پەرەگراف
گۆڕان لە یادی 25-7دا دەڵێت، بزوتنەوەكەیان پڕۆژەیەكی سیاسییە بۆ ئێستا و داهاتوی هەرێمی كوردستان‌و ڕۆژ دوای ڕۆژ زەرورییەتی جێبەجێكردنی زیاتر دەبێت‌و بووە بە خواستێكی گشتگیرو تەنانەت وڵاتانی هاوپەیمانیش فشار بۆ جێبەجێكردنی دەكەن.
سبەینێ (25-7) 12 هەمین ساڵیادی یەكەم بەشداری گۆڕانە لە هەڵبژاردنی پەرلەمانی كوردستان كە تێیدا بزووتنەوەكە 25 كورسیی بەدەستهێنا.
گۆڕان لەم ماوەیەدا ئەزمونی خۆی لە ئۆپۆزسیۆن‌و دەسەڵات تاقیكردوەتەوە، لە ڕاگەیەندراوەكەی ئەمڕۆیدا دەڵێت "لە ئۆپۆزسیۆن‌و چوونە دەسەڵات ئامانجمان خزمەتكردنی خەڵك بووە و جێبەجێكردنی بەرنامە سیاسیەكەی بو، بەڵام واقع و دۆخی شێواوی كایەی سیاسیی لە عێراق و هەرێم دەرفەتی نەداوە وەك پێویست گۆڕانكارییەكان بچەسپێت".
گۆڕان بۆ هەڵبژاردنی پێشوەختەی پەرلەمانی عێراق كە بڕیارە لە 10-10 بەڕێوەبچێت، لەگەڵ یەكێتی هاوپەیمانیی پێكهێناوەو بە 7 كاندید لە هەرێمی كوردستان‌و ناوچەكانی جێناكۆك بەشدارە لە هاوپەیمانییەكەدا.
دەقی ڕاگەیەندراوەكەی ئەمڕۆی گۆڕان
٢٥ی ٧ رۆژی ئیرادەی گەلێك بۆ دادپەروەری
هاونیشتیمانیانی كوردستان..
هەڵسوڕاو و گۆڕانخوازانی پڕ ئیرادە..
(١٢)ساڵ لەمەوبەر و لە (٢٥ی٧ی٢٠٠٩)، لیستی گۆڕان لە هەڵبژاردنی خولی سێیەمی پەرلەمانی كوردستان سەركەوتنێكی گەورەی بە پشتیوانی و دەنگی خەڵك بەدەستهێنا. ئەو رۆژە لە مێژوی هاوچەرخی هەرێمی كوردستان وەك جەژنی دیموكراسی و دروستبونی هێزێكی مەدەنی بەرگریكار لە خواست و داواكارییەكانی خەڵك ناسرا. هێزێك لە رێی سندوقی دەنگدان و ململانێی مەدەنی خەباتی بۆ سەروەری یاسا، بەگژداچونەوەی گەندەڵی، دادی كۆمەڵایەتی، شەفافیەت و بەرفراوانكردنی ئازادییەكان دەستپێكرد. ئەمەش بووە وەرچەرخانێكی سیاسیی گرنگ لە نەخشەی سیاسیی ھەرێمی كوردستان.
ئێمە لەكاتێكدا ئەو یاد و مێژوە پڕشنگدارە بە بیر خەڵك و گۆڕانخوازانی كوردستان دەهێنینەوە، جەخت لەوە دەكەینەوە بزوتنەوەی گۆڕان پڕۆژەی سیاسیە بۆ ئێستا و داهاتوی هەرێمی كوردستان، پڕۆژەیەك هەڵقوڵاوی داخوازییەكانی هاونیشتمانیان و وەڵامدەرەوەی پێداویستیە دیموكراتیەكانە، پڕۆژەیەك رۆژ دوای رۆژ زەرورییەتی جێبەجێكردنی بۆ چارەسەركردنی كێشە بنەڕەتیەكانی هەرێمی كوردستان زیاتر دەبێت، هەر ئەم فاكتەرەش وای كردوە بەرنامەی سیاسیی بزوتنەوەی گۆڕان ببێتە خواستێكی گشتگیر و تەنانەت ئێستا وڵاتانی هاوپەیمانیش فشار بۆ جێبەجێكردنی بكەن.
ئەزمونی سەركەوتوی بزوتنەوەی گۆڕان لە هەڵبژاردنی پەرلەمانی كوردستاندا؛ دەرخەری چەندین لێكەوتی ئەرێنی بو لە كایەی حوكمڕانی و گۆڕانكاری لە نەریتی سیاسیی، لەوانە بەها و نرخی دەنگی هاوڵاتیان زیادی كرد، كاركردنی راستەوخۆ لەسەر كێشە و داخوازییەكانی خەڵك بوە پێشمەرجی كاری سیاسیی، بازنەكانی هۆشیاری سیاسیی لای هاونیشتمانیان فراوان بو، پەیبردن بە ئەرك و مافە سەرەتاییەكان بەرەوپێشچو، تا ئاستێكی باش خەباتی پەرلەمانی و گفتوگۆی كراوە و وتوێژی بەردەوام جێی بە ململانێی چەكداری و بەكاربردنی رێگەچارەی توندوتیژی بۆ سەپاندنی بیروڕا لەق كرد، داكۆكیكردن لە ماف و ئازادییەكان چووە قۆناغی راستەقینەوە، تەرازوی هێزی خەڵك بەسەر دەسەڵاتی حیزبەكان بەهێزتر بو.
