یەكێتی: ئەگەر ئەمە سیاسەتی پارتی بێت پەیوەندییەكانمان دەخاتە بەردەم مەترسی‌

پەرەگراف

لە درێژەی گرژییەكانی نێوان پارتی‌و یەكێتی‌و دەزگا ئەمنیی‌و هەواڵگرییەكانیان، وتەبێژی یەكێتی نیشتیمانی كوردستان پەیامێك ئاڕاستەی پارتی دیموكراتی كوردستان دەكات‌و تێیدا هۆشداریی دەدات لەوەی پەیوەندییە دووقۆڵییەكانیان دەكەوێتە مەترسییەوە.

دەزگاكانی ئاسایش، دژە تیرۆر، پاراستن‌و زانیاریی كە سەربە پارتی‌و یەكێتی-ن، لە دوێنێوە چەند بەیاننامەیەكیان لەسەر یەكتریی دەركردووە‌و تۆمەتی ئەنجامدانی چەندین تاوانی قورسیان ئاڕاستەی یەكتر كردووە، هەر لە "كوشتن‌و تیرۆر، سەرانەسەندن، گەندەڵیی گەورەو دەرچوون لە یاسا"،  دەزگاكانی سەربە پارتی ڕووی قسەیان لە لاهور شێخ جەنگیی‌و براكانییەتی، یەكێتییەكانیش لە مەسرور بارزانی‌و بنەماڵەكەی.

دەقی ڕاگەیەنراوێك یەكێتییەوە:

بۆ پارتی دیموكراتی كوردستان

جێگەی نیگەرانیی قووڵمانە كە بەبێ هیچ پاساوێك، ئەمڕۆ ٢٠ \ ٣\ ٢٠٢٠، ئەنجومەنی ئاسایشی هەرێمی كوردستان روونكردنەوەیەكی بڵاو كردۆتەوە كه بەشی هەرەزۆری هێرشكردنە بۆ سەر بەڕێز هەڤاڵ لاهور شێخ جەنگی، هاوسەرۆكی یەكێتیی نیشتمانیی كوردستان‌. هەر ئەمڕۆ، نووسینگەی سەرۆكی حكومەتی هەرێمی كوردستان لە راگەیەندراوێك دا لەسەر دەزگای زانیاری، دووبارە و بەمەبەست و بە خراپ ناوی بەڕێزیانی هێناوە و خۆی خستۆتە ئاستی لایەنداریی نەك بێ لایەنی.

بۆ ئاگاداریی هەموو لایەك، ئاژانسی زانیاری بە فەرمی بەشێكە لە ئەنجومەنی ئاسایشی هەرێمی كوردستان و لەسەرەتای ئەمساڵ و لە دوای كۆنگرەی چواری یەكێتی، بەڕێز هەڤاڵ لاهور شێخ جەنگی، سەرۆكایەتی یەكێتیی نیشتمانیی كوردستان دەكات و پەیوەندی راستەوخۆی بە دامەزراوەكانی سەر بە ئەنجومەنی ئاسایش نەماوە. هەرچەند ئەم گۆڕانكارییانە، پاساو نادات بە پەلاماردانی ئاژانسی زانیاری لەلایەن ئاسایشی هەولێرەوە، بەڵام‌ جێی سەرسوڕمانە ئەگەر نووسینگەی سەرۆكی حكومەتی هەرێمی كوردستان و ئەنجومەنی ئاسایش ئاگاداری ئەو گۆڕانكاریانە نەبن.‌‌ ئایا لەم كاتەدا چ سودێك دەبینرێت لە هەڵگیرساندنی ئاژاوە لەنێوان سەركردایەتی دەزگا ئەمنی و هەواڵگرییەكانی سەر بە حكومەت و سەرۆكایەتی هەرێمی كوردستان. هەروەها جێگەی پرسیاریشە، كه ئایا پارتی دیمۆكراتی كوردستان بە چ مەرامێك، گوتارێكی‌ سیاسی لەم جۆرە،‌ لەدژی سەرۆكایەتی یەكێتیی نیشتمانیی كوردستان، بەڕێوە‌ دەبات. بەتایبەت لەم دۆخە هەستیار و ئاڵۆزەدا كە گەلەكەمان لەهەموو كات زیاتر پێویستی بە تەبایی و یەكڕزیی و پێكەوە ژیان هەبووە.

ئەم شێوازە لە پەیوەندیی سیاسی، ئەگەر ئەمە سیاسەتی پارتی بێت، سەقامگیریی هەرێمی كوردستان بەرەو چارەنووسی نادیار دەبات و، هەڵوەستەی جدیمان پێ دەكات لەسەر راستگۆیی پارتی‌ بۆ شەراكەتی سیاسی و، ئایندەی رەوایی مانەوەی پەیوەندییە دوو قۆڵییەكانی نێوانیشمان دەخاتە بەردەم پرسیار و مەترسی‌.

وتەبێژی یەكێتیی نیشتمانیی كوردستان

٢٠\٣\٢٠٢٠