پەرەگراف - هەردی عوسمان
زیاتر لە 40 ساڵە لەناو كایەی هونەردایە و مامۆستای مۆسیقا و شارەزای مەقاماتە، لەگەڵ ئەستێرەكانی گۆرانیی كوردی و عەرەبی كاری كردووە، بەڵام ئەو دەیان ساڵ خزمەتە نەك خەونەكانی نەهێناوەتە دی، بەڵكوو ئێستا خەمی بژێوی و كرێی خانوویەك بۆ ژیانێكی سادە، خەریكە هونەرەكەشی لەبیر دەباتەوە. هەر كە ئەم چەند دێڕە دەخوێنیتەوە، تێدەگەیت ئەوە سەرگوزشتەی هونەرمەندێكی دیكەی كوردە.
زۆر جاری لە هونەر و ئەدەبیاتی كوردیدا بە ژیانی پڕ كوێرەوەریی بەكر عەلی، قالە مەڕە و دەروێش عەبدوڵڵاكان ئاشنا دەبیت، هەموانیش دێڕە بەناوبانگەكەی گۆرانی شاعیرمان لەبەرە "بەڵێ، ڕاستە لەناو قەومی بەسیتا قەدری سەنعەتكار - وەكوو عەكسی قەمەر وایە لەناو حەوزێكی لیخندا"، یان بەیتە شیعرەكەی هێمن كە دەڵێت "هونەرمەند و ژیانی خۆش مەحاڵە - هونەرمەند ڕەنجەڕۆیە ژینی تاڵە". ئەمڕۆیش سەرگوزشتەی هونەرمەندێكی دیكەی كورد دەگێڕینەوە، كە خەریكە بە دەردی ئەوانی پێش خۆی دەچێت.
هونەرمەند ماجید عەبدولڕەزاق خالیدی كەلهوڕی، مامۆستای مۆسیقا و شارەزا لە مەقامات، ساڵی 1952 لە خانەقین لەدایك بووە. دایكی كە بە "ئەختەری ئیمام" ناسراوە، خەڵكی گەڕەكی سابونكەرانی سلێمانییە، باوكیشی كوردی خانەقینە.
خێزانەكەی هونەرمەند ماجید عەبدولڕەزاق، هەر لە زووەوە چوونە بەغداد، ئەو لە حەفتاكانی سەدەی ڕابردوو و لەگەڵ هونەرمەندە دیارەكانی عەرەبدا بە هونەر ئاشنا بوو.
ماجید عەبدولڕەزاق كە ئێستا لە سلێمانی دەژی، لە گفتوگۆیەكدا لەگەڵ پەرەگراف سەبارەت بە سەرەتای ئاشنابوونی بە هونەر دەڵێت "ساڵی 1979 لە پەیمانگای ئەكادیمیی مەقامات لە بەغداد، لەگەڵ دنیای مەقامات و ئامێری عوود تێكەڵ بووم".
وەكوو خۆی دەیگێڕێتەوە، ماجید عەبدولڕەزاق لەگەڵ گەورەهونەرمەندانی وەكوو "كازم ساهیر، نەسیر شەممە، مەحموود ئەنوەر، ئەحمەد نیعمە و فازڵ عەواد" پێكەوە لە پەیمانگای ئەكادیمیی مەقامات لە بەغداد خوێندوویانە. ئەو دەڵێت "ئەمانە كۆمەڵێك هونەرمەندی زۆر باش بوون، جگە لە دەوامی پەیمانگامان، شەوانیش پێكەوە خەریكی هونەر بووین".
پاش ساڵانێكی زۆر ژیان لە بەغداد و قاڵبوونەوە لە هونەردا، كاركردن لەگەڵ ئەو هونەرمەندە گەورانەی عێراق، ماجید عەبدولڕەزاق لە ساڵی 2005 دەگەڕێتەوە بۆ سلێمانی و لەسەر دەستی ئەو لە پەیمانگای هونەرە جوانەكان بەشێك بۆ فێربوونی ئامێری عود دەكرێتەوە. خۆی دەڵێت "دواتر مامۆستا عەبدالعەزیزیش هات لەگەڵمدا بوو بە مامۆستا".
