ناوەرۆكی كۆبوونەوەی چوارچێوەی هەماهەنگی و پارتی، "هەڵبژاردنی سەرۆككۆمار بۆ تەواوكردنی پێكهێنانی حكومەت"
پەرەگراف - شاندی باڵای چوارچێوەی هەماهەنگیی شیعەكان لە هەولێر لەگەڵ پارتی دیموكرات كۆبووەوە. سوودانی دەڵێت "باس لە شایستە دەستوورییەكانی داهاتوو كرا، لە سەرووی هەمووشیانەوە هەڵبژاردنی سەرۆككۆمار، بۆ تەواوكردنی ڕێكارەكانی پێكهێنانی حكومەت بەپێی ئەنجامی هەڵبژاردنە پەرلەمانییەكان".
شاندی چوارچێوەی هەماهەنگی هاوشانی سوودانی، پێكهاتووە لە هادی عامری، ئەمینداری گشتیی ڕێكخراوی بەدر و موحسین مەندەلاوی، سەرۆكی هاوپەیمانیی ئەساس و عەباس ڕازی، ئەمینداری گشتیی چوارچێوەی هەماهەنگی. پارتی دیموكرات بە سەرۆكایەتیی مەسعود بارزانی پێشوازیی لێ كردن، نێچیرڤان بارزانی، جێگری یەكەمی سەرۆكی پارتی و سەرۆكی هەرێمی كوردستان لە كۆبوونەوەكەدا بەشدار بوو.
سەبارەت بە پەرەسەندنەكانی ئێستای ناوچەكە و بارودۆخی سووریا، محەمەد شیاع سوودانی دەڵێت "لە كۆبوونەوەكەدا جەخت لەسەر گرنگیی یەكخستنی گوتاری سیاسیی نیشتمانیی عێراق بەرانبەر ئەم گۆڕانكاری و ڕووداوانە كرایەوە، بە جۆرێك كە ببێتە هۆی بەهێزكردنی پێگەی عێراق و پاراستنی بەرژەوەندییە باڵا نیشتمانییەكانی".