پەرەگراف - ئەنجوومەنی گەڕەكە كوردییەكانی حەلەب، پێشنیازەكەی وەزارەتی بەرگریی سووریا كە داوای چۆڵكردنی گەڕەكەكان لەلایەن هێزەكانی هەسەدە و گواستنەوەیان بۆ ڕۆژئاوای كوردستان دەكات، بە "تەسلیمبوون" ناو دەبات و ڕەتی دەكاتەوە. دەشڵێت "دیمەشق متمانەی نییە و بڕیارمان داوە بمێنینەوە و بەرگری بكەین". هاوكات میدیای فەرمیی سووریا باس لە "مۆڵەتێكی نوێ" بۆ كشانەوەی هەسەدە لەو گەڕەكانە دەكات.
بەڕێوەبەرایەتیی ئەنجوومەنی گەڕەكەكانی ئەشرەفییە و شێخ مەقسوود لە ڕاگەیەندراوێكدا دەڵێت "بەهۆی نەبوونی متمانە بە حكومەتی نوێی شام و ئەو كۆمەڵكوژییانەی ئەنجام دراون، ئامادە نیین ئاسایشی گەڕەكەكانیان ڕادەست بكەین".
ئەنجوومەنەكە، ئامانجی هێرش بۆ سەر گەڕەكە كوردنشینەكان بە "گۆڕینی دیمۆگرافیای ناوچەكە و ناچاركردنی خەڵك بە كۆچكردن" ناو دەبات. دەشڵێت "حكومەتی كاتیی شام بە پاڵپشتیی دەوڵەتی توركیا و گرووپە چەكدارەكان، فشار دەكات بۆ خۆڕادەستكردنی هێزەكانی ئاسایش و خەڵكی ناوچەكە".
ئەو پاسانەی كە حكومەتی دیمەشق ڕەوانەی گەڕەكەكانی شێخ مەقسوود و ئەشرەفییەی كردبوون، بە ئامانجی ئەوەی هێزەكانی ئاسایشی ئەو گەڕەكانەی پێ بگوازێتەوە بۆ ناوچەكانی ژێر دەسەڵاتی هەسەدە لە باكووری ڕۆژهەڵاتی سووریا، بە بەتاڵی گەڕانەوە و هەوڵەكەی وەزارەتی بەرگریی سووریا شكستی هێنا.
لە نوێترین هەواڵدا، تەلەفزیۆنی فەرمیی سووریا دەڵێت "سوپای سووریا مۆڵەتێكی نوێ دەداتە هەسەدە بۆ كشاندنەوەی هێزەكانی لە گەڕەكی شێخ مەقسوود".
وەزارەتی بەرگریی سووریا شەوی ڕابردوو پێشنیازێكی بۆ كۆتاییهێنان بە شەڕ خستە ڕوو، بەپێی پێشنیازەكە، هێزەكانی ئاسایشی گەڕەكە كوردنشینەكانی حەلەب بە چەكی سووك و بە سەلامەتی بۆ ناوچەكانی ژێر دەسەڵاتی هەسەدە لە ڕۆژئاوای كوردستان دەگوازرێنەوە.
پێشنیازەكەی وەزارەتی بەرگریی سووریا بۆ ماوەی شەش كاتژمێر بوو (03:00 بۆ 09:00ـی بەیانی) و ماوەكە كۆتایی هات، دواتریش بە درێژكردنەوەی كات و ڕەوانەكردنی پاس بۆ ناو گەڕەكە كوردنشینەكان، هەوڵی دا هێزەكانی ئاسایشی ئەو گەڕەكانە بە كشانەوە قایل بكات، بەڵام سەركەوتوو نەبوو.
تۆم باراك، نێردەی ئەمریكا بۆ كاروباری سووریا، داوای درێژكردنەوەی ماوەی ئاگربەستی كردووە، بەئامانجی ڕەخساندنی هەلی ڕێككەوتن و چارەسەری ئاشتییانە.
ئەنجوومەنی گەڕەكەكانی ئەشرەفییە و شێخ مەقسوود دەڵێت "لە 6ـی ئەم مانگەوە گەڕەكەكانیان ڕووبەڕووی بۆردوومانی تووندی چەكی قورس بوونەتەوە، كە تێیدا ناوەندە مەدەنییەكانی وەك مزگەوت، قوتابخانە و نەخۆشخانەكان كراونەتە ئامانج".
ئەنجوومەنەكە ئەم پێشهاتانە بە پێشێلكردنی ڕێككەوتنەكان ناو دەبات و سەركۆنەی توندی بێدەنگیی هێزە نێودەوڵەتییەكان دەكات كە چاودێر و گرەنتیكاری ڕێككەوتنامەكانی نێوان هەسەدە و دیمەشق بوون.