چوارەم دانیشتنی دادگا لەسەر داوا یاساییەکانی پەرەگراف لەدژی سەرۆکی هەرێم و سەرۆکی حکومەت بەڕێوەچوو
پەرەگراف
چوارەم دانیشتنی دادبینی دوو داوا یاساییەکەی سەرنووسەری پەرەگراف کە لەسەر سەرۆکی هەرێم و سەرۆکی حکومەت تۆماری کردووە لە دادگای ھەولێر بەڕێوەچوو.
لە دانیشتنەکاندا سورکێو محەمەد سەرنووسەری پەرەگراف لەگەڵ پارێزەرانی ھەریەکە لە نێچیرڤان بارزانی و مەسرور بارزانی ئامادەبوون.
پاشان بەھۆی نەگەیشتنی دۆسیەی ھۆشدارییەکان لە دادنووسی سلێمانییەوە بۆ دادگای ھەولێر، دادوەر بڕیاریدا بە دواخستنی ھەردوو دانیشتنەکە بۆ ٤-١٢-٢٠٢٢.
سەرنووسەری پەرەگراف داوای یاسایی لەسەر ھەرسێ سەرۆکایەتییەکەی ھەرێم تۆمارکرد بەھۆی پێنەدانی زانیاریی لەبارەی بودجەو خەرجییەکانیان بەپێی یاسای مافی دەسکەوتنی زانیاریی، ئەوەش دوای ئەوەی ناوەڕاستی ئەمساڵ لەڕێی ھۆشداریی دادنووسەوە داوای زانیارییەکانی کردو لەماوەی یاساییدا وەڵامی داواکان نەدرانەوە.
لەسەر داوای پارێزەرەکانیان داواکانی سەرۆکی ھەرێم و سەرۆکی حکومەت لە سلێمانییەوە گوازرانەوە بۆ ھەولێر، ١٠ی ئەم مانگەش داواکەی سەرۆکی پەرلەمان لە دادگای سلێمانی لە بەرژەوەندی سەرنووسەری پەرەگراف یەکلابووەوەو دادوەر بڕیاریدا بە "پابەندکردنی داوالەسەرکراو سەرۆکی پەرلەمانی کوردستان سەرەڕای کارەکەی، بە پێدانی سەرجەم ئەو داتاو زانیارییانەی لە ناوەڕۆکی هۆشدارییەکەدا هاتووەو ئەم بڕیارە قابیلی تانەلێدانە".