ئێران بێئاگایی لە هێرشەكەی سەر نووسینگەی مەسروور بارزانی دەردەبڕیت و بە تیرۆریستی ناوی دەبات
پەرەگراف - وەزارەتی دەرەوەی ئێران هێرشەکەی سەر نووسینگەی مەسروور بارزانی بە "پیلانگێڕی و کردەوەی تیرۆریستی" ناو دەبات. وەزیری دەرەوەی ئەو وڵاتەش دەڵێت "هیچ پاساوێک بۆ ئەنجامدانی هێرشێکی ناعەقڵانیی لەو شێوە بوونی نییە".
هەریەک لە فوئاد حسێن، وەزیری دەرەوەی عێراق و عەباس عێراقچی، وەزیری دەرەوەی ئێران، پەیوەندییەکی تەلەفۆنییان دەربارەی هێرشەکە ئەنجام دا. بەپێی ڕاگەیەندراوی وەزارەتی دەرەوەی عێراق، عەباس عێراقچی "سەرسوڕمان" ـی خۆی لە ڕوودانی هێرشێکی لەو شێوەیە دەربڕیوە و ڕایگەیاندووە کە "هیچ زانیارییەک" یان لەبەردەستدا نییە کە هێرشەکان لەناو خاکی ئێرانەوە ئەنجام درابن
وەزارەتی دەرەوەی عێراق دەشڵێت "عێراقچی جەختی کردەوە هیچ پاساوێک بۆ کارێکی لەو شێوەیە نییە، بەتایبەت لە سایەی ئەو پەیوەندییە ئەرێنی و پتەوانەی کە حکومەتی ئێران لەگەڵ حکومەتی هەرێمی کوردستان و بەتایبەتی لەگەڵ هەردوو پارتە سەرەکییەکەی هەرێمدا هەیەتی".
لە کۆتایی پەیوەندییەکەدا، فوئاد حسێن داوای لە لایەنی ئێرانی کردووە هەڵوێستێکی فەرمی دەربارەی ڕووداوەکە ڕابگەیەنن و تێیدا ڕوانگەی کۆماری ئیسلامیی ئێران سەبارەت بەو هێرشە و ئەو لایەن و هۆکارانەی لە پشتیەوەن، ڕوون بکەنەوە.
دوای ڕاگەیەندراوەکەی وەزارەتی دەرەوەی عێراق، وەزارەتی دەرەوەی ئێران ڕایگەیاند "عەباس عێراقچی لە پەیوەندییە تەلەفۆنییەکەدا جەختی لەسەر هۆشیاری بەرانبەر کردەوە تیرۆریستیەکان کردەوە، لەوانەش هێرش بۆ سەر نووسینگەی سەرۆکی حکومەتی هەرێمی کوردستان و ئەو پیلانگێڕییانەی زیان بە برایەتیی نێوان هەردوو وڵات دەگەیەنن".
دواتر لە نووسینێکدا لە سەکۆی ئێکس، عەباس عێراقچی ڕاتیگەیاند کە "هیچ پاساوێک بۆ ئەو هێرشە ناعەقڵانییە بوونی نییە". دەشڵێت "ئامانجی ئەو ئۆپەراسیۆنە چەواشەکارانە، دروستکردنی ناکۆکییە لەنێوان دراوسێکان. پێویستە دۆستە کوردەکانمان بەرانبەر تەڵە و فێڵەکان هۆشیار بن".