پەرەگراف
وەزارەتی ڕۆشنبیریی هەرێم "یاداشتی ناڕەزایی" لەبارەی دراما توركییەكەوە بڵاو كردەوە و دەڵێت "دراما توركییەكە سوكایەتی بە خەبات و هێماكانی گەلی كورد دەكات. ناڕەزایەتیی خۆمان دەگەیەنینە دەزگای بەرهەمهێنەر و (atv) و تەواوی ئەو ستافە، لە بەرامبەر بڵاوكردنەوەی تۆوی شۆفێنیزم و بە كەم سەیركردنی بەرامبەرەكانیان".
وەزارەتی ڕۆشنبیری و لاوانی حكومەتی هەرێم داوا لە حكومەتی توركیا دەكات "ڕێگە لەو هەڵمەتی چەواشەكارییە بگرێ كە لەلایەن هەندێك خەڵكی قینلەدڵ و نەژادپەرستەوە دەدرێت بۆ ئاڵۆزكردنی پەیوەندیی نێوان گەلان".
درامایەكی توركی كە لە كاناڵێكی پارتەكەی ئەردۆغانەوە پەخش دەكرێت، لە حەڵقەیەكیدا سووكایەتی بە حكومەت و دادگاكانی هەرێم دەكات و بوونی قەوارەی هەرێمی كوردستان ڕەت دەكاتەوە. دراماكە لەناو تۆڕی كۆمەڵایەتیدا كاردانەوەی فراوانی بە دوای خۆیدا هێنا.
زنجیرە دراماكە ناوی (گورگی تەنیا)یە لە كەناڵی (atv) پەخش دەكرێ. وەزارەتی ڕۆشنبیری دەڵێت "ئەم درامایە بەرهەمی كۆمپانیاكانی (توركواز میدیا)ی نزیك لە حكومەتی توركیایە، (عوسمان سناڤ) بەرهەمهێن و (جاغاتای تۆسۆن) دەرهێنەری دراماكەیە، (عەلی ئالپەر و موراد كوچا) سیناریۆكەیان نووسیوە".
وەكوو وەزارەتی ڕۆشنبیری ڕوونی كردووەتەوە "زنجیرە دراماكە باس لە مێژووی توركیا و شەڕی نێوان توركیا و PKK دەكات، هەروەها باسی گۆڕانكارییەكانی ناوچەكە و ڕۆڵی ئەمریكا دەكات. لە چەندین ئەڵقەیدا بە نەفەسێكی دوژمنكارانە باسی كورد و هەرێمی كوردستان دەكات و هەموو كارتەكان تێكەڵ دەكات تا ڕادەی تێكەڵكردن لەگەڵ داعشی تیرۆریستدا".
لە هەڵقەی 19ی زنجیرە دراماكەدا، دیمەنێكی دادگاییكردن لە داداگایەكی هەرێم نیشان دراوە، تێیدا وێنەی مەسعود بارزانی لە پشت دادوەرەكەوە دەردەكەوێت. هاووڵاتییەكی تورك بە ناوی تەكین گریتلی، تۆمەتبار كراوە بە ھێرشكردنە سەر بازرگانێكی ئەمریكی و دادگاییەكە بە ئامادەیی ژمارەیەك دیبلۆماتكاری توركی و ئەمریكی بەڕێوە دەچێت.
لەو گفتوگۆیانەی لە نێوان دادوەر و تۆمەتبارەكە بەڕێوە دەچێت، تۆمەتبارەكە هێرشی توند دەكاتە سەر هەرێم و دەڵێت "نە دان بە ئێوەدا دەنێم و نە دان بەم دادگاییەشدا دەنێم كە سەرۆكایەتیی دەكەن. شتێك نییە بە ناوی باكووری عێراقەوە(هەرێمی كوردستان)، بەڵام عێراق باكووری هەیە، لەبەر ئەوەی ئەگەر تاوانێكم هەبێت دەبێت لە دادگاكانی عێراق یاخود لە دادگاكانی كۆماری توركیا دادگایی بكرێم".
