پەرەگراف
سەرمایەداری دیاری كوردستان، فاروق مەلا مستەفا هاوكاریی بۆ 7 هەزار خێزانی قەزاو ناحیەكانی سلێمانی‌و 3 هەزار خێزانی ناو شاری سلێمانی دابین دەكات.
لە بڵاوكراوەیەكدا گروپی كۆمپانیاكانی فاروق، وردەكاریی ئەو هاوكارییانەو چەند كۆمەك و بەخشینێكی دیكەی فاروقی مەلا مستەفای خستووەتە ڕوو، لەوانەش؛ بڕی 250 هەزار دۆلار بۆ پارێزگای سلێمانی‌و 59 هەزارو 500 دۆلار هاوكاری بۆ نەخۆشخانەی كۆرۆنا لە سلێمانی(نەخۆشخانەی ئاسا).
دەقی بڵاوكراوەیەك لە گروپی كۆمپانیاكانی فاروقەوە:
هاوكارییەكی تری كاك فاروقی مەلا مستەفا لەم قەیرانە سەختەی ئێستای هەرێمی كوردستاندا.
كاك فاروقی مەلا مستەفا وەك چۆن لە هەموو كارەسات و بۆنەو ڕووداوێكدا پێشەنگ‌و دەستپێشخەر بووە لە بەدەنگەوەهاتن و یارمەتیدانی توێژە جیاجیاكانی كوردستاندا بۆ دابینكردنی پێداویستییەكانی خۆیان و خێزانەكانیان لەكاتی لێقەومان و بارودۆخی نەخوازراودا، وا ئەمجارەش لەگەڵ سەرهەڵدانی پەتای كۆرۆنادا خۆراكی وشكە و پێداویستی دیكەی دابین كرد بۆ حەوت هەزار خێزانی شایستە بەپێی ئەو لیستەی كە بەڕێزان قایمقامەكان و لێپرسراوە ئیدارییەكان ئامادەیان كردووە لە قەزا و ناحیەكانی؛ بازیان، بەردەقارەمان، بەكرەجۆ، ڕاپەڕین، دوكان، عەربەت، پیرەمەگروون، شارباژێڕ، قەرەداغ، سێوسێنان، چەمچەماڵ، تەكیە و تاسڵوجە و ماوەت و شۆڕش.
هەر كارتۆنێك لەو پێداویستی و ئازووقانە بایی پەنجاوحەوت هەزار و نۆسەدو پەنجا دینارە و ڕۆژی ٢٥ /٣ بە هاوكاری ڕێكخراوی (سی دی ئۆ)و بەڕێزان قایمقامەكان و بەڕێوەبەرانی بەڕێزی ئەو قەزاو ناحیانە هاوكارییەكان دەگەیەنرێنە بەردەمی ئەو ماڵانە.
هەر بە هەمان شێوە و بەهاوكاری بەڕێز قایمقامی ناوەندی سلێمانی سێ هەزار خێزانی شایستەی ناو شاری سلێمانییش هاوكاری دەكرێن.
بۆ هەر پرسیارێك لەسەر ئەم بابەتە دەتوانن پەیوەندی بكەن بە ژمارە تەلەفونی(٠٧٧٢٣٣٣٠٠٩٠)
كۆمەك و بەخشینەكانی كاك فاروقی مەلا مستەفا بۆ هاونیشتیمانیان و دەزگا خزمەتگوزارییەكان لەم ماوەی قەیراناویەدا هەر بەردەوام بووە. لەوانە؛
1-یەك ملیۆن لیتر نەوتی سپی بۆ قەزای كۆیە كە بایی شەشسەدو بیست ملیۆن دینار بوو.
2- پێنجسەد هەزار لیتر نەوتی سپی بۆ ناو شاری سلێمانی و چەند ناوچەیەكی دەرەوەی شاری سلێمانی كە نرخەكەی سێسەد ملیۆن دینار بوو.
3-بڕی دووسەدو پەنجا هەزار دۆلار بۆ پارێزگای سلێمانی.
4-بڕی پەنجاو نۆهەزار و پێنج سەد دۆلار هاوكاری بۆ نەخۆشخانەی كۆرۆنا لە سلێمانی(نەخۆشخانەی ئاسا).
ئێمە لەكاتێكدا پڕ بەدڵ هیوادارین وڵاتە خۆشەویستەكەمان ئەم كێشە گەورەیە بە كەمترین زیان تێبپەڕێنێت و هاونیشتیمانیانی ئازیز سەلامەت و بەختەوەر بن، دڵنیاتان دەكەینەوە كە هاوكارییەكانی كاك فاروقی مەلا مستەفا بەردەوام دەبن بۆ دەزگا خزمەتگوزارەكانی حكومەتی هەرێم و كەسانی شایستەی هاوكاری و فریاكەوتن.
هیوای لەشساغی و ئاسوودەیی بۆ هەموو لایەك دەخوازین
گروپی كۆمپانیاكانی فاروق
٢٣-٣-٢٠٢٠