پەرەگراف- عێراق بە شێوەیەکی فەرمی ئاسمانی خۆی بە ڕووی گەشتە ئاسمانییەکاندا کردەوە دوای ٤٠ ڕۆژ لە ڕاگرتنی، ئەمەش دوای ڕێککەوتنی ئاگربەست لە نێوان ئەمریکا و ئێران بۆ ماوەی دوو هەفتە.
دەسەڵاتی فڕۆکەوانی مەدەنی عێراق پشتڕاستی کردەوە کە ئاسمانی وڵاتەکە دەستبەجێ کراوەتەوە و ڕێگە بە سەرجەم گەشتە مەدەنییەکان دەدرێت دەست پێ بکەنەوە. بڕیارەکە گەڕانەوەی گەشتە نێودەوڵەتییەکان (ترانزێت) و نیشتنەوە و فڕین لە سەرجەم فڕۆکەخانەکانی عێراق دەگرێتەوە، بەگوێرەی ڕێساکانی فڕۆکەوانی و پرۆتۆکۆڵە سەلامەتییەکان.
ئەم کردنەوەیە چەند کاتژمێرێک دوای پێشکەوتنێکی دیپلۆماسی گەورە لە نێوان واشنتن و تاران دێت. بەرەبەیانی ڕۆژی چوارشەممە، دۆناڵد ترەمپ، سەرۆکی ئەمریکا ئاگربەستێکی دوو هەفتەیی لەگەڵ ئێران ڕاگەیاند و وتی: "من ڕەزامەندم لەسەر ڕاگرتنی بۆردومان و هێرشکردنە سەر ئێران بۆ ماوەی دوو هەفتە. ئەمە ئاگربەستێکی دوولایەنە دەبێت" هەروەها ئاماژەی بەوە کرد کە پێشنیازێکی ١٠ خاڵی لەلایەن ئێرانەوە بنەمایەکی کردەیی بۆ دانوستان دەڕەخسێنێت.
بەرپرسانی ئێران ئاگربەستەکەیان پشتڕاستکردەوە و چاوەڕوان دەکرێت دانوستانە فەرمییەکان ڕۆژی هەینی لە ئیسلام ئابادی پایتەختی پاکستان دەست پێ بکەن.
ئەم ڕێککەوتنە تەنها کەمێک پێش کۆتاییهاتنی وادەی دیاریکراوی ئەمریکا هات کە پەیوەست بوو بە کردنەوەی گەرووی هورمز، کە ڕێڕەوێکی گرنگی گواستنەوەی نەوتە لە جیهاندا. ترەمپ پێشتر هۆشداری دابوو لە دەرەنجامی کارەساتبار بۆ ئێران ئەگەر ڕێککەوتن نەکرێت.