وەزارەتی ڕۆشنبیری دەڵێت "لە دادگاكەدا ئاڵای كوردستان و وێنەی سەرۆك مەسعود بارزانی دانراوە، سوكایەتی بە خەبات و هێماكانی گەلی كورد دەكات و حكومەتی هەرێمی كوردستان بە ناشەرعی لە قەڵەم دەدات و دەڵێ: جوگرافیایەك بە ناوی كوردستانەوە نییە و مووسڵ و كەركووك دوو شاری توركمانین، گەورەترین شەقامی هەولێریش ناوی (موزەفەرەدین گۆكبۆرو)ـە، وەك ئاماژەیەك كە هەولێریش شارێكی توركمانییە".
"هەرێمی كوردستان قەوارەیەكی دەستوورییە لە عێراقدا، خاكی پێكەوەژیانی ئایینی و نەتەوەییە. كونسوڵخانەی گشتیی توركیا لە هەرێمی كوردستانە. بە لای ئێمەوە لە وەزارەتی ڕۆشنبیری و لاوانی حكومەتی هەرێمی كوردستان، ئەم درامایە سووكایەتییە بە هەموو ئەو ڕاستییانە و زیانیان پێ دەگەیەنێت" وەزارەتی ڕۆشنبیری وا دەڵێت.
پەرەگراف دەقی گفتوگۆكانی ناو ئەو دیمەنەی دادگاییكردنەكەی كردووە بە كوردی و وەكوو خۆی بڵاوی دەكاتەوە
پێنووسی دادوەر: ئەم پیاوە هێرشی كردووەتە سەر هاووڵاتییەكی ئەمریكی، ئەو هاووڵاتییە لەلایەن حكومەتی باكووری عێراقەوە ڕێگەپێدانی كاركردنی هەیە، بازرگانێكی ئەمریكییە.
تۆمەتبار: باسی نیزامەدینی حەیوان دەكەن؟
سەرۆكی دادگا: ششش... بێدەنگ بە
تۆمەتبار: ئێوە كە دەڵێن بازرگانێكی ئەمریكی، مەبەستتان نیزامەدین كۆزی بێشەرەفە؟
سەرۆكی دادگا: وتم بێدەنگ بە
تۆمەتبار: سەرباری ئەوەش، تۆ جارێ پێم بڵێ كێ تۆمەتبار دەكەیت بە هێرشكردنە سەری؟
پارێزەری سكاڵاكەر: بەڕێز سەرۆك، ئەگەر هەر هێرش بووایە، كاری بەخێر بوو، سەرەتا چاودێریی كردووە، پلانی بۆ داناوە، بەدوایدا چووە، دواتر هێرشی كردووەتە سەری. سەرباری ئەمانەش، تۆمارمان لەبەردەستدایە كە دەری دەخات ئەم كەسە كاری بۆ كۆماری توركیا كردووە. ئەم كەسە درۆ لەگەڵ ئێوە دەكات.
سەرۆكی دادگا بۆ تۆمەتبار: چی بووە؟ بۆ پێدەكەنیت؟
تۆمەتبار: بە حاڵی ئێوە پێدەكەنم، بەو یارییە پێدەكەنم كە دەیكەن.
سەرۆكی دادگا: وەرەوە سەر خۆت، سنووری خۆت بزانە. من لێرە نوێنەرایەتیی حكومەتی هەرێمی باكووری عێراق دەكەم.
تۆمەتبار: باشە، بەڕێز سەرۆك، من دان نە بە حكومەتەكەتاندا دەنێم، نە بە دادگاكەشتان، ئێوە ناتوانن دادگایی من بكەن.
- دیبلۆماتكارێكی تورك: بەڕێز تەكین! (ئاماژە بۆ وەستانی لەو قسانە).
