بەڕێوەبەری فەرمانگەی ژینگەی سلێمانی: زیانی ئاگرەکانی سلێمانی زیاتر لە حەوت ملیار دینار و ٣٢ بریندارە
پەرەگراف - بەڕێوەبەری فەرمانگەی ژینگەی سلێمانی زیانی ئاگرەکانی سلێمانی بە "زیاتر لە حەوت ملیار دینار و برینداربوونی ٣٢ کەس" ڕادەگەیەنێت. دەشڵێت "بەداخەوە سەیفتی لە کوردستان نەک گرنگی پێ نادرێت، بەڵکو لایەنەکانی چێککردنەوەی سەیفتی لە حکومەت و کەرتی تایبەت دژایەتیان دەکرێت".
شایی ئاوات، بەڕێوەبەری فەرمانگەی ژینگەی پارێزگای سلێمانی، هەر سەبارەت بە زیانەکان دەڵێت "ئەمە جگە لەو زیانە زۆرەی بە ژینگە و هەوای سلێمانی گەیشتووە، کە ئەگەر لایەنە ماددییەکە بە تێپەڕینی کات قەرەبوو بکرێتەوە، زیانەکانی ژینگە درێژخایەنە و قەرەبوو ناکرێتەوە".
بەڕێوەبەری فەرمانگەی ژینگەی سلێمانی پێشنیاز بۆ قوباد تاڵەبانی، جێگری سەرۆکی حکومەتی هەرێم دەکات کە بە قسەی ئەو "وەک خەمخۆری ژینگە ناسراوە"، بە فەرمانێک "بڕیاری کاراکردنی سستمەکانی سەیفتی بدات و کۆمپانیا خاوەن مۆڵەتەکانی چێککردنەوەی سەیفتی و کەرتی حکومی پەیوەندیدار ڕاسپێرێت بەبێ جیاوازی چێککردنەوەی ورد دەست پێ بکەن و خاتری کەس نەگرن".
لەماوەی کەمتر لە ٢٤ کاتژمێردا دوو ئاگری گەورە لە سلێمانی کەوتنەوە، کە هەردووکیان لە سووتەمەنیدا بوو. ئاگری یەکەم سووتانی کۆگایەکی سووتەمەنی لە ناوچەی تانجەرۆ بوو و بەهۆیەوە زیاتر لە سێ ملیۆن لیتر بەنزین و گاز سووتا. بەپێی ئاماری بەرگریی شارستانیش "٢٢" کەس بریندار بوون. ئاگری دووەمیش سووتانی تانکەرێک بوو لە کاتی خاڵیکردنی بەنزیندا لەناو بینای پارێزگای سلێمانی. جگە لە زیانی ماددی، هیچ زیانێکی گیانی ڕانەگەیەندرا.