ئاسایشی سلێمانی: دوو گرووپی تیرۆریستیمان دەستگیر کرد کە پیلانی تیرۆرکردنی چەند کەسایەتییەکیان هەبوو
پەرەگراف
ئاسایشی سلێمانی ڕایگەیاند، شکستیان بە پیلانی "دوو گروپی تیرۆریستی" هێناوەو ئەندامانی ئەو دوو گروپەیان دەستگیر کردوو کە خەڵکی ناوچەکانی هەرێمی کوردستانن و "مەرامیان بوو کردەوەی تیرۆریستی لە هەولێر ئەنجام بدەن و پیلانی تیرۆرکردنی چەند کەسایەتیەکیشیان داڕشتبوو".
"بەگوێرەی دانپێدانانی دەستگیرکراوەکان پیلانیان دانابوو ھەولێر و سلێمانی و ھەڵەبجەو گەرمیان بکەنە ئامانجی کردەوەکانیان" ئاسایش لە ڕاگەیەندراوێکدا وادەڵێت.
بەڕێوەبەرایەتیی ئاسایشی پارێزگای سلێمانی لە ڕاگەیەندراوێكدا دەڵێت "بە پشتبەستن بە زانیارییە ھەواڵگیرییەكان، بەڵگەی دروست و پشتڕاستكراوە دەستكەوت لەسەر هەردوو گرووپە تیرۆریستییەكە، كە لە ڕێگای تۆڕە كۆمەڵایەتییەكانەوە كەوتوونەتە ژێر كاریگەریی فكری تیرۆریستیی داعش و بە دوو ئاڕاستەی جیاواز پیلانیان دانابوو مەرامەكانیان جێبەجێ بكەن".
هەروەها ئاماژە بەوە كراوە كە "پاش لێكۆڵینەوە و بەدواداچوونی ورد، سەرەداو ئاشكرا بوو و شوێن و جووڵەی تۆمەتباران دەستنیشان كران و خرانە ژێر چاودێریی وردەوە".
بەپێی دانپێدانانەكانیان كە ئاسایش بڵاوی كردووەتەوە، دەستگیركراوەكان پێنج كەسن، كەسێكیان دانیشتووی قەزای خەباتی ھەولێر، یەكێكی دیكە دانیشتووی پارێزگای هەڵەبجە، سێیەمیان خەڵكی ئاكرێ و دوانەكەی دیكە خەڵكی سلێمانین.
هەر پێنجیان لە ڕێگای تۆڕە كۆمەڵایەتییەكانەوە لەخشتە براون و پەیوەندییان بە داعشەوە كردووە. ئەو كەسەیان كە دانیشتووی خەباتە، "پیلان دادەنێت چەند كردەوەیەكی تیرۆریستی لە چەند شوێنێكی ھەولێر ئەنجام بدات، بەڵام پێشوەخت لە سلێمانی لە ڕۆژی ١ی ٦ ی ٢٠٢٢ دەستگیر كرا". چوار دەستگیركراوەكەی دیكەیش پیلانیان داناوە بچنە ناو داعش، بەڵام بەر لەوە دەستگیر كراون.
ئاسایشی سلێمانی دەڵێت "هەر لە ماوەی چەند مانگی ڕابردوو چەندین تیرۆریستی ھەرەتاوانبار دەستگیر كراون و ڕووبەڕووی یاسا كراونەتەوە، لەبەر سەلامەتیی لێكۆڵینەوەكان و پاراستنی ئاسایشی ئابووری و كۆمەڵایەتی، زانیارییەكان بە نھێنی ھێڵدرانەوە".
"ئەوەی جێگای ھەڵوەستەی جددی و تێڕامانە، لە ئێستادا تۆڕەكۆمەڵایەتییەكان و پلاتفۆڕمەكانی سۆشیال میدیا، یەكێكن لە ھۆكارە سەرەكییەكانی لەخشتەبردنی گەنجانی ھەرێمی كوردستان و وەك سەكۆیەك بەكار دەھێنرێن بۆ بانگەشەكردنی فكری توندڕەوی داعش و جێبەجێكردنی مەرامەكانیان"، ئاسایشی سلێمانی وا دەڵێت.
بەڕێوەبەرایەتیی گشتیی ئاسایشی سلێمانی داوا لە "مامۆستایانی ئایینی، پەروەردەكاران، توێژەرانی كۆمەڵایەتی و دەروونی، ڕاگەیاندنكار و ڕۆژنامەنووسان و خاوەن قەڵەم و نووسەرانی" دەكات كە ڕۆڵی خۆیان بگێڕن بۆ ھۆشیاركردنەوە دژی فكری توندڕەوی.