پەرەگراف - وەزیرى دەرەوەى ئێران پەیوەندییەکى تەلەفۆنیى لەگەڵ سەرۆکى یەکێتى ئەنجام دا و بانگهێشتى کرد بۆ تاران. بافڵ تاڵەبانى دەڵێت "دیالۆگ و پەیوەندییە دیپلۆماسییەکان، کاریگەرترین ڕێگان بۆ هێورکردنەوەی ئاڵۆزییەکان".
بەپێى ڕاگەیەندراوى نووسینگەى سەرۆکى یەکێتیى نیشتمانى، بافڵ تاڵەبانی پەیوەندییەکی تەلەفۆنیی لەلایەن عەباس عێراقچی، وەزیری دەرەوەی ئێرانەوە پێ گەیشتووە. هەردوولا بیروڕایان دەربارەی "دواپێشهاتە ئەمنی، سیاسی و ئابوورییەکان" ـی ناوچەکە ئاڵوگۆڕ کردووە و تاوتوێی "ڕێگەچارەکانی کۆتاییهێنان بە ئاڵۆزییەکان" ـی ئێستایان کردووە.
بەپێى ڕاگەیەندراوەکە "هەردوولا جەختیان لە گرنگیی پاراستنی ئاشتی و سەقامگیری و بەهێزکردنی هەماهەنگی لە ڕووبەڕووبوونەوەی ئاڵەنگارییە هاوبەشەکاندا" کردووەتەوە. سەرۆکى یەکێتى جەختی لە "گرنگیی بەردەوامیی دیالۆگ و پەیوەندییە دیپلۆماسییەکان وەک کاریگەرترین ڕێگا بەرەو هێورکردنەوەی ئاڵۆزییەکان، گەڕاندنەوەی ئاشتی و سەقامگیری کردەوە".
بافڵ تاڵەبانى دەستخۆشیی لە عەباس عێراقچی کردووە بۆ "هەوڵە بەردەوامە دیپلۆماسی و بنیاتنەرەکانی لە گەڕان بەدوای چارەسەری ئاشتییانە بۆ ململانێکان و سەقامگیرییەکی فراوانتردا".
"پەیوەندیی مێژوویی ستراتیژیی" نێوان یەکێتی و ئێران، تەوەرێکى دیکەى گفتوگۆ تەلەفۆنییەکە بووە، کە هەردوولا "پابەندبوونی خۆیان بۆ بەهێزکردنی زیاتری پەیوەندییە دووقۆڵییەکان و هەماهەنگی لەسەر بنەمای بەرژەوەندیی هاوبەش، دراوسێیەتی باش و سەقامگیریی ناوچەکە" دووپات کردووەتەوە.
"لە درێژەی گفتوگۆکاندا، وەزیری دەرەوەی ئێران بانگهێشتی سەرۆک بافڵی کرد بۆ تاران بەمەبەستی گفتوگۆی زیاتر لەسەر لێکەوتە ئەمنی و ئابوورییەکانی ململانێکان لەسەر ئاستی ناوچەکە و نێودەوڵەتی"، نووسینگەى سەرۆکى یەکێتى لە کۆتایى ڕاگەیەندراوەکەیدا وا دەڵێت.