هاونیشتمانیان و گۆڕانخوازان..
جەژنی دیموكراسی خەڵكی كوردستان لە ٢٥ی٧ی٢٠٠٩دا، چیرۆكی سەركەوتنی ئیرادەی هاوڵاتیان و هەمو ئەو دەنگدەر و پشتیوان و هەڵسوڕاوانەیە كە بەگیانی بەرزی نیشتمانی و چاكسازییەوە پشتیوانیان لە بزوتنەوەی گۆڕان كرد، هەربۆیە ئەمڕۆ رۆژی شانازییە بۆ نەتەوەیەكی زیندو كە دەتوانێت گۆڕانكاری لەسەر شانۆی سیاسیی بكات و بە دیدێكی نەتەوەیی و دیموكراتیانە هەنگاو بۆ ئایندەیەكی پڕشنگدارتر بنێت. بزوتنەوەی گۆڕان لە ئەزمونی ئۆپۆزسیۆنی و لە قۆناغی چونە دەسەڵاتیش ئامانجی خزمەتكردنی خەڵك و جێبەجێكردنی بەرنامە سیاسیەكەی بو، بەڵام واقع و دۆخی شێواوی كایەی سیاسیی لە عێراق و هەرێم دەرفەتی نەداوە وەك پێویست گۆڕانكارییەكان بچەسپێت.
هەربۆیە سەركەوتنی بەرنامەی سیاسیی گۆڕان، بەندە بە زیادبونی پشتگیری جەماوەری و فشاری زیاتری دامەزراوەكانی چاودێری و لێپرسینەوە بۆ پەیڕەوكردنی چاكسازی گشتگیر و هەمەلایەن، هاوكاتیش بۆ بە نیشتیمانیكردنی دامەزراوەكان، بۆ سەربەخۆكردنی دادگاكان، بۆ راهێنان و یەكخستنەوەی هێزەكانی پێشمەرگە و ئاسایش و پۆلیس وەك هێزی نیشتیمانی دابڕاو لە حیزب، بۆ شەفافیەت لە داهات و چۆنیەتی خەرجكردنی، بۆ حكومەتی هاوڵاتی و مامەڵەكردنی یاسایی لەسەر بنچینەیی هاوڵاتیبون، بۆ ئازادی تاك و چەسپاندنی سیستمی دیموكراتی لەناوخۆدا، بۆ بەهێزكردنەوەی پەیكەرەی كۆمەڵایەتی و قەوارەی سیاسیی ھەرێم، بۆ بیناكردنەوەی متمانەی ناوخۆیی و بەهێزكردنەوەی تواناكانی بەرەنگاری بەرامبەر ئەو ئاڵنگاری و مەترسیانەی روبەڕوومان دەبێتەوە.
لەم یادە پڕ شكۆیەدا، ئەوەش بە بیر دەهێنینەوە نەتەوەكەمان لەبەردەم هەڵبژاردنێكی چارەنوسسازی ئەنجومەنی نوێنەرانی عێراقە، ئەم هەڵبژاردنەش لە كاتێكدایە كە دۆخی سیاسیی و ئیداری و ئەمنی و خزمەتگوزاری و سەقامگیری عێراق خراپە، لەناو ئەم هاوكێشە ئاڵۆزەدا كێشە بنەڕەتیەكانی كورد لەوانە مادەی (١٤٠) و مەلەفەكانی پێشمەرگە و دارایی و سەرچاوە سروشتیەكان بە چارەسەرنەكراوی و هەڵپەسێردراوی ماوەتەوە، هەربۆیە یەكڕیزی ھێزە كوردستانیەكان و داڕشتنەوەی گوتاری كوردستانی بە دیدێكی نیشتیمانی و پەیڕەوكردنی سیاسەتێكی هاوسەنگ پێویستیەكی لە پێشینەی ئەم قۆناغەیە؛ بەشێوەیەك بتوانین بون و پێگەی خۆمان لە عێراق و پردی پەیوەندیمان لەگەڵ نەتەوە و پێكھاتە و نوێنەرەكانیان بەهێزتر بكەین، تا بەو دیدە داكۆكی لە مافە بە دەستھاتوەكانی كورد لە دەستور و زامنی ژیانێكی شایستە بۆ ھاوڵاتیان بكەین.
بزوتنەوەی گۆڕان
٢٤ی٧ی٢٠٢١