عومەر سەید عەلی: بێ دوو دڵی دەنگ بە كاندیدەكانی گۆڕان بدەن

پەرەگراف

ڕێكخەری گشتی بزووتنەوەی گۆڕان لە كۆتا پەیامی بانگەشەی هەڵبژاردندا، داوای بەشداریی فراوانی خەڵك لە پڕۆسەی دەنگدان دەكات‌و دەڵێت: پشت بە ئیرادەی بەهێزی میللەتەكەمان و گۆڕانخوازان سەردەكەوین.

دەقی پەیامەكەی عومەر سەید عەلی، ڕێكخەری گشتی بزوتنەوەی گۆڕان

هاوڵاتیانی هەرێمی كوردستان..
دانیشتوانی كەركوك و ناوچە جێناكۆكەكان...
كوردستانیانی دڵ پڕ هیوا..

‎لە كۆتایی هەڵمەتی بانگەشەی هەڵبژاردنی پێشوەختی ئەنجومەنی نوێنەرانی عێراقین، لەبەردەم بەرپرسیارێتییەكی نەتەوەیی و نیشتمانی و دیموكراتین بۆ دیاریكردنی چارەنوسی گەلەكەمان بۆ چوار ساڵی داهاتوی عێراق، لەو سۆنگەیەوە، داوادەكەین هەموتان (ئەوانەی مافی دەنگدانتان هەیە) بێ دوو دڵی بەشداری لەم هەڵبژاردنە بكەن و دەنگ بە هاوپەیمانی كوردستان و كاندیدەكانی بزوتنەوەی گۆڕان بدەن.

‎وەك لای هەموان ئاشكرایە، هەڵبژاردنی پیشوەختی عێراق بەرهەمی فشاری خۆپیشاندەرانی ناوەڕاست و باشوری عێراقە، كە داوای مافە بنەڕەتیەكانیان دەكرد و لەو پێناوەشدا زیاتر لە (٦٠٠) خۆپیشاندەر گیانیان بەختكرد.

‎بۆ دەنگدەرانی هەرێمی كوردستان و كەركوك و ناوچە جێناكۆكەكان، دەنگدان هەم مافە و هەم ئەركە بۆ پاراستنی دەستكەوتە نەتەوەییەكان، بۆ روبەڕوبونەوەی مەترسی و ئاڵنگارییەكان، بۆ پاراستنی پێگەی نەتەوەییەكی مافخوراو و قوربانیدەر، بۆ گۆڕینی ئامرازی خەباتی نەتەوەیی لە شۆڕش و چەكەوە بۆ دەنگ و سندوقەكانی هەڵبژاردن، پەرلەمانی عێراق جێگایەكە كە نوێنەرانی كورد دەتوانن داكۆكی لە ماف و دەستكەوتەكانی هەرێمی كوردستان بكەن. كەواتە؛ دەنگی ئێوە نرخ و بەهایەكی گەورەی هەیە بۆ گۆڕانكاری لە نەخشەی سیاسی عێراق و متمانەدان بە نوێنەری شایستە و كارامە بۆ داكۆكیكردن لە مافە دەستورییەكانمان.

دەنگدانی ئێوە درێژكراوەی خەباتی سیاسیی زیاتر لە سەدەیەكی مرۆڤی كوردە دژی ستەمی نەتەوەیی و داگیركاری، دژ بە جینۆساید و كیمیاباران و شەهید و قوربانیدانی هەزاران كورد لەرێگای سەربەخۆیی و سەرفرازی نەتەوەكەمان لەعێراق.

‎بزوتنەوەكەمان، وەك هێزێكی مەدەنی چاكسازیخواز، بەپێی ئەو ستراتیژەی كە هەمانە جەخت لەسەر ئاسایكردنەوەی پەیوەندییەكانی حكومەتی هەرێم و حكومەتی ئیتحادی بە ئامانجی دەستەبەركردنی ژیانێكی شایستە بۆ هاوڵاتیان دەكەینەوە، جەخت لەسەر بەشدارییەكی راستەقینەی كورد لە دەزگای بڕیاردانی سیاسیی عێراق و جێبەجێكردنی دەستور دەكەینەوە بۆ چارەسەركردنی كێشەی خاك و دەسەڵات و سامان جەخت لەسەر جێبەجێكردنی مادەی ١٤٠ و چارەسەركردنی كێشەكانی پێشمەرگە و بودجە و دابینكردنی موچە بۆ فەرمانبەرانی ھەرێم دەكەینەوە، پێداگیری لەسەر دروستكردنی ئەنجومەنی ئتیحادی و كاركردن بە پرەنسیپەكانی سازان و هاوسەنگی بۆ حوكمڕانی و بەشداریكردن لەكایەی سیاسیی دەكەینەوە، لەو چوارچێوەیەدا، پرۆسەی دەنگدان و خەباتی پەرلەمانی وەك شاڕێگەی پاراستنی دەستكەوتەكانی كورد و، بڕیاردان لە چارەنوسی خەڵكی كوردستان لەرێی ئیرادەی خەڵك دەبینین.

