پەرەگراف - سەرۆکوەزیرانى عێراق داوای پێکهێنانى هاوپەیمانێتییەکی دیبلۆماسی بە بەشداریى وڵاتانی ناوچەکە و وڵاتانی یەکێتیی ئەورووپا دەکات، بە ئامانجی "ڕاگرتنی دەستبەجێی جەنگ". سوودانى جەختیش لەسەر پێویستیی "کۆتاییهێنان بە پێشێلکردنی سەروەریی وڵاتان" دەکاتەوە.
ئەم داوایەى محەمەد شیاع سوودانی، سەرۆکوەزیرانى عێراق، لەمیانى بەشداریکردنیدا هات لە کۆنگرەیەکدا بەشێوەى ڤیدیۆ کۆنفرانس، کە سەرۆکی ئەنجوومەنی ئەورووپا و سەرۆکی کۆمیسیۆنی ئەورووپا دەربارەى پەرەسەندنە هەرێمییەکانی ئێستا ڕێکیان خستبوو.
سوودانى لە وتارێکدا جەختی لەوە کردەوە کە "ئەو جەنگەی لە ناوچەکەدا دەگوزەرێت، پێویستی بە هەڵوێستێکی هاوبەش و بەهێز هەیە بۆ ڕاگرتنی، لەڕێگەى زاڵکردنی زمانی گفتوگۆ و هاوکاری، بۆ ڕێگریگرتن لە خراپتربوونی ئەم دۆخەی کە بە هەڕەشەیەکی مەترسیدار بۆ سەر ئاشتی و ئاسایشی نێودەوڵەتی دادەنرێت".
سەرۆکوەزیرانى عێراق لە وتارەکەیدا ئیدانەی ئەو هێرشانەى کرد کە کراونەتە سەر خاکی عێراق لەلایەن هەموو لایەنەکانەوە و وتیشى "هەڵوێستی عێراق جێگیرە لە ڕەتکردنەوەی بەکارهێنانی خاک یان ئاسمانی بۆ هێرشکردن یان ئەنجامدانی چالاکییە سەربازییەکان دژی وڵاتانی دراوسێ".
"سەرکۆنەی دەستدرێژییەکان بۆ سەر کۆماری ئیسلامی ئێران و سەروەری و ئاسایش و سەقامگیری و یەکپارچەیی خاکەکەی دەکەین. پێشێلکردنی سەروەریی وڵاتانی عەرەبی ڕەت دەکەینەوە و هاوسۆزیی خۆمان بۆ ڕێکارەکانیان لەپێناو پاراستنی سەلامەتیی خاک و گەلەکەیان دووپات دەکەینەوە"، سوودانى وا وت.
محەمەد شیاع سوودانى وتیشى "جارێکی دیکە جەخت لەسەر پاراستنی نێردە دیپلۆماسییەکان دەکەینەوە. بە توندی ئیدانەی بەئامانجگرتنی مەدەنییەکان، دامەزراوە مەدەنی و نەوتی و ئەتۆمییەکان دەکەین".
سەرۆکوەزرانى عێراق جەختى کردەوە کە "پێویستە کۆمەڵەی گشتیی نەتەوە یەکگرتووەکان بڕیارێک بۆ ڕاگرتنی جەنگ دەربکات، ئەنجوومەنی ئاسایشیش ئەرک و بەرپرسیارێتییەکانی خۆی بۆ دەستەبەرکردنی ئاشتی و ئاسایشی نێودەوڵەتی جێبەجێ بکات".