پەرەگراف - ئەمیندارى یەکگرتوو دەستپێشخەریى حیزبەکەى بۆ تێپەڕاندنى دۆخى سیاسیى چەقبەستووى هەرێمى کوردستان بردە لاى مەسروور بارزانى و هەردووکیان دەڵێن "جەختمان لە گرنگیی کاراکردنەوەی پەرلەمان کردەوە".
سەڵاحەدین محەمەد بەهادین، ئەمینداری گشتیی یەکگرتووی ئیسلامی کوردستان، دوێنێ دەستپێشخەرییەکەى بردە لاى بافڵ تاڵەبانى، سەرۆکى یەکێتیى نیشتمانى و وەڵامى ئەرێنیى بەشێوەیەکى سەرەتایى وەرگرتووە.
ئەمڕۆیش دواى کۆبوونەوەى لەگەڵ مەسروور بارزانی، سەرۆکی حکومەتی هەرێم و جێگرى دووەمى سەرۆکى پارتى، سەلاحەدین بەهادین دەڵێت "کاک مەسروور بە ڕێز و سوپاسەوە یاداشتەکەی وەرگرت و ئاماژەی بە تەنگژە و ئاستەنگەکان کرد، هاوڕا بوو لەسەر زەرورەتی هەنگاوی کرداری بۆ کاراکردنەوەی پەرلەمان و ڕێکخستنەوەی ناو ماڵی خۆمان".
هەروەها مەسروور بارزانى لەبارەى کۆبوونەوەکەوە دەڵێت "جەختمان لە گرنگیی کاراکردنەوەی پەرلەمانی کوردستان و دامەزراوە یاسایی و دەستوورییەکانی هەرێمی کوردستان کردەوە".
ناوەرۆکى دەستپێشخەرییەکەى یەکگرتوو خۆى دەبینێتەوە نەهێشتنى گرژیى گوتارى میدیایى نێوان پارتى و یەکێتى و ئاساییکردنەوەى دۆخەکە بۆ گفتوگۆ، پاشان کارکردن بۆ کرارکردنەوەى پەرلەمان لە ماوەى یەک مانگدا و پاشان پێکهێنانى حکومەت بە بەشداریى هەموو ئەو لایەنانەى کە دەیانەوێت تێیدا بەشدار بن.