كەسێكی دیكە لە ئێران بە كۆرۆنا گیانی لەدەستداو لە زۆربەی پارێزگاكان پشوو ڕاگەیەندرا
پەرەگراف
كەسێكی دیكە لە ئێران بە كۆرۆنا گیانی لەدەستداو ژمارەی مردووان بەو ڤایرۆسە بۆ 6 كەس بەرزبوونەوە، مەترسیی ڤایرۆسەكە لەسەر ئەو وڵاتە زیاتر تەشەنەی سەندووەو لە قوتابخانەو زانكۆكانی زۆربەی پارێزگاكانی ئێران لە ناویاندا لە ڕۆژهەڵاتی كوردستان پشوو ڕاگەیەندرا.
وەزارەتی تەندروستیی ئێران، گیان لەدەستدانی شەشەم كەسی بە ڤایرۆسی كۆرۆنا ڕاگەیاند، ئەو كەسە لە پارێزگای مەركەزی ئەو وڵاتە مردووە، تائێستا نزیكەی 800 كەس خراونەتە ژێر چاودێریی‌و 28 كەسیان پشتڕاست كراونەتەوە كە تووشی كۆرۆنا بوون.
بەهۆی مەترسیی ڤایرۆسەكەوە لە قوتابخانەو زانكۆكانی زۆربەی پارێزگاكانی ئێران پشوو ڕاگەیەندرا، لەوانەش؛ تاران، ئەلبورز، قەزوین، مەركەزی، قوم، هەمەدان، ئەسفەهان، گیلان، مازندەران، سنە‌و كرماشان.
لە دوای چین ئێران دووەم وڵاتە لە زۆری ژمارەی مردن بە ڤایرۆسی كۆرۆنا.
ژمارەی تووشبووانیش لە ئێران تەنها ئەمڕۆ 10 كەس تۆمار كراوە بەوەش زیاتر لەسەدا 50 بەرزبووەتەوە بەراورد بە دوێنێ كە 18 تووشبوو هەبوون.
یەكەم حاڵەت لە ئێران لە شاری قوم تۆمار كرا، ئێستا بڵاوبوونەوەی ڤایرۆسەكە چەندین پارێزگای گرتووەتەوە لەوانەش تارانی پایتەخت، بەرپرسانی ئێران نیگەرانن لەوەی كۆرۆنا بە تەواوی وڵاتەكەیاندا بڵاوبووبێتەوە.
سەدان كەس لەژێر چاودێریی پزیشك‌و لە نەخۆشخانەكانی ئێراندان بە گومانی تووشبوونیان بە كۆرۆنا، بەڵام هێشتا پشتڕاست نەكراونەتەوە.
مردن بە كۆرۆنا لە ئێران ڕێژەیەكی بەرزی هەیەو نزیكەی لەسەدا 20ی تووشبووان دەمرن بەپێی ئەو ئامارە فەرمییانەی ڕاگەیەندراوە، ئەوە لەكاتێكدایە لە چین كە سەرچاوەی بڵاوبوونەوەو گەشەی ڤایرۆسەكەیەو زۆرترین تووشبووان‌و مردووان بە ڤایرۆسەكە لەو وڵاتەن، ئەوانەی دەمرن كەمترە لە لەسەدا 3ی ژمارەی تووشبووان ئەوەش بەپێی ئامارە فەرمییەكان. هئێشتا ڕوون نییە بۆچی ڕێژەی مردن بەو ڤایرۆسە لە ئێران هێندە بەرزەو بەرپرسانی تەندروستی ئەو وڵاتە ڕوونكردنەوەیان لەوبارەیەوە نەداوە.
بۆ ڕێگریی لە گواستنەوەی ڤایرۆسەكە، هەرێمی كوردستان وەك دراوسێی ئێران لە سەرجەم دەروازە سنورییەكانەوە ھاتووچۆی لەگەڵ ئەو وڵاتەدا ڕاگرتووە. تەنھا ئەو ھاووڵاتییانەی ھەرێم كە ئێستا لە ئێرانن ڕێگەیان پێدەدرێت بێنەوە ناو ھەرێم، ئەوەش دوای ئەنجامدانی پشكنین و خستنە ژێر چاودێریی تەندروستییەوە بۆماوەی دوو ھەفتە.
ئەمڕۆش كۆبوونەوەیەكی باڵای حكومەتی هەرێم لەسەر ئەو پرسە ئەنجامدرا، وەزیرانی ناوخۆو تەندروستی‌و پارێزگارەكان‌و وتەبێژی حكومەت بەشداربوون، لە كۆنگرەیەكی ڕۆژنامەوانییدا دڵنیایی درا كە ڕێوشوێنی پێویست گیراوەتەبەر.
د.سامان بەرزنجی، وەزیری تەندروستی ئەوەی خستە ڕوو، هیچ كەسێك بە گومانی كۆرۆنا لە نەخۆشخانەكاندا نییەو چۆڵكردنی بەشێك لە نەخۆشخانەكان تەنیا ئامادەكارییە بۆ دۆخێكی نەخوازراو.
هەروەها رێبەر ئەحمەد، وەزیری ناوخۆی هەرێم باسی لەوە كرد، ئەوەی پێویستە بۆ ڕێگریكردن لە گەیشتنی ئەو ڤایرۆسە بە هەرێمی كوردستان‌و ئەوەی لەتوانای ئەواندابێت جێبەجێی دەكەن، وتی"ئەوەی دیكەش داوای هاوكاریمان كردووە هەم لە حكومەتی فیدراڵ هەمیش لە ئۆرگانەكانی نەتەوەیەكگرتووەكان بە تایبەتی ڕێكخراوی تەندروستی جیهانی كە لە ڕێگەی وەزارەتی تەندروستییەوە ڕۆژانە، تەنانەت هەموو كاتژمێرێك ئەوان ئاگایان لە وردەكارییەكانی نێودەوڵەتی هەیە لەبارەی ڤایرۆسی كۆرۆناو ئەوەی لە دەوروبەری ئێمە دەگوزەرێت".
ڤایرۆسەكە لەسەر ئاستی جیهان بەدەوامە لە بڵاوبوونەوە، ئەمڕۆش ڕێژەیەكی بەرزی تووشبوون لە كۆریای باشور تۆماركرا كە 229 حاڵەتی نوێ بوو لە ماوەی تەنها ڕۆژێكدا، بەوەش ژمارەی تووشبووان بۆ زیاتر لە دوو ئەوەندە بەرزبوونەوەو گەیشتنە 433 حاڵەت.
لەسەر ئاستی جیهان ژمارەی تووشبووان نزیك بووەتەوە لە 78 هەزار كەس كە زۆربەی هەرە زۆریان لە چینن‌و دوای چین، یابان بە پلەی دووەم دێت كە 751 تووشبووی هەیە، ژمارەی مردووانیش بەو ڤایرۆسە نزیكەی 2 هەزارو 370 كەسن كە 18یان لە دەرەوەی چینن‌و دوای چین ئێران پلەی دووەمی هەیە لە تۆماركردنی مردن بە كۆرۆنا، ڤایرۆسەكە لە زیاتر لە 25 وڵات بڵاوبووەتەوە.
مەترسیی ڤایرۆسەكە وایكردووە، ڕێكخراوی تەندروستی جیهانیی بۆ پێنجهەمین جار لە مێژوویدا باری لەناكاوی لە سەرتاسەری دونیا ڕاگەیاندووە.
دەربارەی ڤایرۆسی كۆرۆناو خۆپاراستن لێی