"سەرەتا كاك زاهیری كەریمە ڕەش بۆ ماوەی دوو ساڵ جێیەكی بۆ دابین كردم، بێ بەرامبەر منداڵ و گەنجانی وڵاتەكەم فێری هونەری مەقامات و ئامێری عود دەكرد، دوای ئەوە چوومە جێگەیەكی تر، ئیتر نەمتوانی كرێی شوێنەكە بدەم، دوو بۆ سێ مانگ تەحەمولم كرد، ئیتر بەهۆی ئەم قەیرانە دارییەوە نەمتوانی بەردەوام بم، فێرگەكەم داخست و شتەكانیشم فرۆشت بۆ ئەوەی بۆ چەند مانگێك پێی بژیم"، ماجید عەبدولڕەزاق بۆ پەرەگراف وا دەڵێت.
ئەم هونەرمەندە كوردە سەبارەت بەو گۆرانیبێژانەی كە كاری لەگەڵ كردوون، دەڵێت "لە هونەرمەندانی عەرەب لەگەڵ سەعد حیللی، كازم ساهیر، عەباس جەمیل، لەمیعە تۆفیق و ڕیاز ئەحمەد. لەگەڵ كوردەكانیش كارم زۆرە، لەگەڵ حەمە جەزا، عەدنان كەریم و زۆر هونەرمەندی تریش كە ئێستا ناوەكانیانم لەبیر نییە، هەروەها لەگەڵ مامۆستایانی مۆسیقار: ئەنوەر قەرەداغی، خالید سەركار، عومەر سەركار و دەیانی تر كارم كردووە".
بە تێڕوانینی هونەرمەند ماجید عەبدولڕەزاق، ئێستا "هونەر لە كوردستان بوونی هەیە، بەڵام ئەوانەی ئیشی تێدا دەكەن، بەشێكیان نەشارەزان"، ئەوەش بە "كێشە گەورەكە"ی خۆی و هاوڕێكانی ناو دەبات و دەڵێت "بۆیە ئێمە پەراوێز خراوین، نە دەسەڵات، نە كەسانی پەیوەندیدار بەو بوارە ئێمەیان هەر لە بیر نییە".
هونەرمەند ماجید عەبدولڕەزاق بە گەڕانەوەی بۆ كوردستان، نەك خەیاڵە هونەرییەكانی بۆ نەكراوە بە واقیعی، بەڵكوو هێشتا لە خەمی دابینكردنی ژیانێكی سادەدا گیری خواردووە. ئەو دەڵێت "من تا ئێستا كرێچیم و سەری مانگان نازانم چۆن كرێی خانووەكەم دابین بكەم، زۆر جار ڕەفیق و برادەر هاوكاریم دەكات".
"لە تاو مەعیشەت و كرێی خانوو خەریكە هونەرەكەم فەرامۆش دەكەم، زۆر شت لە خەیاڵمدا هەیە هەمووی ماوەتەوە، گریانم دێت، دەترسم بمرم و لەگەڵ خۆم بیانبەمە ژێر گڵ"، هونەرمەند ماجید عەبدولڕەزاق بۆ پەرەگراف وای وت.
لە كۆتاییشدا جێهێشتنی نیشتمان تاكە ڕێگەیە كە هاوشێوەی زۆر كەسی دیكە لەبەردەم ئەم هونەرمەندە كوردەشدا ماوەتەوە و دەڵێت "ئێستا بیرم لەوە كردووەتەوە سەری خۆم هەڵگرم و لەم وڵاتە بڕۆم. دەڕۆم بۆ خلیج، عەرەباكان باشتر قیمەتی ئێمەیان لەلایە تا كوردەكانی وڵاتەكەی خۆم بەتەمام بڕۆمە قەتەر".
ئەو مامۆستایەی مۆسیقا و مەقامات، دڵخۆشە بەوەی كە خەڵكی سلێمانی ڕێزی هونەریان زۆر لایە و زۆر ڕێزی لێ دەگرن، دەڵێن "تۆ مامۆستایەكی گەورەیت، هونەرێكی گەورەت لە هەگبەدایە"، بەڵام لەگەڵ ئەوەشدا دەڵێت "خەڵك چیی بەدەستە، ئەمە پرۆژەی حكوومەتە، دەبێت حكومەت و بەرپرسەكان هەستیان بۆ ئێمە هەبێت".