پارێزەرەكەی شێروانی هۆشداری دەدات؛ 'حەوت ڕۆژە مانی لە خواردن گرتووە و دۆخی تەندروستیی بەم بێخەمییە مەترسیدارتر دەبێت'
پەرەگراف - مانگرتنى ڕۆژنامەنووس شێروان شێروانى لە خواردن، یەک هەفتەى تێپەڕاند. پارێزەرەکەى لەبارەى دۆخى تەندروستییەوە هۆشدارى دەدات و دەڵێت "لە مەترسیدایە و بەم بێ خەمییەش مەترسیدارتر دەبێت".
محەمەد عەبدوڵڵا، پارێزەرى دۆسیەى شێروان شێروانى، لە ڕاگەیاندراوێکدا دەڵێت "لە ٢٢ـى نیسانی ٢٠٢٦ کە هاوکاتە لەگەڵ ١٢٨ـەمین ساڵیادی ڕۆژنامەگەریی کوردی، ڕۆژنامەنووس شێروان شێروانی مانی لە خواردن گرت و ئەمڕۆ حەوت ڕۆژە ئەم مانگرتنەی بەردەوامە".
پارێزەرى ڕوونى دەکاتەوە کە پەنابردنی ڕۆژنامەنووسەکە بۆ مانگرتن، پەیوەستە بەو "هەموو پێشێلکارییەی بەرانبەری دەکرێت" و دەڵێت "ئێستا دیارترین پێشێلکاری، ڕێگریکردنە لە ئیجازە مەنزلی و گەڕانەوە بۆ ماڵ، بەپێی یاساو هاوشێوەی زیندانییانی تر".
لە ڕاگەیەندراوەکەدا ئاماژە بەوە دراوە کە "بەشێک" لە لایەنە پەیوەندارەکان "هاوکارن و بەخەم دۆخی تەندروستیی شێروان و وەرگرتنی مافە یاسایەکانیەوەن"، بەڵام ڕاگەیەندراوە کە "بەشێکیان ڕێگری دروست دەکەن"، کە پارێزەرەکەى پێى وایە "دەشێت ڕێگرییەکان لەژێر فشاری دەرەوەی دەزگاکانی حکومەت بن".
محەمەد عەبدوڵڵا لەگەڵ هۆشداریدان لەبارەى دۆخى خراپى تەندروستیى ڕۆژنامەنووس شێروانییەوە، جەخت دەکاتەوە کە "ڕێکار و ڕێنمایی و هەوڵی لێبوردووانە، بۆ تێپەڕاندنی ئەم دۆخە و کۆتاییهێنان بەم مانگرتنە پێویستە".