وەزارەتى دارایى هەرێم گەیشتنى زیاتر لە ٨٤١ ملیار دینارى بۆ مووچەى مانگى شەش ڕاگەیاند
پەرەگراف - وەزارەتى دارایى هەرێمى کوردستان گەیشتنى زیاتر لە ٨٤١ ملیار دینارى بۆ مووچەى مانگى شەش ڕاگەیاند و دەڵێت "لە نزیکترین کاتدا دەست بەدابەشکردنی مووچە دەکرێت".
وەزارەتەکە ئاماژەى بەوە کردووە کە "وەزارەتی دارایی فیدراڵ بڕی ١٢٠ ملیار دیناری وەک پشکی گەنجینەی فیدراڵی لە داهاتی نانەوتی هەرێم بۆ مانگی حوزەیران لە کۆی تەمویلی مووچە بڕیوە، ئەمە سەرەڕای ئەوەی بڕی زیاتر لە سێ ملیار و ٣٢٦ ملیۆن دیناری لە تەمویلی مووچەی مانگی حوزەیران نەناردووە، کە مووچەی مانگەکانی ڕابردووی خانەنشینانی شارستانی و سەربازییە".
دەقى ڕاگەیەندراوى وەزاەتى دارایى:
تەمویلی مووچەی مانگی حوزەیران خرایە سەر هەژماری بانکی وەزارەتی دارایی.
کەمێک لەمەوبەر بڕی (٨٤١,١٦١,٠٠٠,٠٠٠) بڕی هەشت سەدو چل و یەک ملیارو سەدو شەست و یەک ملیۆن دینار وەک تەمویلی مووچەی مانگی حوزەیرانی فەرمانبەران و مووچەخۆرانی هەرێمی کوردستان خرایە سەر هەژماری بانکی وەزارەتی دارایی و ئابووری هەرێمی کوردستان لە لقی هەولێری بانکی ناوەندی عێراق.
هاوشێوەی مانگی ڕابردوو وەزارەتی دارایی فیدراڵ بڕی (١٢٠,٠٠٠,٠٠٠,٠٠٠) سەدو بیست ملیار دیناری وەک پشکی گەنجینەی فیدراڵی لە داهاتی نانەوتی هەرێم بۆ مانگی حوزەیران لە کۆی تەمویلی مووچە بڕیوە.
ئەوە سەرەڕای ئەوەی بڕی (٣,٣٢٦,٩٣١,٠٠٠) سێ ملیارو سێ سەدو بیست و شەش ملیۆن و نۆسەدو سی و یەک هەزار دیناری لە تەمویلی مووچەی مانگی حوزەیران نەناردووە کە بریتییە لە شایستەی مووچەی مانگەکانی ڕابردووی خانەنشینانی شارستانی و سەربازی.
تێبینی؛ دوای تەواوکردنی ڕێکارەکان و وەرگرتنی پارەکە بەشێوەی کاش لە لقی هەولێری بانکی ناوەندی عێراق ڕاستەوخۆ لیستی مووچە بڵاو دەکرێتەوەو لە نزیکترین کاتدا دەست بەدابەشکردنی مووچەی مانگی حوزەیران دەکرێت.
ڕاگەیاندنی وەزارەتی دارایی و ئابووری.
١٣ ی تەمووزی ٢٠٢٦