لێدوانی مەسروور بارزانی لەسەر پەیوەندییەكان لەگەڵ بەغداد، كێشەی سووتەمەنی و پێكهێنانی حكومەت
.jpg)
پەرەگراف - مەسروور بارزانى داوا لە هەموو لایەنەکان دەکات "بێنە پێشەوە بۆ کۆبوونەوەى پەرلەمان و پێکهێنانى حکومەتێکى سەرتاسەرى". سەبارەت بە کێشەى بەنزینیش دەڵێت "پێدانى تەنیا ٥٠ هەزار بەرمیل نەوت بۆ پێداویستیى ناوخۆ نادادپەروەرانەیە و دەبێت ١٢٦ هەزار بەرمیل نەوت بۆ بە هەرێمى کوردستان بدرێت".
مەسروور بارزانى، سەرۆکى حکومەتى هەرێمى کوردستان، لە کۆنگرەیەکى ڕۆژنامەوانیدا لە شارى هەولێر، سەبارەت بە پەیوەندییەکان لەگەڵ بەغداد، کێشەى سووتەمەنى، کاراکردنەوەى پەرلەمان و پێکهێنانى حکومەت قسەى بۆ ڕۆژنامەنووسان کرد.
سەرۆکى حکومەتى هەرێم وتى "ئێستا لە هەموو بوارەکاندا هەماهەنگیى زیاترمان لەگەڵ بەغداد هەیە و لە پەیوەندییەکانمان لەگەڵ بەغداد ڕازى و خۆشحاڵین".
دەربارەى کێشەکانى ناوخۆى هەرێمیش مەسروور بارزانى وتى "پێویستە پەرلەمان کارا بکرێتەوە و حکومەتێکى سەرتاسەرى پێک بێت". داوایش لە هەموو لایەنەکان کرد کە "بێنە پێشەوە بۆ کاراکردنەوەى پەرلەمان و پێکهێنانى حکومەت".
سەبارەت بە کێشەى سووتەمەنى بەتایبەت بەنزین، سەرۆکی حکومەت ڕایگەیاند ئەمڕۆ "کۆبوونەوەیەکى تێروتەسەل" یان لەگەڵ وەزارەتى سامانە سروشتییەکان و لایەنە پەیوەندیدارەکان هەبووە، بەڵام باسى لە بوونى هیچ ڕێگەچارە یان بڕیارێکى نوێ نەکرد.
مەسروور بارزانى ئاماژەى بەوە کرد کە عێراق ڕۆژانە یەک ملیۆن بەرمیل نەوت بۆ پێداویستیى ناوخۆ دادەنێت. بە قسەى ئەو، بەپێى ڕێژەى پشکى هەرێم کە ١٢.٦٧ـە، "دەبێت ١٢٦ هەزار و ٧٠٠ بەرمیل نەوت بۆ پێداویستیى ناوخۆ بە هەرێم بدرێت".
سەرۆکى حکومەتى هەرێم جەختى کردەوە کە "پێدانى تەنیا ٥٠ هەزار بەرمیل نەوت بۆ پێداویستیى ناوخۆ سەپێندرا و نادادپەروەرانەیە".