پەرلەمانتارانى کورد دوو هەوڵى جیاوازیان بۆ چارەسەرى کێشەى بەنزین لە پەرلەمانى عێراق دەست پێ کرد
پەرەگراف - پەرلەمانتارانى کورد دوو هەوڵى جیاوازیان بۆ چارەسەرى کێشەى بەنزین لە پەرلەمانى عێراق دەست پێ کرد. زیادکردنى پشکى نەوتى خاوى هەرێم لە ٥٠ بۆ ١٤٠ هەزار بەرمیلى ڕۆژانە پرۆژەى پەرلەمانتارێکى پارتییە، ڕادەستکردنەوەى ٥٠ هەزار بەرمیلەکە و دابینکردنى بەنزین و گازوایل و نەوتی سپی لەلایەن عێراقەوە پرۆژەى پەرلەمانتارێکى نەوەى نوێیە.
کاوە عەبدولقادر، پەرلەمانتارى نەوەى نوێ، نووسراوێکى بە واژووى ١٠١ پەرلەمانتارەوە ئاراستەى سەرۆکایەتیى پەرلەمانى عێراق کردووە. تێیدا ئاماژە بە ئامادەیی دەربڕیى وەزارەتی نەوتی عێراق، داوا دەکات ئەو ٥٠ هەزار بەرمیل نەوتەى بۆ پێداویستیى ناوخۆ بە هەرێمى کوردستان دراوە، وەربگیرێتەوە و وەزارەتى نەوت پابەند بکرێت بە دابینکردنى (بەنزین، گازوایل و نەوتی سپی) بۆ پارێزگاکانی هەرێمی کوردستان، هاوشێوەى پارێزگاکانى دیکەى عێراق.
نووسراوەکە جەختى کردووەتەوە لە گرتنەبەری تەواوی ڕێکارە پێویستەکان بۆ یەکخستنی نرخی بەرهەمە نەوتییەکان، بە جۆرێک سووتەمەنى بە نرخى پاڵپشتیکراو بۆ هاووڵاتیانى هەرێمیش دابین بکرێت، بەتایبەت بەنزینى ٤٥٠ دینارى کە هاووڵاتیانى ناوەڕاست و خوارووى عێراق لێى سوودمەندن.
لە هەوڵى دووەمدا، سیپان شێروانى، پەرلەمانتارى پارتى، نووسراوێکى بە واژووى ١٤٩ پەرلەمانتارەوە ئاراستەى سەرۆکایەتیى پەرلەمان کردووە و تێیدا هاتووە "ئێمەی واژووکەرانی خوارەوە لە ئەندامانی ئەنجوومەنی نوێنەران، داوای زیادکردنی پشکی هەرێمی کوردستان لە نەوتی خاو کە بۆ بەکاربردنی ناوخۆیی تەرخانکراوە دەکەین، لە (٥٠,٠٠٠) بەرمیلەوە بۆ (١٤٠,٠٠٠) بەرمیل لە ڕۆژێکدا، بەشێوەیەک کە لەگەڵ ڕێژەی دانیشتووانی هەرێم بگونجێت کە نزیکەی ١٤٪ی کۆی گشتی دانیشتووانی عێراقە".
هەروەها بژاردەیەکى دیکەى پێشنیازەکە ئەوەیە کە قەرەبووى هەرێم لەو کورتهێنانەدا بە بەرهەمی بەنزین بکرێتەوە لەبرى زیادکردنى نەوتى خاو.
سیپان شێروانى دەڵێت "ئەو پشکەی بۆ هەرێمی کوردستان تەرخا نکراوە، لەگەڵ ڕێژەی دانیشتووان و پێویستییە ڕاستەقینەکانی ناگونجێت. بۆیە داوا لە بەڕێزتان دەکەین فەرمان بکەن بە گرتنەبەری ڕێکاری پێویست و بەپەلە بۆ چارەسەرکردنی قەیرانی بەنزین لە هەرێمی کوردستان".