تۆمەتبار لە وەڵامی دیبلۆماتكارە توركەكەدا: من لێرەدا بە ناوی دەوڵەتی توركیاوە قسە ناكەم، بیروباوەڕەكانی خۆم دەخەمە ڕوو، لەبەر ئەوە بەڕێز دیپلۆماتكار پێویست ناكات نێوەندگیری بكەیت. من هیچ پەیوەندییەكم بە دەوڵەتەوە نییە، با ئەندامانی ئەم دادگایە باش بیزانن. ئێستا دەست لەسەرم هەڵگرن با دوو قسە بكەم.
تۆمەتبارەكە بەردەوامە لە قسە: ئێوە بە خۆتان دەڵێن حكومەتی هەرێم، لە بنەڕەتدا ئێوە بەشكێن لە پیلانگێڕیی دروستكردنی ڕۆژهەڵاتی ناوەڕاست. ئێمە 1200 ساڵە لەم خاكەدا دەژین، دەتوانن نكۆڵی بكەن لە سەلجوقییەكان، ئەتابەیلیكییەكان، ئیلهانییەكان، ئاققۆنیلوییەكان، قەرەقۆینلووییەكان و عوسمانییەكان؟ خۆ بەوە نییە كە تاپۆ و تۆماری ژمارەی دانیشتوانتان هەیە. وەڵاهی هەرگیز سەركەوتوو نابن لە سڕینەوەی شوێنپەنجەكانمان لەم ناوچەدا.
سەرۆكی دادگا: سنووری خۆت بزانە تەكین گیریتلی.
تۆمەتبار: من سنووری خۆم دەزانم و سنووریش پیشانی ئەوانە دەدەم كە سنووری خۆیان نازانن. كەركووك نیشتمانمە، خاوەنی ڕاستیی ئەم خاكانە توركمانەكانە، كەركووك و مووسڵ هی خۆمانە. گەرەوترین شەقامی هەولێر ناوی موزەفەرەدین گۆكبەرییە، لەوانەیە ڕۆژێك بێت ئەم ناوە بسڕنەوە، بەڵام مێژووتان پێ ناسڕدرێتەوە. ناتوانن توركەكانی كەركووك وەدەربنێن.
سەرۆكی دادگا: هەرچیی وتووە تۆماری بكە.
تۆمەتبارەكە: تۆماری بكەن، بێگومان تۆماری بكەن. دوو تورك پێكەوە كۆببنەوە، دەوڵەت دروست دەكەن، ئێوەش كە ئیشیان پێتان نەما، دەتان خەنە تەنەكەی خۆڵەوە، داشی دامەن، داشێكی ئاسایی. ئەگەر ئەم كەسانە نەبن، ئێوە نابن، ئەمان ڕۆژێك دادێت دەڕۆن، دڵنیا بن دەڕۆن، ئیتر ئەو كاتە باجەكەی دەدەن. توركمانەكان، سریانییەكان، شیعەكان، سوننەكان، هەموویان دانە دانە حسابتان لەگەڵدا دەكەن. ئەم ئەمریكییانەی كە شوێنیان كەوتوون، دوای ئەوەی بەجێیان هێشتن، بۆ كوێ هەڵدێن؟ ها؟
سەرۆكی دادگا: تۆ بۆت نییە لێپرسینەوە لە شەرعییەتبوونی حكومەتی باكووری عێراق بكەیت.
تۆمەتبار: من تەكین گریتلی، هاووڵاتیی كۆماری توركیام، نە دان بە ئێوەدا دەنێم و نە دان بەم دادگاییەشدا دەنێم كە سەرۆكایەتیی دەكەن. شتێك نییە بە ناوی باكووری عێراقەوە، بەڵام عێراق باكووری هەیە، لەبەر ئەوە ئەگەر تاوانێكم هەبێت، دەبێت لە دادگاكانی عێراق یاخود لە دادگاكانی كۆماری توركیا دادگایی بكرێم.
سەرۆكی دادگا: ئەمە بكەنە دەرەوە