بەغداد لەسەر هێرشەکانى سەر پێشمەرگە بانگهێشتى باڵیۆزى ئێران دەکات، حەشدى شەعبیش بۆ وەڵامدانەوەى هێرشەکان دەستکراوە کرا
پەرەگراف - حکومەتى عێراق بە فەرمى حەشدى شەعبى و هێزە چەکدارەکانى دیکەى دەستکراوە کرد بۆ وەڵامدانەوەى ئەو هێرشانەى کە لەلایەن فڕۆکە جەنگییەکانەوە دەکرێنە سەر بارەگاکانیان. لەسەر بەئامانجگرتنى هێزەکانى پێشمەرگەیش، بانگهێشتى باڵیۆزى ئێران دەکات.
وتەبێژى حکومەتى عێراق ڕایدەگەیەنێت، مافى وەڵامدانەوەە هێرشەکان، بە بڕیارى ئەنجوومەنی وزاریى ئاسایشی نیشتمانیی عێراق بووە، ئەویش "بەپێی پرەنسیپی مافی وەڵامدانەوە و بەرگریکردن لەخۆکردن" و "بە کەڵک وەرگرتن لە هەموو ڕێگایەکی بەردەست".
ئەنجوومەنی وزاریى ئاسایشی نیشتمانیی عێراق ئەمڕۆ بە سەرپەرشتیى محەمەد شیاع سوودانى، فەرماندەى هێزە چەکدارەکانى عێراق کۆبووەوە و سىَ بڕیارى دەرکرد. بڕیارێکى دیکەى گرتنبەرى ڕێکارى یاساى و جێبەجێکردنى فەرمانى دەستگیرکردنى ئەو لایەن و کەسانەیە کە "دامودەزگا ئەمنییەکان، بەرژەوەندیی هاووڵاتیان و نوێنەرایەتییە دیپلۆماسییەکان" بەئامانج دەگرن.
بڕیارێکى دیکەى ئەنجوومەنەکە، گرتنەبەرى ڕێکارى دیپلۆماسییە لە ڕێگەى وەزارەتی دەرەوە، بە پێشکەشکردنی سکاڵا بە ئەنجوومەنی ئاسایش، سەبارەت بە "هەر کردەیەکی دەستدرێژی و لێکەوتەکانی" بۆ سەر عێراق. هەر لەو چوارچێوەیەشدا بانگهێشتی کارڕاپەڕێنەرى باڵیۆزخانەى ئەمریکا و باڵیۆزی ئێران دەکات بۆ پێشکەشکردنی "یاداشتی ناڕەزایەتیی فەرمی" سەبارەت بە هێرشەکانی سەر بارەگاکانی حەشدی شەعبی و بارەگاکانی هێزى پێشمەرگە.
ڕاگەیەنداوێک لە سەباح نوعمان، وتەبێژی فەرماندەی گشتی هێزە چەکدارەکانى عێراقەوە:
ئەمڕۆ سێشەممە، محەمەد شیاع سوودانی، فەرماندەی گشتی هێزە چەکدارەکانى عێراق، سەرپەرشتیی کۆبوونەوەی بەپەلەی ئەنجوومەنی ئاسایشی نیشتمانیی کرد.
لە کۆبوونەوەکەدا پێداچوونەوە بە پێشهاتەکانی شەڕ و ئۆپەراسیۆنە سەربازییەکانی ناوچەکە و کاردانەوەکانیان لەسەر عێراق کرا. سوودانى دووپاتى کردەوە کە دەوڵەت لە ڕێگەی دەسەڵاتە دەستوورییەکانییەوە، تاکە دەسەڵاتی بڕیاردانە لەسەر شەڕ و ئاشتی، ڕێگە بە هیچ قەوارە و تاکێک نادات ئەم مافە قۆرغ بکات، ڕێوشوێنی یاسایی بەرامبەر هەر لایەنێک دەگیرێتەبەر کە پێچەوانەی ئەمە مامەڵە بکات.
لە کۆبوونەوەکەدا هەڵوێستی نەگۆڕی حکومەت لەبارەی پرسە پرەنسیپیەکان و ڕەتکردنەوەی دەستدرێژی و بەئامانجگرتنی سەروەریی دەوڵەتان و هەڕەشەی گۆڕینی سیستەمەکانیان و هێرشکردنە سەر تواناکانیان دووپات کراوەتەوە.
کۆبوونەوەکە جەختى کردووە لەوەی هێزە ئەمنییەکان بەپێی دەستوور و یاسا ئەرکە نیشتمانییەکانی خۆیان لە پاراستنی ئاسایش و سەقامگیری جێبەجێ دەکەن. لەنێویشیاندا هێزەکانی حەشدی شەعبی، کە نوێنەرایەتیی یەکێک لە پایەکانی سیستەمی ئاسایشی نیشتمانیمان دەکات. ئەمەش پێویستی بەوەیە کە هەمووان ئەندامانی ئەم پێکهاتە ئەمنییە بپارێزن و ڕێگری بکەن لە هەر لایەنێکی ناو دەستەکە لە دەرەوەی سنووری یاسا مامەڵە بکات.
لەبەر ڕۆشنایی هێرشە ناڕەواکان و پێشێلکارییە قورسەکانی سەروەریی عێراق و بەئامانجگرتنی بارەگا ئەمنییە فەرمییەکان، ئەنجوومەن ئەم بڕیارانەى خوارەوەی دا:
١- ڕووبەڕووبوونەوە و بەرپەرچدانەوەی ئەو هێرشە سەربازییانەی کە لەلایەن فڕۆکە جەنگییەکان و فڕۆکە بێفڕۆکەوانەکانەوە ئەنجام دەدرێن، کە بارەگا و پێکهاتە ئەمنییە فەرمییەکانی حەشدی شەعبی و پێکهاتەکانی تری هێزە چەکدارەکانمان دەکەنە ئامانج. ئەوەش بە کەڵک وەرگرتن لە هەموو ڕێگایەکی بەردەست، بەپێی پرەنسیپی مافی وەڵامدانەوە و بەرگریکردن لە خۆ.
٢- ڕاوەدونانی ئەو کەسانەی بەشداری دەکەن لە هێرشکردنە سەر دامودەزگا ئەمنییەکان و بەرژەوەندیی هاووڵاتیان و نوێنەرایەتییە دیپلۆماسیەکان. ئاشکراکردنی ئەو لایەنانەی پەیوەندییان پێوەی هەیە و گرتنەبەری ڕێکاری یاسایی و جێبەجێکردنی فەرمانی دەستگیرکردن کە لەلایەن دەسەڵاتی دادوەرییەوە دەرچووە.
٣- وەزارەتی دەرەوە ڕێکارە پێویستەکان دەگرێتەبەر بۆ پێشکەشکردنی سکاڵا بە ئەنجوومەنی ئاسایش، سەبارەت بە هەر کردەوەیەکی دەستدرێژی و لێکەوتەکانی، داواکردن بۆ ڕاگرتن و سەرکۆنەکردنی. هاوکات بانگهێشتکردنی کارڕاپەڕێنەرى باڵیۆزخانەى ئەمریکا و باڵیۆزی ئێران بۆ پێشکەشکردنی یاداشتی ناڕەزایەتیی فەرمی سەبارەت بە هێرشەکانی سەر بارەگاکانی حەشدی شەعبی لە پارێزگای ئەنبار و ناوچەکانی تر و بارەگاکانی هێزى پاراستنى هەرێمی کوردستانی عێراق (پێشمەرگە) لە هەولێر.