یەكێتی: تەزویر و چاوسووركردنەوە پارتیی لە گۆڕەپانی زۆرینەی ساختەی حوكمڕانیدا هێشتووەتەوە
پەرەگراف
مەكتەبی سیاسیی یەكێتی قسەكانی شێخ جەعفەر بە "ڕاست و ڕەوا" ناو دەبات و لە وەڵامی مەكتەبی سیاسیی پارتیدا دەڵێت "پارتی دەمێكە بەهای دیموكراسیی لە هەڵبژاردنەكان دۆڕاندووە و ئەوە تەنها تەزویر و چاوسووركردنەوەیە ئەوانی لە گۆڕەپانی زۆرینەی ساختەی حوكمڕانیدا هێشتۆتەوە".
پاش ئەوەی مەكتەبی سیاسیی پارتی وەڵامی قسە و ڕەخنەكانی جەعفەر شێخ مستەفای دایەوە، مەكتەبی سیاسیی یەكێتیش لە ڕاگەیەندراوێكدا وەڵامی پارتیی دایەوە و ڕوونكردنەوەكەی پارتی بە "چەواشەكارانە" ناو دەبات.
مەكتەبی سیاسیی یەكێتی دەربارەی تۆمەتباركردنی یەكێتی بە "دواخستنی هەڵبژاردن"، دەڵێت "ڕاستێكەی ئەوەیە كە پارتی دەیویست بەو یاسا كۆنەی هەڵبژاردن و تۆمارە پڕ خەوشەی دەنگدەران، بەبێ هەمواركردنەوەیەكی گونجاو، بچینە ناو پرۆسەیەكی شێواوی هەڵبژاردنەوە، كە تەنها و تەنها لە بەرژەوەندیی پارتی و تەزویرە ئاشكرا و چەندبارەبووەكانیدایە".
دەقی ڕاگەیەندراوی مەكتەبی سیاسیی یەكێتی:
سیاسی پارتی دیموكراتی كوردستان لە رونكردنەوەیەكی چەواشەكارانەدا وەڵامی لێدوانە ڕاست و ڕەواكانی هەڤاڵ شێخ جەعفەر شێخ مستەفا ئەندامی ئەنجوومەنی باڵای سیاسی و بەرژەوەندی یەكێتیی داوەتەوەو زۆر بە پەلەپروزێ كەوتۆتە شێواندنی زەقی راستییەكان و تێكەڵكردنی كاغەزەكان بە جۆرێ نەك هەر هاوڵاتیانی كوردستان، بەڵكو خودی پارتییەكانیش، بڕوای پێناكەن.
لە رونكردنەوەكەدا گوایە باس لە پەراوێزخستنی حزبیی دەكەن، لە كاتێكدا یەكێتیی بەوە دەناسرێتەوە هەمیشە سەركردە و تێكۆشەر و خەباتگێرەكانی پێشڕەو و سەرمەشقن لە سەنگەری بەرگری لە كۆمەڵانی خەڵكی كوردستان و یەكێتیەكەیاندا.
رونكردنەوەكە تۆمەتی دواخستنی هەڵبژاردن دەخاتە ئەستۆی یەكێتیی، خەڵكی كوردستان زۆر لەوە وشیارترن باوەڕ بە بوختانی وا بكەن. ڕاستێكەی ئەوەیە كە پارتی دەیویست بەو یاسا كۆنەی هەڵبژاردن و تۆمارە پر خەوشەی دەنگدەران، بەبێ هەمواركردنەوەیەكی گونجاو، بچینە ناو پرۆسەیەكی شێواوی هەڵبژاردنەوە، كە تەنها و تەنها لەبەرژەوەندی پارتی و تەزویرە ئاشكرا و چەندبارە بووەكانیدایە.
ئاخر هەڵبژاردن لە بنچینەدا بۆ گۆڕانكاری سیاسیی و دیموكراسی ڕاستەقینە دەكرێت. كە ئەو ئامانجانە بەدینەهێنێت، ئەوا وەك تەسدیقكرنی بەرنامە تەزویرەكەیانە كە ئێستا بۆتە فەرهەنگێك نەك لە دژی فرەحزبی كوردستان، بەڵكو لە دژی خودی كۆنگرەی پارتی و ئەندامەكانیشی تەشەنەی سەندووە.
بەشێكی بەلاغەكەی مەكتەبی سیاسی پارتی فرمێسكی تیمساحی بۆ ئایندەی هەرێم هەڵدەرێژێ و لە بیری دەباتەوە كە ئەوە پارتییە هەمیشە ئامادە بووە و ئامادەیە هەموو هەرێم و ئەزموونەكەمان بكاتە قوربانی بەرژەوەندی تەسكی حزبی و ئیمارەتێكی بەر تەسك بۆ مانەوەیان تا شتێك نەمێنێ بە ناوی هەرێم و حكومەت و ئیدارەی كوردستانییەوە، پیلان و كەینوبەینە ئیقلیمییەكانیان شاهیدی ئەوەن و لە هەر تەنگژەیەكی سیاسیشدا ویستی هەڕەشە ئامێزی ماڵجیایی هەمیشە بەشێك بووە لە پەیامی ئاشكرا و نهێنییان.
ئەم ڕاستییە ئاشكرایانە بە دەلەسەی گوایە كێشە ناوخۆییەكانی یەكێتی داناپۆشرێت، چونكە ناوخۆی پارتی و گرژی نێوان باڵەكانی وا زەقەكە كە ئێستا بۆتە مەترسی سەرباری ئەو مەترسییانەی پارتی بۆ كوردستانی دروستكردووە.