‎بزوتنەوەی گۆڕان، لە چوارچێوەی هاوپەیمانی كوردستان بە دیدی نیشتیمانیەوە نوێنەرایەتی دەكات و دەمانەوێت پارێزەری بەرژەوەندی گشتی كوردستان و دەستكەوتە نەتەوەییەكان بین، لەو راستیەوە، یەكڕیزی لایەنە كوردستانیەكان و یەكخستنی گوتاری كوردستانی لە چوارچێوەی دەوڵەتی عێراقی ئیتحادی، كە گوزارشت لە بەدەستهێنانی ئامانجە باڵا نیشتمانییەكان بكات بە پێویست دەزانین. لە ناوخۆی هەرێمی كوردستانیش داوای دەستورێكی دیموكراتی و مەدەنی دەكەین كە رەنگدانەوەی ماف و داخوازییەكانی كۆمەڵگای كوردستان و پێكھاتەكانی بێت. ھاوكاتیش دەستكردن بە پەیرەوكرنی بەرنامەیەكی نیشتمانی بۆ چاكسازی سیاسیی یاسایی و كارگێڕی و دارایی، بۆ قەڵاچۆكردنی گەندەڵی و باشكردنی بژێوییەكانی ژیانی خەڵك و كەمكردنەوەی مەینەتییەكانی هاوڵاتیانی هەرێمی كوردستان بە پێویستیەكی لەپێشینە دەزانین. هەر لەسەر ئەو بنەمایانەش بزوتنەوەی گۆڕان بۆ ئەم هەڵبژاردنەی عێراق لەگەڵ یەكێتی نیشتمانی كوردستان هاوپەیمانی پێكهێناوە.

دەنگدەران و هاوڵاتیانی هەرێم و كوردانی كەركوك و ناوچە جێناكۆكەكان..

ژنان و گەنجان و هەمو چین و توێژەكانی كۆمەڵگای كوردستان..

‎ئێوەی خۆشەویست دەزانن بزوتنەوەكەتان لەماوەی رابردو و لەمیانی بەشداریكردنی لە پرۆسەی سیاسی چ لە هەرێمی كوردستان و چ لە سەرئاستی عێراق؛ بە كاری نایاسایی و سەفەقاتی ژێربەژێر تێوەنەگلاوە، هەر بۆیە هەڵسوڕاو و گۆڕانخوازان بەدەنگێكی زوڵاڵ و دلێرەوە بانگەشەی هەڵبژاردن دەكەن و داوا لە خەڵك دەكەن دەنگ بە كاندیدەكانی بزوتنەوەی گۆڕان بدەن، ئێمەش لەو چوارچێوەیەدا داوا دەكەین لە دەنگدەران و خەڵكی بە ئەمەكی كوردستان لە هەرشوێنێكی عێراقن؛ بەشداری پرۆسەی هەڵبژاردن بكەن و دەنگتان بۆ هاوپەیمانی كوردستان و كاندیدەكانی بێت. دەنگتان بۆ كاندیدەكانی بزوتنەوەی گۆڕان بێت كە شایستە و خاوەن پسپۆرین و، خەڵكی سنورەكەی خۆتان و لەناو خەم و كێشەكانی جەماوەر گەورە بوون.

هەڵسوڕاو و گۆرانخوازانی بە هەڵوێست..
‎بزوتنەوەی گۆڕان لەم هەڵبژاردنە چارەنوسسازەدا؛ پێویستی بە هیمەت و كۆششی زیاتری ئێوەیە بۆ هاندانی هاوڵاتیان بەمەبەستی بەشداریكردن لە هەڵبژاردن و دەنگدان بە كاندیدەكانمان، ئەم رۆڵە گرنگەی ئێوە دەبێتە بەردی بناغەی بەهێزكردنی پڕۆژەی سیاسیی رەوانشاد نەوشیروان مستەفا و پاراستنی بزوتنەوەی گۆڕان؛ كە بوونی سەنگەرێكی پتەوە بۆ خەباتی مەدەنی و پەرلەمانی و بەهێزبوونەوەی پێگەو سەنگی خەڵك لە هاوكێشەی سیاسیی هەرێم و عێراق.
‎پێویستە ئەوەش بڵێین، بزوتنەوەی گۆران پڕۆژەیەكی نیشتیمانیە و هی هەمو ئەو خەڵكە دڵسۆزەیە رۆژێك لە رۆژان پشتیوانی كردووین، پڕۆژەیەكە لە پێناو سەرخستنی پرۆسەی چاكسازی سیاسیی و گەیشتن بە ئامانج و بەرژەوەندییە باڵاكانی گەلەكەمان لە خەباتدایە، هەربۆیە پێویستمان بە هەمووتانە و گۆڕانیش هی هەموانە..

‎لە كۆتایدا، پشت بە ئیرادەی بەهێزی میللەتەكەمان و گۆڕانخوازان سەردەكەوین...