دواین بڕیار لەبارەی نرخی نانەوە؛ وەڵامی نانەواخانەكانی سلێمانی بۆ بڕیاری قائیمقامیەت چییە؟
پەرەگراف
قائیمقامیەتی سلێمانی جەخت دەكاتەوە كە نرخی نان وەكو خۆی دەمێنێتەوە و "هەشت نان بە هەزار دینار دەبێت"، لە بەرانبەردا خاوەنی نانەواخانەكان ڕایانگەیاند ئەو بڕیارەی قائیمقامیەت تاكلایەنەیە و ئەگەر هەر ئەمڕۆ كێشەكانیان چارەسەر نەكرێت و شەش نان نەكرێت بە هەزار دینار، ئەوا لە سبەینێوە كار ناكەن.
بەیانیی ئەمڕۆ نوێنەری نانەواخانەكان و سەندیكای كرێكاران لەگەڵ قائیمقامی سلێمانی كۆبوونەوە و گفتوگۆیان لەبارەی كێشەی نانەواخانەكان كرد كە خۆی لە "گرانبوونی نرخی ئارد و سوتەمەنی، زیادكردنی باجی سەر ئاردی هاوردە، بەرزبوونەوەی نرخی كارەبا و زۆریی ڕسوماتی تازەكردنەوەی مۆڵەت" دەبینێتەوە.
ڕاگەیاندنی قائیمقامیەتی سلێمانی دەڵێت "لە كۆبونەوەكەدا ڕێككەوتن كە لەپێناو بەرژەوەندیی هاووڵاتیاندا نرخی نان وەكوو خۆی بمێنێتەوە و ژمارەی نان دەستكاری نەكرێت و هەشت نان بە هەزار دینار دەبێت. خاوەنی نانەواخانەكانیش ڕەزامەند بوون".
"لە چەند لایەكەوە هەوڵێكی زۆرمان بۆ چارەسەری كێشەكان داوە، ئومێد دەكەین لە ئایندەدا ئەنجامەكەی ببینین. لە هەمان كاتدا ڕێگە نادەین بە هیچ جۆرێك ئارد ببرێتە دەرەوە، لە هاتنە ناوەوەشدا هەوڵ دەدەین ڕسوماتی لەسەر نەبێت"، ئاوات محەمەد، قائیمقامی سلێمانی، وای بە خاوەنی نانەواخانەكان وتووە.
ئاوات محەمەد وتوشیەتی "من دەزانم هەمووتان لە زەرەردان، بەڵام با هەوڵ بدەین بە هەموومان ڕێگە بگرین لە گرانبوونی نرخی نان، چونكە دواجار شارەكەمان و كۆمەڵگەكەمان زیان دەكات".
بەڵام پاش كۆبوونەوەكە، خاوەنی نانەواخانەكان ڕِەتیان كردەوە بە مانەوەی نرخ و ژمارەی نان وەكو خۆی ڕازی بووبن و نوێنەرەكەیان وتی "ئەوە بڕیاری تاكلایەنەی قائیمقامە".
نوێنەری خاوەنی نانەواخانەكان جەختی كردەوە كە "یان ئەمڕۆ وەڵامی داواكارییەكانمان دەدەنەوە و شەش نان دەكرێت بە هەزار دینار، یان سبەینێ هەموو نانەواخانەكانی سلێمانی دادەخەین".
نانەواخانەكانی سلێمانی پێشنیاری بچووككردنەوەی گونك لەبریی كەمكردنەوەی ژمارەی نان ڕەت دەكەنەوە و باس لەوە دەكەن كە تەنیا كردنی شەش نان بە هەزار دینار كێشەی ئەوان چارەسەر دەكات
"بەڕێوەبەری چاودێریی بازرگانی خۆی هاتووە، چاودێریی كردنی فەردەیەك ئاردی بە نان كردووە و فرۆشتوویانە، دەركەوتووە زەرەر دەكات، لەو كاتەدا فەردەیەك ئارد بە 33 هەزاریش بووە و ئێستا بە 43 هەزارە، هەر لیترێك غازیش 100 دیناری چووەتە سەر، بۆیە زەرەر دەكەین و بۆمان دەرناهێنێت"، نوێنەری نانەواخانەكان وای وت.
لای خۆیشیەوە چالاك ڕەئوف، سەرۆكی لقی سلێمانیی یەكێتیی سەندیكاكانی كرێكارانی كوردستان، لە كۆنگرە ڕۆژنامەوانییەكەدا پشتگیریی بۆ داواكاریی خاوەنی نانەواخانەكان نیشاندا و وتی "ئێمە لەگەڵ ئەوەین كە هەشت نان بە هەزار دینار بێت، بەڵام دەبێت باجی سەر هاوردەی ئارد هەڵبگیرێت، كارگەی ئاردی سلێمانی ئاردی گونجاو بۆ نانەواخانەكان دابین بكات، غاز بۆ نانەواخانەكان هەرزان بكرێت".
سەبارەت بەوەی كە نانەواخانەكان دەڵێن كە ئاردی خۆماڵی بەكەڵكی نان نایەت، سەرۆكی لقی سلێمانیی یەكێتیی سەندیكاكانی كرێكارانی كوردستان وتی "ئەو ئاردە دەسووتێنرێت، ڕەنگە بە ئەنقەست بسووتێنرێت بۆ ئەوەی ئاردی دەرەوە بێت. كارگەكانمان باشن، ئەگەر بە شێوەیەكی پرۆفیشناڵ ئارد بەرهەم بهێنن، پێویستمان بە ئاردی دەرەوە نابێت".