پارێزگاری ھەولێر قەرەبووەکەی بەغداد بۆ زەرەرمەندانی لافاوەکە ڕەتدەکاتەوەو دەڵێت: بەھیچ شێوەیەک وەری ناگرین

پەرەگراف

پارێزگاری ھەولێر لە ڕاگەیەندراوێکی ناڕەزاییدا، ٢ ملیار دینارەکەی بەغداد کە وەک قەرەبوو بۆ زەرەرمەندانی لافاوەکەی ھەولێر تەرخانی کردووە ڕەت دەکاتەوە.

ئومێد خۆشناو باسلەوەدەکات قەبارەی زیانەکان بە ٢٠ تا ٢١ ملیار دینار خەمڵێندراوە، لەبارەی قەرەبووەکەی بەغداد دەڵێت "ئەو بڕە پارەیە قەبوڵ ناکەین، دەخوازین ئەنجومەنى وەزیرانى عێراقی فیدراڵ چاوو بە بڕیارەکەیان بخشێننەوە، چونکە ئەوەى داوامان کردووە مافێکى یاسایی ئێمەیە و بەخێر پێمان نادرێتن".

ئەو ھەڵوێستە دوای ئەوەدێت، ئەرکان شەیبانی، وەزیری گەیاندنی عێراق، ئەمڕۆ ڕایگەیاند "لە کۆبوونەوەی ئەنجوومەنی وەزیرانی عێراق بڕیار درا بڕی دوو ملیار دینار بۆ حکومەتی هەرێم خەرج بکرێت لە یەدەگی فریاگوزاری بۆ ڕووبەڕووبوونەوەی لافاو".

دەقی ڕاگەیەندراوە ناڕەزاییەکەی پارێزگارى هەولێر

دواى ئەوەى ئەو کارەساتەى لەڕۆژى هەینى 2021.12.17 بەهۆى لافاوەوە بەسەر شارەکەمانداهات، کە سەرەڕاى زیانى گیانى قەبارەىزیانە مادیەکانیشى زۆر گەورە بوون ئەوە جگە لەزیانەکانى کەرتى گشتیى کە تەنها زیانى هاوڵاتییانى زەرەمەند بەبڕى (20) تاوەکو (21) ملیار دینار خەمڵێندراوە، بۆیە بۆ بەهاناوەچوونى زیانلێکەوتووان وەک مافێکى یاسایی خۆمان داواکاریمان پێشکەش بە حکومەتى عێراقی فیدراڵ کرد تاوەکو لەبودجەى فریاکەوتن کە مانگانە لە بودجەى دیاریکراوى هەرێمى کوردستان دەبڕدرێت ئەو بەشەى کەمافى هەرێمى کوردستانە بۆمان بیگەڕێنەوە، بەڵام بەداخەوە ئەمڕۆ 2021.12.21 لە کۆبوونەوەى ئەنجومەنى وەزیرانى عێراقی فیدرال بڕیاردراوە بڕى (2) ملیار دینار بۆ هەولێر بنێردرێت، کە ئەمەش بەهیچ شێوەیەک لە چاوەڕوانى ئێمەدا نەبوو لەبەرامبەر قەبارەى ئەو زیانە گەورەیەى بەهۆى کارەساتێکى سروشتییەوە بەسەر شارەکەمان داهاتووە. بۆیە وێڕاى ئەوەى ئەوپەڕى ناڕەزایەتی خۆمان بەرامبەر بەم بڕیارەى ئەنجومەنى وەزیرانى عێراقى فیدراڵ دەردەبڕین، پێمان وایە ئەو بڕیارە بەهیچ شێوەیەک لە ئاستى چاوەڕوانى و قەبارەى زیانەکان نییە، سەرەڕاى ڕەتکردنەوەى ئەو بڕەى بۆمان دیاریکراوە کە بەهیچ شێوەیەک وەریناگرین، بێ هیوابوونى خۆمان لەهاوکاریکردنى حکومەتى عێراقی فیدراڵ نیشان دەدەین و ئەو بڕە پارەیەش قەبوڵ ناکەین، دەخوازین ئەنجومەنى وەزیرانى عێراقی فیدراڵ چاوو بە بڕیارەکەیان بخشێننەوە، چونکەئەوەى داوامان کردووە مافێکى یاسایی ئێمەیە و بەخێر پێمان نادرێتن کە مانگانە بەناوى خەرجی سیادى لە بودجەى هەرێمى کوردستان دەبڕدرێت و ئێستاش لەو کاتەى کە پێویستمان پێیەتى دەبێت بۆمان بگەڕێننەوە.

ئومێد خۆشناو

پارێزگارى هەولێر

2021.12.21