پەرەگراف - وەزارەتى دارایى حکوومەتى هەرێمى کوردستان گەیشتنى گوژمەى یەکەمى تەمویلى مووچەى مانگى چوارى ڕاگەیاند. بڕیارە سبەینێ گوژمەى تەواوکاری بگات و دەست بە دابەشکردنى مووچە بکرێت.
وەزارەتى دارایى و ئابوورى لە ڕاگەیەندراوێکدا دەڵێت "ئەمڕۆ دووشەممە ١١-٠٥-٢٠٢٦، بڕی ٦٦٣ ملیار و ٨٠٥ ملیۆن دینار وەکوو گوژمەى یەکەمى مووچەى مانگى نیسانى فەرمانبەران و خانەنشینانى هەرێمى کوردستان، خراوەتە سەر هەژمارى بانکیى وەزارەت لە لقى هەولێرى بانکى ناوەندیى عێراق".
بەپێى ڕاگەیەندراوى وەزارەتەکە، چاوەڕێ دەکرێت سبەی گوژمەی تەواوکاریی مووچە بگات و دەشڵێت "لەگەڵ گەیشتنی تەواوی تەمویلى مووچە، ڕاستەوخۆ خشتەی مووچە ڕادەگەیەنرێت و دەست بەدابەشکردنی دەکرێت".
ناردنى مووچەى مانگى چوارى هەرێمى کوردستان پاش ئەوە هات کە دوێنىَ وەزارەتى دارایى هەرێم بڕى ٥٠ ملیار و ٢٩٢ ملیۆن دینار داهاتى نانەوتیى ڕادەستى بەغداد کرد.
ماوەى دوو مانگە حکوومەتى هەرێم کەمتر لە نیوەى ١٢٠ ملیار دینارەکەى ڕادەستى بەغدادا کردووە، ئەوەش بەهۆى کەمبوونەوەى داهاتە نانەوتییەکان لە ئەنجامى دۆخى ئاڵۆزى ناوچەکە و پەککەوتنى جووڵەى بازرگانى. حکوومەتى عێراق بە لەبەرچاوگرتنى هۆکارەکان، چاوپۆشیى لە کەمیى داهاتى نانەوتیى هەرێم کردووە و مووچە خەرج کردووە.