دادگای باڵای بەریتانیا: ناردنی كۆچبەران بۆ ڕوواندا یاساییە و لەگەڵ مافەكانی مرۆڤدا یەك دەگرێتەوە
پەرەگراف
دادگای باڵای بەریتانیا لەبارەی كەیسی ناردنی كۆچبەران بۆ ڕووندا بڕیاری دا و دەڵێت "پڕۆسەیەكی یاساییە و لەگەڵ مافەكانی مرۆڤدا یەك دەگرێتەوە".
ئەمڕۆ دادگای باڵای بەریتانیا ڕایگەیاند "پڕۆسەیەكی یاساییە كە حكومەتی بەریتانی لەگەڵ حكومەتی ڕواندا ڕێك بكەوێت بۆ ناردنی كۆچبەران بۆ ئەو وڵاتە تا لەوێ هەڵسەنگاندن بۆ دۆسیەكانیان بكرێت، ئەو هەنگاوە لەگەڵ ڕێككەوتنی تایبەت بە مافەكانی مرۆڤ یەك دەگرێتەوە".
بەپێی بەرنامەیەكی حكومەتی بەریتانیا بۆ ڕووبەڕووبوونەوەی شەپۆلی كۆچبەران، هەر كەسێك لە 1ی كانوونی دووەمی 2022ـەوە بە نایاسایی چووبێتە ناو خاكی بەریتانیاوە، ڕەوانەی وڵاتی ڕوواندا دەكرێت، تا ئەو كاتەی كەیسەكەی یەكلایی دەكرێتەوە.
هەرچەندە ئەو بڕیارەی حكومەتی بەریتانیا لەلایەن ڕێكخراوەكانی تایبەت بە مافەكانی مرۆڤەوە ڕووبەڕووی ڕەخنەی تووند بووەتەوە، بەڵام ئەو وڵاتە سوورە لەسەر جێبەجێكردنی.
لەناو ئەو كۆچبەرانەی بڕیاری ڕەوانەكردن بۆ ڕوواندا دەیانگرێتەوە، ژمارەیەكی زۆر كۆچبەری عێراق و هەرێمی كوردستان هەن.
بەپێی ئامارێك كە دوێنێ 18-12-2022 دەزگای لوتكە بۆ كاروباری ئاوارە و پەنابەران بڵاوی كردەوە، زیاتر لە 71 هەزار و 225 كۆچبەری عێراق و هەرێمی كوردستان تەنیا لە ماوەی ئەمساڵدا لە وڵاتانی ئەورووپا داوای مافی پەنابەرێتییان كردووە.
بەشێكی زۆری كۆچبەرانی هەرێم ڕوو لە وڵاتی بەریتانیا دەكەن، بە هۆكاری گونجاویی ئەو وڵاتە بۆ كار و دەستكەوتنی داهاتێكی باش، جگە لەوەی كە لە بەریتانیا كۆچبەران بەر لە وەرگرتنی مافی پەنابەرێتیش كاریان دەست دەكەوێت.
بەپێی ئامارەكانی دەزگای لوتكە بۆ كاروباری ئاوارە و پەنابەران، لە ٢٠٢٢دا ١٧ كۆچبەری عێراق و هەرێمی كوردستان لە ڕێگای هەندەران گیانیان لەدەست داوە و حەوتی دیكەش بێسەروشوێن بوون.
هەربەپێی ئامارەكان، ئەو زیاتر لە ٧١ هەزار كۆچبەرەی داوای مافی پەنابەرییان كردووە، كۆچبەرانی خوار تەمەن 18 ساڵ ناگرێتەوە لەبەرئەوەی ئەوان تۆمار ناكرێت و ئەوانەش ناگرێتەوە كە هێشتا داواكارییان بۆ وەرگرتنی مافی پەنابەرێتیی پێشكەش نەكردووە.
دەزگای لوتكە هۆكاری كۆچی هاووڵاتیانی هەرێم و عێراق بۆ ناسەقامگیریی بارودۆخی سیاسی و ئابووری و كۆمەڵایەتی دەگەڕێنێتەوە.