پەرەگراف - دابەشکردنی مووچەی خانەنشینان لە عێراق دەستی پێ کرد و هێشتا چارەنووسی مووچەی مانگی دووی هەرێم نادیارە. بەغداد چاوەڕێی ١٢٠ ملیار دینارەکەیە و مەسروور بارزانیش داوای ناردنی مووچە دەکات.
مووچەی مانگی دوو لە عێراق دابەش کراوە و ئەمڕۆ ٠٣-٠٣-٢٠٢٦، بانکەکانی عێراق دەستیان کرد بە دابەشکردنی مووچەی مانگی سێی خانەنشینان. وەزارەتی دارایی عێراق مووچەی ئەو توێژە لە سەرەتای مانگدا خەرج دەکات، بەوپێیەی پێشتر لێبڕینی خانەنشینیی مووچەکانیان لە سندووقی خانەنشینیدا پاشەکەوت کراوە.
مەسروور بارزانی، سەرۆکی حکومەتی هەرێم، ئەمڕۆ لە کاتی کردنەوەی نەخۆشخانەیەکدا لە هەولێر وتی "ئێمە وەکوو حکومەتی هەرێمی کوردستان، هەموو پابەندبوونەکانی خۆمان جێبەجێ کردووە، داواش دەکەین حکومەتی فیدراڵ پابەندییە داراییەکانی خۆی بەرانبەر خەڵکی هەرێم جێبەجێ بکات".
سەرۆکی حکومەتی هەرێم جارێکی دیکە سوپاسی خەڵکی کوردستانی کرد بۆ "پشوودرێژییان" و جەختی کردەوە "بەردەوام لەگەڵ حکومەتی فیدراڵی لەسەر هێڵین بۆ ئەوەی چارەسەرێکی بنەڕەتی بۆ کێشەی مووچە بدۆزینەوە".
خەرجکردنی مووچەی مانگی دووی هەرێمی کوردستان زۆرینەی ڕێکارەکانی بڕیوە و پێویستی بە ڕادەستکردنی ١٢٠ ملیار دینار داهاتی ناوخۆیە.
حکومەتی هەرێم کێشەی "کەمبوونەوە"ـی داهاتی نانەوتی هەیە و هەوڵەکانی چڕ کردووەتەوە بۆ ئەوەی تا کۆتایی ئەم هەفتەیە ئەو بڕە داهاتە کۆ بکاتەوە.
نوێ دەكرێتەوە...