لە هێرشە مووشەکییەکەى سەر بارەگایەکى پێشمەرگە لە دەڤەرى سۆران شەش پێشمەرگە شەهید بوون
پەرەگراف - دوو هێرشى مووشەکیى یەک لەدواى یەک کرایە سەر بارەگایەکى هێزەکانى پێشمەرگە لە دەڤەرى سۆران. بەهۆیەوە "شەش پێشمەرگە شەهید" بوون و ژمارەیەکى زۆریش بریندارن. ئەم هێرشە پێشهاتێکى نوێیە لە پریشکى ئاڵۆزییەکانى ناوچەکە کە بەر هەرێمى کوردستان دەکەوێت.
هەردوو هێرشەکە بەرەبەیانى ئەمڕۆ لە ماوەى یەک کاتژمێردا ئەنجام دراون. تێیدا بارەگاى فیرقەى حەوتى فەرماندەیی دەڤەری ١ـی هێزەکانى پێشمەرگە لە ناوچەى سپیلک سەر بە قەزاى خەلیفان لە ئیدارەى سۆران بەئامانج گیراوە.
سەرچاوەیەک لە هێزەکانى پێشمەرگە بە پەرەگرافى ڕاگەیاند "لە هێرشەکەدا شەش پێشمەرگە شەهید و زیاتر لە ٢٠ پێشمەرگەى دیکەش بریندار بوون".
ڕاگەیەندراوێک لە فەرماندەیی دەڤەری یەک:
ئاگاداری دەزگاکانی ڕاگەیاندن و ڕای گشتی دەکەینەوە، کە بارەگاکانی فیرقەی ٧ لە دوو کاتی جیاوازی پاشنیوەشەوی ڕێکەوتی ٢٠٢٦/٣/٢٤ کرانە ئامانجی هێرشی موشەکی بەم شێوەیەی خوارەوە:
١. لە کاتژمێر 01:50ی پاشنیوەشەو، بارەگای فیرقە بە (٥) پێنج موشەک بۆردومان کرا، خۆشبەختانە هیچ زیانێکی گیانی لێ نەکەوتەوە.
٢. لە کاتژمێر 02:50ی پاشنیوەشەو، جارێکی دیکە لە نزیک بارەگای فیرقە و بە دیاریکراوی لە سنووری گوندی کەلەکین، هێرشێکی دیکە بە (١) یەک موشەک ئەنجامدرا.
دووپاتی دەکەینەوە کە هێزەکانمان لە ئامادەباشی تەواودان و لێکۆڵینەوە لە سەرچاوەی هێرشەکان بەردەوامە.