كەس و لایەنی ناوخۆیی، هەوڵی نانەوەی ئاژاوە دەدرێت. نوێترین هەوڵی تێكدەرانە بە بەئامانجگرتنی كێڵگەی غازی كۆرمۆر دەستی پێ كرد كە مەبەست لێی ڕاگرتنی بەرهەمهێنانی كارەبای هەرێم بووە".
هەروەها لە ڕاگەیەندراوەكەدا هاتووە "دوای ئەوەی حكومەتی هەرێم سووتەمەنیی شلی وەك جێگرەوەی غاز بۆ دابینكردنی كارەبا بەكار هێنا، بە هاندانی ناوخۆیی و دەرەكی، كۆمەڵە كەسێكی ئاژاوەگێڕ ڕێگای تانكەرەكانی گواستنەوەی سووتەمەنی و هاووڵاتیانیان لە سنووری گوێڕ گرت و تەقەیان بە سەر خەڵك و ڕێبوارانی ئەو ڕێگایەدا كرد".
سەبارەت بە قوربانییانی گرژییەكانی ناو خۆپیشاندانەكە، وەزارەتی ناوخۆی هەرێم دەڵێت "لە ئەنجامی تەقەی ئەو كەسانەدا هاووڵاتییەك بووە قوربانی و گیانی لەدەست دا، ژمارەیەك كەسی تریش بریندار بوون".
"چیتر ڕێگە نادەین سوود لە نیازپاكیی دامودەزگاكانی هەرێمی كوردستان وەربگێرێت و سنوورێك بۆ ئەو كارە تێكدەرانە دادەندرێت. بۆ ڕاگرتنی ئەو جۆرە ئاژاوەگێڕییانە، بەپێی یاسا بەركارەكان لە هەرێمی كوردستان مامەڵە لەگەڵ كەسانی ئاژاوەگێڕ دەكرێت و كەس لە سەرووی یاسا نییە"، وەزارەتی ناوخۆ وا دەڵێت.
ڕووداوەكە چۆن بوو؟
دانیشتووانی گوندی لاجان كە دەكەوێتە نزیك پاڵاوگەی لاناز لە قەزای خەبات لەسەر ڕێگای گوێڕ، چەند ڕۆژێكە خۆپیشاندان دەكەن و پێشتریش چەند جارێك خۆپیشاندانیان ئەنجام داوە. داوا دەكەن گەنجەكانیان لە پاڵاوگەكەدا دەرفەتی كاریان بۆ بڕەخسێنرێت.
پاش ئەوەی ئەمڕۆیش خۆپیشاندانەكە بەردەوام بوو، هێزە ئەمنییەكان و پاسەوانانی پاڵاوگەكە لە دەروازەی پاڵاوگەكەدا بە دەستڕێژی گوللـە هەوڵی كۆتاییهێنان بە خۆپیشاندانەكەیان دا، لە ئەجامدا گەنجێك كوژرا كە خۆپیشاندەران دەڵێن بە تەقەی "ئاسایشی پاڵاوگەكە" گیانی لەدەست داوە.
دانیشتووانی گوندی لاجان سەر بە عەشیرەتی هەركین. ئەوان دەڵێن "بەر لە هەڵبژاردن بەڵێنیان پێ داین كە دەرفەتی كار بۆ ئێمەش فەراهەم بكرێت، بەڵام ئێستا پاشگەز بوونەتەوە". ئەوان دەشڵێن "ئەگەر دەرفەتی كارمان لە پاڵاوگەكە پێ نەدرێت، ڕێگەی هاتووچۆی تانكەرەكانیان دادەخەین".
ئەمڕۆ دواى دروستبوونى گرژییەکان، خۆپیشاندانەکە سەری كێشا بۆ پێكدادان و ڕووبەڕووبوونەوە بە چەك. هێزى زۆرى ئەمنى چوونە ناوچەکە و بەپێی ئەو گرتە ڤیدیۆییانەیش كە پەیجەكانی عەشیرەتی هەركەی لە فەیسبووك بڵاویان دەکردەوە، ژمارەیەك لە دانیشتووانی گوندی لاجان چەكیان هەڵگرتبوو و وەڵامی هێزە ئەمنییەکانیان دایەوە. بە جۆرێك تا درەنگانی ئێوارەش دەنگی تەقەیەكی زۆر لە دەوروبەر و ناو گوندەكەدا دەبیسترا.