پەرەگراف
دووبارەبونەوەی ڕووداوەكانی ڕفاندنی منداڵ لە عێراق خەریكە لە حاڵەتەوە دەبێتە دیاردە، لەنێوانیاندا منداڵی ساوا و شیرەخۆرە هەیە، دواتر بازرگانی بەو منداڵانەوە دەكرێتەوە. ئەو كارانەی لەلایەن گرووپێك چەتە و تۆڕێكی تایبەت بەو تاوانانە ئەنجام دەدرێت.
لە چەند ڕۆژی ڕابردوودا هێزە ئەمنییەكانی عێراق چەند كەسێكیان بە تۆمەتی ڕفاندنی منداڵان دەستگیر كرد، كە لە چەند پارێزگایەكی جیاوازی عێراق تاوانەكانیان ئەنجامدابوو.
شانەی ڕاگەیاندنی ئەمنیی عێراق لە بەیاننامەیەكدا دەڵێت "بە هەماهەنگیی هەواڵگری لەسەر ئاستێكی باڵا، هێزە ئەمنییەكان بە سەركردایەتیی هێزی ئۆپراسیۆنەكانی بەغداد، توانیویانە سێ تۆمەتبار دەستگیر بكەن، لەنێوانیاندا ژنێك هەیە كە هەوڵیان دەدا منداڵێكی خەڵكی پارێزگای نەینەوا بفرۆشن، ئەوەش دوای دانانی كەمینێك بۆیان لە ناوچەی كەرادەی بەغداد".
ڕۆژی چوارشەممە 1-9-2021، هێزەكانی بەرەنگاربوونەوەی تاوان لە بەغداد گرووپێكی دیكەیان دەستگیر كردووە كە بەنیازی فرۆشتنی منداڵێك بوون بە بڕی 40 هەزار دۆلاری ئەمریكی، ئەوەش دوای ئەوەی مەفرەزەكانی بەرەنگاربوونەوەی تاوان لە بەغداد/بەشی بازرگانی بە مرۆڤ لە ڕەسافە، بۆیان دەركەوتووە لە ناوچەی عەعزەمییە گرووپێك هەیە بازرگانی بە منداڵانەوە دەكات و دوای فرۆشتنیان دەیانێرن بۆ پارێزگای نەینەوا.
ڕۆژی دووشەممەی ڕابردووش وەزارەتی ناوخۆ ئاشكرای كرد، بەشی بەرەنگاربوونەوەی تاوان لە بەسرە گروپێكی دیكەیان بە تۆمەتی بازرگانی بە مرۆڤەوە دەستگیر كردووە كە چوار منداڵی ڕفێندراویان لەگەڵدا بووە.
دوان لە منداڵەكان ساوا بوون، تەمەنیان مانگێك و دوو مانگ بووە، دوو منداڵەكەی دیكەش گەورەتر بوون، یەكێكیان تەمەنی دوو ساڵ و ئەوی دیكەش چوار ساڵ بووە، بەڵگەی پێویستی ئەو منداڵانەش لەبەردەستدا بووە.
چەندبارەبوونەوەی ئەو ڕووداوانە، ڕایگشتیی عێراقی هەژاندووە. هاووڵاتیان ترسێكی زۆریان لە چارەنووسی منداڵەكانیان هەیە، ئەوەش بەهۆی سەرهەڵدانەوەی گرووپەكانی ڕفاندن و بازرگانی بە منداڵەوە.
دایكی سامر، خانمێكی عێراقییە، لەوبارەیەوە دەڵێت "ترسێكی زۆرمان لە منداڵەكانمان هەیە، تەنانەت كاتێك دەچنە دەرەوە بۆ یاریكردن لەگەڵ هاوڕێكانیان لەسەر شەقام یاخود لە باخچەكانی نزیك ماڵەوە. دووبارەبوونەوەی حاڵەتەكانی ڕفاندنی منداڵ لەنێوانیاندا ساوا، دەبێت هانی ئێمەی دایكان و سەرپەرشتیاری منداڵەكان بدات چاودێرییەكەمان دوو هێندە بكەین".
ئەو خانمە دەڵێت "پێویستە حكومەت و دەزگا ئەمنییەكان بە پەلە سنوورێك بۆ ئەو ڕووداوانە دابنێن، چونكە شەپۆلی ڕفاندنی منداڵ و كڕین و فرۆشتن پێیانەوە زۆر زیادی كردووە، منداڵەكانمان بەنرخترین شتە كە هەمانە، نابێت ئەو ڕووداوانە دووبارە ببنەوە بێ لێپێچینەوە و چاودێری".
لای خۆیەوە ئەنەس عەبدولغەفوور، چالاكی یاسایی، پێی وایە "ئاشكراكردن و دەستگیركردنی دوو تۆڕی ڕفاندنی منداڵ لە ڕۆژێكدا، شتێكی ترسناك و زەنگێكی مەترسیدارە، گومانی تێدا نییە تۆڕی دیكەی هاوشێوەیە هەن كە كڕین و فرۆشتن بە منداڵەوە دەكەن".
"نازانین كێشەكە بە تەواوی لەكوێدایە، ئایا شكستی دەزگا ئەمنییەكانە، یاخود بەرزبوونەوەی ئاستی تاوانە بەهۆی خراپیی دۆخی ئابووری و كۆمەڵایەتی، چۆن گەیشتینە ئەم دۆخە كە منداڵەكانمان ئاوا بە خوێنساردییەوە بڕفێندرێن"، ئەو چالاكە وا دەڵێت.
ئەنەس عەبدولغەفوور ئاماژەی بەوەش كردووە، بەرپرسیارێتی دەكەوێتە سەر هەمووان نەك بە تەنها لایەنە حكومییەكان، بۆیە پێویستە هەوڵەكان چڕ بكرێنەوە بۆ ڕووبەڕوبوونەوەی ئەو دیاردەیە، لەڕێی چاودێریی خانەوادە، دراوسێ، خەڵكی گەڕەكەوە كە دەبێت هاوكاری یەكتر بن بۆ پاراستنی ئەو منداڵانەی چاوی تۆڕەكانی ڕفاندنیان لەسەرە.