رونكردنەوەی بوختانئامێزی مەكتەبی سیاسیی پارتی باس لە ترسی دۆرانی هەڵبژاردن دەكات كە پارتی دەمێكە بەهای دیموكراسی لە هەڵبژاردنەكان دۆراندووە و ئەوە تەنها تەزویر و چاوسوركردنەوەیە ئەوانی لە گۆڕەپانی زۆرینەی ساختەی حوكمڕانیدا هێشتۆتەوە.هەروەها ئەوە پارتییە دوو چەمكی (مونافەسە و دوژمنایەتی) تێكەڵ كردووە، چونكە هەر حزب و لایەنێك نەچێتە ژێر ركێفی وەهمی حزبی قائیدەوە و مل بۆ خۆسەپاندنەكەیان نەدات بەدوژمنیان زانیووە و بە داتاشینی سینارێوی دەستكردی موخابەراتی و تەشهیری میدیایی تەخوینی دەكەن.
مەكتەبی سیاسی پارتی بە لوتبەرزییەوە دەڵێ: (ئێمە لەوە گەورەترین بچینە لای كەسی دیكە و گلەیی بكەین) ئەمەش هەمان فەرهەنگی عینادی و حیساب نەكردنە كە راوێژ و بیروڕا گۆڕینەوەی نێوان هێزەكانی كوردستانیشی پێ عەیبەیە، پێچەوانەی یەكێتی كە بۆ هەر هەنگاوێك بڕوای بە تەگبیر و راوێژ هەبووەو خۆی بە دوور گرتووە لە تاكڕەوی و خۆسەپێنی. راوێژی یەكێتی لەگەڵ هاوبەشەكانی ئەزموونی كوردستان بۆ سوڵح و شەفاعەت نەبووە لەگەڵ پارتیدا، بەڵكو بۆ خستنە رووی نیگەرانییەكانی هەمووان بووە لە ئەدای خراپی حوكمڕانی و تاكڕەوی پارتی تا هەموولایەك لە هەر هەڵوێستێكی یەكێتیی ئاگاداربن، ئەگەر كۆبوونەوە لەگەڵ لایەنەكان خراپە ئەی بۆچی دوای سەردانەكانی وەفدی یەكێتیی، تەنگەتاو بوون و گوایە (وەفدی حكومیان) پێكهێنا و لە دەرگای لایەنەكانیان دا؟
بوختاننامەی مەكتەبی سیاسی پارتی باس لە كەیسی تیرۆركردنی شەهید (هاوكار جاف) دەكات، گوایە پێشوەختە ئاگاداری كردەوەكە بوون ئەی بۆچی هەوڵتان نەدا رێی لێ بگرن و فرمێسك و خوێنێك بۆ گەلەكەمان بگێرنەوە؟ یان ئەوە دەسەلمێنن كە رەنگە هەر خۆتان و كەسانی راكردوو لە یاسا كە داڵدەتان داون، بەرپرسن لەو رووداوە؟!، خۆ ئەگەر باسی تۆماری تیرۆر بكەین ئەوا پەرێزی مێژوویی پارتی قەت پاك نابێتەوە و تاوانەكان لە ژماردن نایەن، كە تازەترینییان شەهید كردنی كارمەندێكی ئاسایش بوو لە چەمچەماڵ و لێدان و دەستدرێژی بۆ سەر كەسانی تر لەسنووری دەسەڵاتی یەكێتیدا، ئەدی بۆچی ئەو دۆسێیانە دیزە بەدەرخۆنە كران و تاوانبارەكانتان لای خۆتان گلداوەتەوە و موعەزز موكەرەمن لە پایتەخت دەژین.
روونكردنەوەكەی مەكتەبی سیاسی پارتی، دەڵێت دوای داواكردنی چەند كەسێك لە لایەن دادگاوە گوایە هێرشی یەكێتی بۆ سەر پارتی دەست پێكردووە لەكاتێكدا قەرار بوو لیژنەی هاوبەشی لێكۆڵینەوە لە هەر كەیسێكی گوماناوی بكەن نەك هەر خۆیان ئیستفراد بە دادگا و لێكۆڵینەوە بكەن و سیناریۆ دا بتاشن و مۆری دادگای لێبدەن.
دوا قسەمان دەڵێین ، لە پێناو پەرژەوەندی گشتیدا، ئەوە یەكێتیی نیشتیمانیی كوردستان بووە كە هەمیشە نەرمی نواندووەو لەزۆر مافی خۆمان خۆشبووین، بەڵام ناكرێ تا سەر بێدەنگ بین لە سیاسەتی جیاكاری و ئابڵوقەی دوژمنكارانە بەرامبەر خەڵكی ناوچەكانی ئەم دیو دێگەڵە (بگرە تەواوی دۆخی دژواری كوردستان) كە تا ئێستا سنورێكی دروستكراوی هەڵبەستنی رق و كینەی ناختانە,
هیوامان وایە سەرئەنجام تای دەمارگیری ، بوغزو كینە ، واهیمەی (حزبی قائید) و تەخوینی بیروڕای جیاواز بەرتان بدات و لە كۆنگرەی سبەینێتاندا سیاسەتێكی نوێی كوردانە و دەربەستی سیاسی بگرنە بەر و بڕیاری نیشتمانی ئەوتۆ بدەن كە زەرەری تا ئێستا زۆر و زەبەنەتان، لە نیوەی بگێرێتەوە.
مەكتەبی سیاسی یەكێتیی نیشتمانیی كوردستان