پەرەگراف
گفتوگۆكانی تایبەت بە پێكهێنانی حكومەتی عێراق تادێت خێراتر دەبێت، بەتایبەت دوای ئەوەی موقتەدا سەدر، ڕێبەری ڕەوتی سەدر، دەرگای ئەگەری دروستكردنی هاوپەیمانیی لەگەڵ نووری مالیكی سەرۆكوەزیرانی پێشوو كردەوە، هەرچەندە پێشتر پەیوەندیی نێوانیان زۆر خراپ بووە و گەیشتووەتە شەڕ و ڕووبەڕووبوونەوەی چەكداری.
سەدر كە زۆرترین كورسییەكانی ئەنجوومەنی نوێنەرانی لە هەڵبژاردنەكەی 10ی تشرینی یەكەم بردەوە، لە وتەیەكیدا كە لە شاری نەجەف پێشكەشی كرد، پەیامێكی ئاڕاستەی لایەنە دۆڕاوەكانی هەڵبژاردن كرد، داوای لێ كردن "بەخۆیاندا بچنەوە و لە داهاتوودا متمانەی گەل بەدەست بهێنن"، چونكە پێی وایە "ئەوەی ئێستا ئەو لایەنانە دەیكەن، گومانی گەل لەسەریان زیاتر دەكات".
ڕێبەری ڕەوتی سەدر باسی لە كردنەوەی دەرگای هاوپەیمانی لەگەڵ ئەو لایەنانەدا كرد و وتی "لایەنە دۆڕاوەكانی هەڵبژاردن ئەگەر بیانەوێت بەشداریی حكومەت بكەن، دەبێت ڕاستەوخۆ گەندەڵەكان بدەن بە دادگا، حەشدی شەعبی لەو چەكدارانە پاك بكەنەوە كە كۆنترۆڵ ناكرێن، بەشداری سیاسەت نەكەن، پەیوەندییەكانیان لەگەڵ وڵاتانی دیكە بپچڕێنن بۆ ئەوەی عێراق سەروەریی پارێزراوبێت و نەخرێتە ناو شەڕی دەرەوە".
سەدر مەرجی هەڵوەشاندنەوەی هەموو لایەنە چەكدارەكانی داناوە لە یەك كاتدا، لە قۆناغی یەكەمیشدا لەڕێی سەركردەی باڵای هێزە چەكدارەكانەوە، چەكەكانیان ڕادەستی حەشد بكەن.
قسەكان ئاماژەیەك بوون بۆ ئەگەری ڕێكەوتنێكی خێرا لەنێوان موقتەدا سەدر ڕابەری ڕەوتی سەدر و نووری مالیكی سەرۆكی دەوڵەتی یاسا.
چاودێرانی سیاسی پێشبینی دەكەن هەردوو لایەنەكە ئاماژەی نزیكبوونەوەیان بۆ یەكتر ناردووە. سەدر جەختی كردووەتەوە ئامادەیە ڕێكەوتن لەگەڵ لایەنە دۆڕاوەكانی هەڵبژاردن بكات كە بە لایەنەكانی چوارچێوەی هەماهەنگی ناودەبرێن.
ئەگەری ڕێكەوتن لەگەڵ ڕەوتی سەدر، ئەگەرێكی بەهێزە، چونكە كورسییەكی زۆری هەیە، لایەنە شیعە دۆڕاوەكانیش پێكەوە ژمارەیەكی باش كورسییان هەیە، كە دەكاتە نزیكەی 185 كورسیی ئەنجوومەنی نوێنەران، ئەوەش ئەگەری ڕێكەوتن زیاتر دەكات تەنانەت ئەگەر نەبنە هاوپەیمانیش.
نزیكبوونەوە دوور نییە
باسل كازمی، لێكۆڵەری سیاسی، دەڵێت "ڕۆژانی داهاتوو سوپرایزی تێدا دەبێت، چونكە سیاسیەت شتی جێگیری تێدا نییە، دوور نییە نزیكبوونەوە لەنێوان ڕەوتی سەدر و مالیكیدا ڕوو بدات، بەتایبەت كە سیاسەتی سەدر جێگیر نییە و بەردەوام دەگۆڕێت".
"ئەگەر هەیە ئەو ڕێكەوتنە بكرێت، دەبێت ئەو قەیرانانە چارەسەر ببن، ئەوەش لەڕێی هێوركردنەوەی دۆخەكە، بەتایبەت كە كێشەكانی نێوان سەدر و مالیكی شەخسییە و لەسەر هەڵوێست و لایەنی سیاسی نییە"، كازمی وا دەڵێت.
پێش هەڵبژاردن، سەدر هێرشێكی زۆر توندی دەكردە سەر ڕكابەرە سیاسییەكانی، بە گەندەڵ و شكستخواردوو ناوی دەبردن.
هێرشەكانی سەدر زۆرینەی جار بۆ دیارترین ڕكابەرەكانی بوو، یەكێكیان نووری مالیكی بوو، لە بەیاننامەكاندا بە دوو سەرۆكایەتی ناوی دەبرد، وەك ئاماژەیەك بۆ دوو كابینەی سەرۆكایەتیی حكومەت، قەیس خەزعەلی سەركردەی عەسائیبی ئەهلی حەق كە خۆی ڕەوتەكە جیابووتەوە.
دوودڵیی كورد و سوننە
دوای ئەو گۆڕانكارییانە لە هەڵوێستی ڕەوتی سەدردا، كوتلە كوردی و سونییەكان هێشتا دوودڵن دەست بۆ سەدر درێژ بكەن، چونكە لە كوتلەكانی دیكە دەترسن، هەر بۆیە هاوپەیمانییان لەگەڵ سەدر ڕەت كردووەتەوە، یاخود بە ڕادەیەكی زۆر لێی نزیك نەبوونەتەوە.
یەكێك لە سەركردەكانی ڕەوتەكە ئاماژە بەوە دەكات، نزیكبوونەوە و ڕێكەوتن لەگەڵ مالیكی دواین چارەسەری ڕەوتەكەیە، ئەوەش بەهۆی كێشەی قووڵ و ستراتیژی نێوان هەردوولا، بەڵام دەكرێت چەترێكی گشتی بۆ كۆكردنەوەی سەرجەم لایەنە شیعەكان هەڵبدرێت، لەو كاتەشدا كوتلەی سەدر و مالكی دەچنە پاڵ یەكتر.
ڕەوتی سەدر لە هەڵبژاردنی ئەنجوومەنی نوێنەران كە لە 10ی تشرینی یەكەم ئەنجام درا، 73 كورسیی بردەوە و بووە یەكەم، هاوپەیمانیی دەوڵەتی یاساش كە نووری مالیكی سەرۆكایەتیی دەكات، بووە خاوەنی 35 كورسیی ئەنجومەنی نوێنەران.