فراکسیۆنى پارتى: پێشوازی لە هەر دەستپێشخەرییەک بۆ کاراکردنەوەی پەرلەمانی کوردستان دەکەین
پەرەگراف - فراکسیۆنى پارتى لە پەرلەمانى کوردستان دەڵێت "پێشوازی لە هەر دەستپێشخەرییەک بۆ کاراکردنەوەی پەرلەمانی کوردستان دەکەین". ئەم پەیامەى فراکسیۆنەکە بەبۆنەى تێپەڕینى ٣٤ ساڵ بەسەر ئەنجامدانى یەکەم هەڵبژاردن لە هەرێمى کورستانە، بەڵام زیاتر لە ساڵێک و شەش مانگ بەسەر دوایین هەڵبژاردندا تێپەڕیوە و هێشتا پەرلەمان کارا نەکراوە و کابینەى دەیەمى حکومەتى هەرێم پێک نەهاتووە.
یەکەم هەڵبژاردنى پەرلەمانى کوردستان لە ١٩-٠٥-١٩٩٢ بەڕێوە چوو. فراکسیۆنی پارتی دیموکراتی کوردستان لە بەیاننامەیەکدا دەڵێت "بە شانازییەوە ئەم یادە مێژووییە دەکەینەوە کە یەکێکە لە گرنگترین وێستگەکانی دامەزراندنی قەوارەی سیاسی و یاسایی و دامەزراوەیی هەرێمی کوردستان".
فراکسیۆنەکە دەشڵێت "پەرلەمانی کوردستان، وەک دامەزراوەی یاسادانان و چاودێری، بنەمایەکی سەرەکییە لەوەی ئیرادەی هاووڵاتیان ببێتە سەرچاوەی دەسەڵات و شەرعیەت. بۆیە پاراستنی پەرلەمان، پاراستنی قەوارەی هەرێم و مافە دەستووریەکانی گەلی کوردستانە لە عێراق، کە بە خەباتێکی دوورودرێژ و قوربانیی بێشومار و پێداگریی گەلەکەمان هاتوونەتەدی".
فراکسیۆنى پارتى، کاراکردنەوەی پەرلەمان بە "پێویستییەکی نیشتمانی و دەستووری و دامەزراوەیى" ناو دەبات و دەڵێت "لەم دۆخە هەستیارەی ناوچەکەماندا، زیاتر لە هەر کاتێک پێویستمان بە پەرلەمانێکی کارا هەیە بۆ پاراستنی بەرژەوەندییە باڵاکانی هەرێمی کوردستان".