ئەمریكا پەیامێكی هۆشداریئامێز دەداتە بەغداد و هەولێر، 'حكومەتی سەپێندراوی ئێران لە عێراق' ڕەتكراوەیە
پەرەگراف - پاش گەیاندنی پەیامی هۆشداریئامێزی ئەمریكا لەبارەی پێكهێنانی "حكومەتێكی سەپێندراوی ئێران لە عێراق" بە سوودانی، هەمان پەیام لەلایەن تۆم باراكەوە بە بارزانی گەیەندرا.
تۆم باراك، نێردەی ئەمریكا بۆ كاروباری سووریا، لە پەیوەندییەكی تەلەفۆنیدا لەگەڵ مەسعود بارزانی، سەرۆكی پارتی دیموكرات، ڕایگەیاند "هەڵوێستی واشنتۆن بەرانبەر عێراق ڕوون و جێگیرە".
باراك بە بارزانیی وتووە "هەر حكومەتێك لە عێراق لەلایەن ئێرانەوە بسەپێنرێت، ناتوانێت خواستەكانی گەلی عێراق و سووریا بۆ داهاتوویەكی گەشتر بەدی بهێنێت، هەروەها ناتوانێت هاوبەشییەكی كارا لەگەڵ ویلایەتە یەكگرتووەكانی ئەمریكا بنیات بنێت".
نێردەی ئەمریكا پەیوەندییە تەلەفۆنییەكەی لەگەڵ بارزانی بە "بنیاتنەر" وەسف دەكات، كە هاوكات تێیدا جەختی كردووەتەوە لەسەر "گرنگیی پاراستنی ئاگربەست و گەیاندنی هاوكارییە مرۆییەكان بۆ لێقەوماوان لە سووریا، بەتایبەت لە كۆبانی".
هەر ئەمڕۆیش، ماركۆ ڕۆبیۆ، وەزیری دەرەوەی ئەمریكا، لە پەیوەندییەكی تەلەفۆنیدا، هەمان هۆشداریی لەبارەی پێكهێنانی كابینەی نوێی حكومەتی عێراقەوە، داوەتە محەمەد شیاع سوودانی، سەرۆكوەزیرانی عێراق.
وەزارەتی دەرەوەی ئەمریكا دەڵێت، ڕۆبیۆ هۆشداریی داوە لەوەی كە نابێت ئێران كۆنتڕۆڵی سیاسەتی عێراق بكات و ڕایگەیاندووە، هەر حكوومەتێك لە تارانەوە كۆنتڕۆڵ بكرێت، ناتوانێ بەرژەوەندییەكانی عێراق بپارێزێت.
هەروەها وەزیری دەرەوەی ئەمریكا جەختی كردووەتەوە كە عێراق لەژێر كۆنتڕۆڵی ئێراندا، "ناتوانێت لە ململانێ ناوچەییەكان بێ لایەن بمێنێتەوە و بەرژەوەندییە نیشتمانییەكانی بپارێزێت، پەیوەندی و هاوبەشییەكانیشی لەگەڵ ئەمریكاشدا دەكەوێتە مەترسییەوە".
ئەو هۆشدارییانەی ئەمریكا پاش ئەوە دێن كە لایەنە شیعەكان لەسەر كاندیدكردنی نووری مالیكی، سەرۆكی دەوڵەتی یاسا، بۆ پۆستی سەرۆكوەزیرانی عێراق ڕاكەوتن و بە فەرمی وەكوو تاكە كاندید ڕایانگەیاندووە.