بافڵ تاڵەبانی بۆ خوێندکاران: پشتیوانی فشارە مەدەنییەكانتان دەبم و هیوادارم چالاكییەكانتان توندوتیژی لێنەكەوێتەوە
پەرەگراف
بافڵ تاڵەبانی پشتیوانیی بۆ ناڕەزایی و فشارەکانی خوێندکارانی زانکۆو پەیمانگەکان ڕاگەیاندو دەڵێت: بە دیهێنانی ماف، بەدەستهێنانی شایستە داراییەكان و پێداویستییەكانی دیكەی خوێندنتان بە ئەركی خۆمان دەزانین.
سەرۆکی یەکێتی لە پەیامێکدا بۆ خوێندکاران دەشڵێت: پشتیوانی هەموو فشارە مەدەنییەكانتان دەبم و هیوادارم چالاكییەكانتان توندوتیژی لێنەكەوێتەوە و كاریگەری نەرێنی لەسەر ژیانی هاوڵاتییان نەبێت.
ئەو پەیامە لەکاتێکدایە خوێندکارانی زانکۆو پەیمانگەکان لە چەند ناوچەیەکی کوردستان چەند ڕۆژێکە دەستیان بە خۆپیشاندان و ناڕەزایی کردووەو داوای پێدانی دەرماڵەو دابینکردنی خزمەتگوزاریی دەکەن.
دەقی پەیامەکەی بافڵ تاڵەبانی
خوێندكارە خۆشەویستەكانی سەرجەم زانكۆ و پەیمانگەكانی كوردستان
بەبۆنەی دەستپێكی ساڵی نوێی خوێندنەوە پیرۆزباییتان لێدەكەم و هیوای سەركەوتن و داهاتوویەكی پرشنگدارتان بۆ دەخوازم.
لە ساڵی رابردوودا بەدیداری یەكتر شادبووین و بەڵێنی بەدواداچوون و چارەسەركردنی كێشەكانم پێدان، بەخۆشحاڵییەوە زۆرینەی كێشەكانمان چارەسەركرد.
ئێستاش بە بڕوای تەواوم بە رۆڵ و پێگەی ئێوە لە ئێستا و داهاتووی وڵاتەكەماندا، بەڵێنتان بۆ دووپات دەكەمەوە كە بۆ ئەمساڵی خوێندنیشتان، بەندە و یەكێتیی نیشتمانیی كوردستان پاڵشپت و پشتیوانتان دەبین.
خوێندكارانی ئازیز
ئێوە ئەو نەوە فێرخواز و داهێنەرەن كە وڵاتەكەمان پێویستی بە توانا و لێهاتووییەكانی ئێوەیە و ئومێدی گەورەمان لەسەر داهاتووی ئێوە هەڵچنیووە. هەر بۆیە بەدیهێنانی ماف، بەدەستهێنانی شایستە داراییەكان و پێداویستییەكانی دیكەی خوێندنتان بە ئەركی خۆمان دەزانین وهاوشێوەی رابردوو لە هەوڵەكانمان بەردەوام دەبین.
پشتیوانی هەموو فشارە مەدەنییەكانتان دەبم و هیوادارم چالاكییەكانتان توندوتیژی لێنەكەوێتەوە و كاریگەری نەرێنی لەسەر ژیانی هاوڵاتییان نەبێت. داواكارم هاوكاری هێزە ئەمنییەكان بن لە پاراستنی ئاسایشی ئێوە و هاوكاریكردنی خەڵكە خۆشەویستەكەمان.
پێكەوە بەرەو داهاتوویەكی گەشتر هەنگاو دەنێین.
دڵسۆزتان
بافڵ جەلال تاڵەبانی
سەرۆكی یەكێتیی نیشتمانیی كوردستان
١٢ی تشرینی دووەمی ٢٠٢٢