ئەنجوومەنى باڵاى دادوەرى دەستبەسەرداگرتنى ٣٧٥ کیلۆگرام زێڕى لە دۆسیەی جومەیلى ڕاگەیاند
پەرەگراف - ئەنجوومەنى باڵاى دادوەریى عێراق دەستبەسەرداگرتن و گەڕاندنەوەی "٣٧٥ کیلۆگرام" زێڕى لە دۆسیەی عەدنان جومەیلى، بریکاری وەزارەتی نەوت ڕاگەیاند.
ئەنجوومەنەکە لە ڕاگەیەندراوێکدا لە زارى دادوەری لێکۆڵینەوە لە دادگای تاوانەکانی ناوەندی بۆ بەرەنگاربوونەوەی گەندەڵی، دەڵێت "بڕی ٣٥٨ کیلۆگرام لەو زێڕە، بە هەماهەنگی لەگەڵ هەرێمی کوردستان و لەژێر سەرپەرشتیی سەرۆکی ئەنجوومەنی باڵای دادوەریدا گەڕێندراوەتەوە".
هەروەها ڕاگەیەندراوە کە ١٧ کیلۆگرام زێڕەکەى دیکە لە دۆسیەیەکی تری لێکۆڵینەوەدا دەستی بەسەردا گیراوە و دەڵێت "بەمەش کۆی گشتیی ئەو زێڕەی کە تا ئەمڕۆ دووشەممە ڕێکەوتی ١٣-٠٧-٢٠٢٦ دەستی بەسەردا گیراوە، گەیشتووەتە ٣٧٥ کیلۆگرام".
ئاماژە بەوە کراوە کە زێڕە دەستبەسەرداگیراوەکە ڕادەستی بەڕێوەبەری گشتیی فەرمانگەی دەرکردن و گەنجینە لە بانکی ناوەندی و یاریدەدەرەکەی کراوە. ئەمەش لە چوارچێوەی ئەو هەوڵانەدایە کە بۆ تەواوکردنی لێکۆڵینەوەکان لە دۆسیەی تۆمەتباری دەستبەسەرکراو (عەدنان جومەیلی)، بریکاری وەزارەتی نەوت بۆ کاروباری پاڵاوتن، دەدرێن.